Fiile layt, soo kaar etliche woo saan tas se kriste sin, tenke tas was ti Piipel iwer sëks un hayrat saat, net mee hayt kile tuut. Fer sich aan phase, hon etliche khëriche keënert was se in lërne iwer was fer aanxtelung richtich orer ferkheert is. Meechte ti piiplixe inlërnunge iwer was richtich un ferkheert is, noch hayt kile? Ia. Kuk mool warom.

 Ti mënxe prayche ti oryentiirunge fon sayn Kriatoer; meyer sin mit tiise neetichkheet kemacht kep. Ti Piipel saat: “Noch net mool sayn aychne xrite khan te mënx lenke.” (Yeeremias 10:23) Es is woer tas Yeehoowa a hot uns mit te apiliteet kemacht fer ëntxlise mache. Awer tee hot uns net ti autoriteet orer apiliteet kep fer aleen ëntxlise was richtich un ferkheert is. Tee wil hon tas mer traue uf was eyer too triwer ëntxlist hot. (Xpriiche 3:5)

 Fer uns lenke, hot Kot in te Piipel kelos was eyer tenkt richtich un ferkheert is. Warom hon tiise oryentiirunge soo fiil weyert? Kuk mool 2 uersache.

•   Kot hot uns kemacht. (Psalm 100:3) Wii unser Kriatoer, wees Yeehoowa kraat was mer prayche fer froo un kesunt sin in fiisix, mentaal un emotsyonaal aat. Tee wees aach ti propleeme woo mer mit mache tuun wën mer sayn oryentiirunge net aan heere. (Kalater 6:7) Yeehoowa winxt fer uns tas peste leepe woos meechlich is. Tes weeche tuut ti Piipel saan tas Kot is “Tee woo tich in lërnt was peser fer tich is, Tee woo tich lënkt uf tëm weech woos tuu keen solst”. (Isayas 48:17)

•   Unser winxe khene uns hiner keen. Fiile tenke tas tii khene ëntxlise was richtich un ferkheert is wën se sayn hërts noo keen, es wil saan, sayn aychne winxe. Awer ti Piipel saat tas “tas hërts is hinerlisticher wii yeete aner tings un is ausensich”. (Yeeremias 17:9) Wën unser hërts net fon Kot sayn kluucheet kelenkt is, khene mer etwas mache woo mer uns xpeeter peroye tuun. (Xpriiche 28:26; Eklesyastes 10:2)

 Nee! Ti Piipel lërnt in ti woerheet iwer Kot un wii eyer wil hon tas mer uns aan xtele. (1^te Korinter 6:9-11; Kalater 5:19-23) Un Kot wil hon tas ti layt tiise tinge wise. (1^te Timoteus 2:3, 4) Tes weeche mise ti kristliche fiirer in lërne was Kot sayn Wort saat. (Titus 1:7-9)

 Fiile layt wole net aan wëne was ti Piipel saat richtich un ferkheert is. Tii suuche ti relichyeese fiirer woo ‘tëne saan was se heere wole’. (2^te Timoteus 4:3, noote) Awer ti Piipel tuut uns awisiire: “Es keet xlecht mit tëne woo saan tas tas kuutes xlecht is un tas tas xlechtes kuut is.” (Isayas 5:20) Es is taytlich tas ti relichyeese fiirer woo net ti woerheet in lërne iwer was Yeehoowa saat richtich un ferkheert is, tuun aprechnunge mit Tëm mache.

 Nee. Tii woo Kot kefale wole, tuun tas payxpiil un inlërnunge fon Yeesus Kristus noo keen. Yeesus hot sayn tisipele in kelërnt tas tii solte net ti anere richte; xtats tas, solte se liip un respekt fer ale kaar tsayche. (Matheus 5:43, 44; 7:1)

 Yeesus sayn nookeener sole in sayn leepe aan wëne was Kot saat richtich un ferkheert is. Awer tii ferxteen tas ti anere layt khene sayn aychne weech im leepe raus suuche. (Matheus 10:14) Yeesus hot net erlaupt sayn tisipele ti politik orer was aneres penutse fer ti anere tswinge Kot sayn mënunge aan nëme. (Yoohan 17:14, 16; 18:36)

 Tii woo sich aan xtrenge fer se leepe tëm noo was Kot saat richtich un ferkheert is, kriin nutse yets un im futuer. (Psalm 19:8, 11) Kuk mool etliche fon tëne:

•   Kreeser frooheet im leepe. (Xpriiche 29:6)

•   Een ticht fraayntxaft mit Kot. (Xpriiche 3:32)

•   Kot sayn hilef torich ti xweyere tsayte. (Xpriiche 11:8)

•   Ti hofnung fon eewiche leepe uf te eyert. (Psalm 37:29)