Als Yeehoowa sayn Tsayer, xtrenge mer uns aan tas ti familye eenich sole sin, unser un aach ti anere sayn. Meyer tuun Kot, te Kriatoer fon te familye, respëktiire. (Xeenesis 2:21-24; Ëfeser 3:14, 15) Torich ti Piipel, kep tee uns inlërnunge woo xon fiil layt in te kans welt keholef hon een kuut un froo hayrat hon.

 Meyer xtrenge uns aan fer piiplixe aanreete aan wëne, wayl tas helft uns een pesere man, fraa orer eltere sin. (Xpriiche 31:10-31; Ëfeser 5:22–6:4; 1 Timoteus 5:8) Ti kluucheet woo ma in te Piipel fint, khan soo kaar helfe in te familye woo se net al te selwiche klaape hon. (1 Pheeter 3:1, 2) Kuk was etliche layt kesaat hon wii iire man orer fraa Yeehoowa sayn Tsayer kewoer sin:

•   “Ti eyerste seks yoore fon unser hayrat waare fol mit xtrayt un mer waare net tsufriite. Noo tëm woo Ivete een Yeehoowa sayn Tsayer kewoer is, is se ketultiche un liipliche kewoer. Ti ënerunge woo se kemacht hot, hot unser hayrat keret.” — Clauir, fom Brasil.

•   “Ich waar too keeche wii Chansa, mayne man, aan kefang hot ti Piipel xtutiire mit Yeehoowa sayn Tsayer, wayl ich hon imer ketenkt tas tii teete ti familye aus naner mache. Awer yets siin ich tas ti Piipel wërklich unser hayrat keholef hot.” — Agness, fom Sampya.

 In unser preetich aarwayt, tsayche mer wii aan wëne was ti Piipel saat uns helfe khan, soo wii:

•   Te richtiche persoon raus suuche fer hayrate

•   Kuut tas eyerste yoer fon te hayrat torich khome

•   Mit ti xwiicher eltere um keen

•   Mim kelt um keen

•   Noo lose tsu xtrayte

•   Lërne fertsaye

•   Ti khiner in lërne

 Als mool, khan tas pasiire. Tsum payxpiil, in 1998, te unersuuchung institut Sofres hot hayrate, woo ploos eene fom pheyerche Yeehoowa sayn Tsayer kewoer is, analisiirt. Ti unersuuchung hot ketsaycht tas in yeete tswansich hayrate, ploos een hot xlime propleeme mit kemacht.

 Yeesus hot in foer raus kesaat tas tii woo sayn inlërnunge in hale teete, khente als mool opositsyoon in te familye hon. (Matheus 10:32-36) Te kexicht unersuucher, Wiil Durant hot peopacht tas in te tsayt fom Romaanix Raych, “te kristyanismus hot te xult kriit fer familye aus naner mache” a. Hayt se taach, wëre aach etliche fon Yeehoowa sayn tsayer soo pexulticht. Awer hot wërklich tee, woo Yeehoowa sayn Tsayer wërt, ti xult?

 Wii Yeehoowa sayn Tsayer sin aan kep woer tas se ti familye aus naner mache teete, hot tas Europeeyxe Kericht fon Mënxliche Rechte kesaat tas ti anere in te familye woo net Yeehoowa sayn Tsayer sin, oft mool xtrayt aan fange wayl se net “aan nëme un respëktiire tas recht woo iire ferwanter hot fer iwich sayne klaape xpreche un aan wëne”. Tas Kericht hot noch kesaat: “Tas pasiirt in te kanse hayrate woo eene fom pheyerche tsu een anere klaape keheert, un Yeehoowa sayn Tsayer sin net ti eensiche.” b Awer, opwool wën se um keen mit tëne woo keeche iire klaape sin, tuun Yeehoowa sayn Tsayer sich hale am piiplix aanreet: “Tuut net xlechtes mit xlechtes fer nimant tsurik petsaale. . . . Wëns meechlich is, soo wayt wii tas fon aych ap hëngt, sayt friitlich mit ale kaar.” — Romaaner 12:17, 18.

 Yeehoowa sayn Tsayer hale in ti piiplix inlërnung fer “ploos im Hër” hayrate, tas is, hayrate mit yemant woo te selwiche klaape hot. (1 Korinter 7:39) Tiise kesets khomt fon te Piipel un is praktix. Tsum payxpiil, een artikel fon te tsaytung Journal of Marriage and Family fon 2010 saat tas “pheyerche woo man un fraa tsu ti selwich relichyoon keheere un tuun ti selwich inlërnung fom klaape aan wëne” tuun sich peser mit samer kepe. c

 Awer, Yeehoowa sayn Tsayer tuun net yemant uf muute fer sayn man orer fraa woo net Yeehoowa sayn Tsayer is lose. Ti Piipel saat: “Wën eene pruuter een fraa hot woo unklaapich is, un tii wil mit tëm plaype, tan sol tee se net lose; un wën een fraa eene man hot woo unklaapich is, un tee wil mit tëne plaype, tan sol se te man net lose.” (1 Korinter 7:12, 13) Yeehoowa sayn Tsayer respektiire tiise kesets.