Is tayn kesuntheet uf een mool xlechter kep? Tan tuu weest tas een krankheet khan tich aarich miit in mentaal un emotsyonaal aat lose, un tas een tratament khan fiil kelt khoste. Was khan tich helfe mit soo een sort propleem um keen? Wii khanst tuu een fraaynt orer yemant fon tayn familye helfe woo een kesuntheet propleem mit macht? Opwool ti Piipel net een puuch iwer kesuntheet is, hot se kuute funtamente woo khene tich helfe ti pest aat fine fer mit tayn situatsyoon um keen.

•   Suuch een tratament

   Ti Piipel saat: “Ti kesunte mënxe prayche khee tokter, awer ti kranke, yaa.” (Matheus 9:12)

   Was is ti lisyoon? Suuch ti hilef fon te toktere wën tas neetich is.

   Fersuuch tas too mache: Suuch te pest tratament. Als mool, khan es kluuch sin mit mee wii ploos 1 tokter xpreche. (Xpriiche 14:15) Xprech taytlich mit te toktere; say tich sicher tas tuu se ferxteest un tas tii tayn sintoome ferxteen. (Xpriiche 15:22) Lërn iwer tayn krankheet, too tepay al ti tratamente woos tuu raus suuche khanst. Wëns tuu ferxteest was pasiire khan, wërst tuu peser foer perayt fer mit tayn situatsyoon um keen, tich in ruu hale un kuute ëntxlise iwer tratamente mache.

•   Hal kesunte kewoonheete

   Ti Piipel saat: “Esersiis mache is kuut fer tayn khërper.” (1^te Timoteus 4:8, Contemporary English Version)

   Was is ti lisyoon? Kesunte kewoonheete hale, soo wii reeklich esersiis mache, pringt tich nutse.

   Fersuuch tas too mache: Tuu reeklich esersiis mache, was kesuntes ese un kenuuch xloofe. Fiilaycht pist tuu tich noch am traan keweene mit tayn nay kesuntheet propleem; noch soo, ti kelërntne layt xtime tas, wëns tuu tich aan xtrengst fer kesunte kewoonheete ëntwikele, tuust tuu kuute resultaate ërnte. Kewis, say tich sicher tas was tuu machst tayn kesuntheet net xlimer lost orer tayn tratament xteert.

•   Suuch ti hilef fon te anere

   Ti Piipel saat: “Te woere fraaynt tsaycht imer liip, un wërt een pruuter in unruyche tsayte.” (Xpriiche 17:17)

   Was is ti lisyoon? Tayn fraaynte khene tich helfe ti xweyere tsayte aus hale.

   Fersuuch tas too mache: Fertseel mit een fraaynt woos tuu traue khanst, mit weem tuu khanst tayn xpiirunge teele. Tas khan tich helfe te strës laychter lose un tich peser xpiire. Fiilaycht wole tayn familye orer fraaynte tich in noch anere aate helfe, awer im xtant wise se net was se mache. Soo saa tëne taytlich was se mache khene fer tich helfe. Waart net tsu fiil fon tëne. Un say imer petanklich fer ti hilef woo se tich kepe. Awer eriner tich tas, opwool tayn fraaynte tich helfe wole, als mool khene se tinge mache woo tich iwerlaate. Tes weeche khan sin tas, manich mool, praychst tuu etliche krënse xtele — tsum payxpiil, iwer wii ofts orer wii lang khene se tich pesuuche.

•   Hal een positiiw aanxtelung

   Ti Piipel saat: “Een frooe hërts is een kuut metitsiin, awer een wee kexlaatne kayst tuut ti kraft fon yemant wech hoole.” (Xpriiche 17:22)

   Was is ti lisyoon? Wëns tuu een kesuntheet propleem host woo tich fiil strës pringt, was tich helfe khan mit tëm um keen un in ruu plaype, is een positiiw aanxtelung un hofnung hon.

   Fersuuch tas too mache: Soo lang wiis tuu tich traan keweene tuust mit tayn nay situatsyoon, konsentriir tich aan was tuu mache khanst, net aan te tinge woos tuu net kontroliire khanst. Ferklaych tich net mit te anere un ferklaych net tayn situatsyoon yets mit tayn friirix situatsyoon, eeps tuu krank waarst. (Kalater 6:4) Was tich helfe tuut een positiiw aanxtelung hale, is tsiile xtele woos tuu trefe khanst. (Xpriiche 24:10) Wën tayn situatsyoon tich erlaupt, mach etwas fer ti anere. Ti frooheet woo too tefun khomt, tuut tich helfe tich net aan tayn propleem traan hale. (Aphostele sayn Kexicht 20:35)

 Ti Piipel tsaycht tas Yeehoowa a khan een persoon helfe mit een kesuntheet propleem um keen. Meyer khene net waarte tas Kot een wuner macht fer uns heele, awer tii woo Kot aan peete, khene ti neekste hilef kriin:

 Friit. Yeehoowa khan tëm sayn friit kepe, “woo keet iwer ales woo ti mënxe ferxteen khene”. (Filiper 4:6, 7) Tiise friit, orer inerlich ruu, khan een persoon helfe net tsu ëngstlich wëre. Kot kept tiise friit fer tii woo tsu tëm peete un iwer sayn soriche mit tëm xpreche. (1^te Pheeter 5:7)

 Kluucheet. Yeehoowa khan uns kluucheet kepe fer kuute ëntxlise mache. (Tyako 1:5) Fer tiise kluucheet kriin, mus ti persoon lërne un aan wëne ti praktixe funtamente woo in te Piipel xteen.

 Een ufmuutich hofnung fer te futuer. Kot ferxprecht een futuer wën “khee pewooner tuut saan: ‘Ich sin krank.’” (Isayas 33:24) Tiise hofnung helft fiile layt een positiiw aanxtelung hale, opwool se xlime kesuntheet propleeme mit mache. (Yeeremias 29:11, 12)