“Uf te kans welt, tuun layt wyolënts keeche ti fraae mache. Tas pasiirt iweraal, soo wii een pantemii. Un es is seer wichtich etwas too triwer mache fer tas xtil hale”, saat ti Welt Kesuntheet Orkanisatsyoon. Tiise orkanisatsyoon rechent tas neekst 30% “fon al te fraae woo ferhayrat waare orer woo xon een xetsye hate, hon fiisix un/orer seksuaal wyolënts mit kemacht”. Un een relatooryum fon te Fereenichte Natsyoone rechent tas in een spetsiifix yoer, uf te kans welt, 137 fraae sin um keprung kep yeete taach fon sayn man orer yemant fon sayn familye. a

 Ti numere helfe uns iwerleye wii xlim ti situatsyoon is. Awer, tii tsayche net wii kroos ti emotsyonaal un fiisix phayn is woo tii woo tas mit mache xpiire.

 Tuust tuu tiise sort wyolënts tehëm mit mache? Orer khënst tuu yemant woo tas mit macht? Wën yaa, kuk mool wii ti Piipel in tiise situatsyoone helfe khan.

  Es is net tayn xult

  Tuu khanst hilef fine

  Kot khimert sich mit tich

  Tas ën fon te wyolënts tehëm

  Wii khanst tuu yemant helfe woo wyolënts tehëm mit macht?

 Ti Piipel saat: “Yeete eene fon uns tuut aprechnunge mit Kot weeche sich selepst mache.” (Romaaner 14:12)

 Eriner tich: Tee woo tich mit wyolënts pehantelt, hot ti xult.

 Wën tayn man tich ti xult kept weeche ti wyolënts woo eyer macht, is eyer kans ferkheert. Ti fraae fertiine liip, net wyolënts. (Koloser 3:19)

 Als mool, is yemant wyolënt wayl sayn ferxtan net kuut traan is, wayl eyer in familye kroos ketsoo is woo se sich naner wyolënt pehantelt hon, orer wayl eyer tsu fiil alkohool trinkt. Noch soo, mus eyer aprechnunge mit Kot mache weeche ti aat woo eyer tich pehantelt. Tee hot aach ti responsapiliteet fer ënerunge in sayn leepe mache un noo lose wyolënt mit tich sin.

 Ti Piipel saat: “Mit fiile aanreeter, kriit ma kuute resultaate.” (Xpriiche 15:22)

 Eriner tich: Wëns tuu weest net was se mache, orer xpiirst tas tuu in kefoer pist, anere khene tich helfe.

 Warom prauchst tuu ti hilef fon te anere? Es is net laycht se wise was se mache wën mer wyolënts tehëm mit mache. Es khan xweyer sin se wise was ti pest ëntxlus is wayl tuu weest net was fon te neekste phunkte wichticher sin:

•   Tayn aychne sicherheet

•   Was peser fer tayn khiner is

•   Tayn ekonoomix situatsyoon

•   Tayn liip noo tayn man

•   Tayn wunx fer ti hayrat rete, wën tayn man sich ënert

 Es is normaal sich konfus un iwerlaat xpiire. Fer weem khanst tuu hilef ferlange?

 Een fraaynt orer parent woos tuu traust. Tiise persoon khan tich praktix un emotsyonaal hilef kepe. Mit yemant xpreche woo sich mit tich khimert, khan tich fiil helfe.

 Hilef telefoone fer layt woo wyolënts tehëm mit mache. Tii khene tich klaych helfe. Tii woo tich antworte wëns tuu tsu tiise numere aan ruufst, khene tich helfe se pleene was se mache fer tich xitse. Wën tayn man erkhënt tas eyer een propleem hot un wil wërklich ënerunge mache, khene tiise numere tëm helfe ti eyerste xrite kepe fer tas hin kriin.

 Anere hilfe wën een emerxëns pasiirt. Tsum payxpiil, toktere un anere aarwayter woo keiipt sin, khene nutslich sin wën tuu prauchst hilef klaych kriin.

 Ti Piipel saat: “Yeehoowa b is ticht pay tëne woo een ferprochne hërts hon, eyer ret tii woo een fertriktne kayst hon.” (Psalm 34:18)

 Eriner tich: Kot ferxprecht tas eyer tich helfe tuut.

 Yeehoowa khimert sich mit tich aarich fiil. (1^te Pheeter 5:7) Tee ferxteet tayn tiifste xpiirunge un ketanke. Tee khan tich treeste torich Sayn Wort, ti Piipel. Un tee laat tich in tsu tëm peete. Wëns tuu tsu tëm peete tuust, khanst tuu ti neetich kluucheet un kraft ferlange fer mit te situatsyoon um keen. (Isayas 41:10)

 Ti Piipel saat: “Tii tuun sich uner sayn traupe kriste un sayn fayche paam setse un nimant tuut tëne angst mache.” (Mikeyas 4:4)

 Eriner tich: Ti Piipel ferxprecht tas klaych, tuun ale sich in friit tehëm xpiire.

 Yeehoowa Kot is te eensiche woo khan al ti propleeme woo mer mit mache fer imer resolwiire. Ti Piipel ferxprecht: “Tee tuut yeete treene fon tëne sayn aue ap trokne, un es kept kheen toot mee, kheen traurichkheet, kheen krayxe un kheen phayn.” (Apokalipsis 21:4) In tiise tsayt, tuun mer uns net mee erinere fon te xlechte tinge woo pasiirt sin. Ploos ti kuute erinerunge tuun plaype. (Isayas 65:17) Tas is te friitliche futuer woo ti Piipel fer tich ferxprecht.