Um rom ti welt fiile layt interesiire sich aan wekanismus.

•   “Wekanismus is een aat fon tenke un leepe woo ti layt sich aan xtrenge fer niks penutse woo fon fiitsaych khomt; wii ese, tsaych orer kwalkee anere tings.” (The Vegan Society)

 Etliche layt sin wekan kewoer net ploos wayl se sich mit tas fiitsaych khimere, awer aach wayl tii wole ti natuer xitse, sayn kesuntheet ferpesere, orer weeche relichyeese sache.

•   “Wekanismus is anerste wii ti meyerste dietas, wayl ti layt siin tas wii een klaape, een moraal ëntxlus un een aat wii yeete eene khan ti welt ferpesere.” (Britannica Academic)

 Is wekanismus ti solutsyoon fon ti propleeme uf ti eyert? Was saat ti Piipel too triwer?

 Ti Piipel tsaycht tas unser Kriatoer, Yeehoowa Kot, a siit ti mënxe wii kreeser als tas fiitsaych. Kot hot tsu ti mënxe autoriteet iwer tas fiitsaych kep. (Xeenesis 1:27, 28) Mit ti tsayt, hot Kot ti mënxe erlaupt tas fiitsaych wii ese penutse. (Xeenesis 9:3) Awer, tee wil net hon tas mer tas fiitsaych mit kropheet pehantele. (Xpriiche 12:10)

 Tëm noo ti Piipel, flayx ese orer net, is een perseenlich ëntxlus. b Een tuun was mer ëntxlise, wëre mer net peser foer Kot sayn aue. (1 Korinter 8:8) Nimant thërf ti anere kritikiire weeche was te aner persoon raus suucht se ese. (Romaaner 14:3)

 Ti Piipel tsaycht tas unser ëntxlise tuun net ti propleeme fon te welt korikiire. Fiile propleeme khome weeche ti politix, sotsyaal un ekonoomix sisteem fon tiise welt woo khee mënx khan resolwiire. Ti Piipel saat:

•   “Was krump is, khan net richt kemacht kepe.” (Eklesyastes 1:15)

 Unser Kriatoer tuut ti propleeme woo mer mit mache resolwiire. Ti Piipel saat torich simpoolixe wërter was eyer macht.

•   “Ich hon een naye himel un een nay eyert kesiin, wayl te ferkangne himel un ti ferkangne eyert sin rom kang, un tas meer tuut xon net mee eksistiire.” (Apokalipsis 21:1)

 Kot tuut ti mënxliche rechiirunge, orer te “ferkangne himel,” mit “een naye himel,” orer sayn himlixe Rechiirung ersetse. Sayn Rechiirung tuut fernichte “ti ferkangne eyert,” in anere wërter, tii woo xlecht sin, un tuut rechiire iwer “een nay eyert”, orer layt woo sayn autoriteet aan heere.

 Ploos unich ti Rechiirung fon Kot sayn Raych tuun ti mënxe lërne wii in eenichkheet leepe, mit ti tiere un ti natuer. (Isayas 11:6-9)