•  Wii tuun Yeehoowa sayn Tsayer ëntxlise ep se een fayertaach fayre orer net?

•  Tuun Yeehoowa sayn Tsayer iire ferwanter liipe, opwool se net etliche fayertaache mit tëne fayre?

•  Tuun Yeehoowa sayn Tsayer anere tswinge net etliche fayertaache fayre?

 Ep een fayertaach fayre orer net, tuun Yeehoowa sayn Tsayer ti Piipel unersuuche. Wën es taytlich is tas te fayertaach orer fest net ti piiplixe inlërnunge respektiirt, tuun Yeehoowa sayn Tsayer net te taach fayre. In anere fayertaache, mus yeete krist sayn aychne ëntxlus mache, un sich aan xtrenge “fer een sauwer kewise foer Kot un foer ti mënxe hale.” — Aphostele sayn Kexicht 24:16.

 Ep se ëntxlise op se te fayertaach fayre orer net, tuun Yeehoowa sayn Tsayer iwich etliche frooche triwer noo tenke. a

•   Xtaypt te fayertaach sich aan een inlërnung woo net in te Piipel xteet?

   Piiplix inlërnung: “‘Keet aus te mite fon tëne raus un halt aych fon tat wech’, saat Yeehoowa, ‘un lost noo unrayne tings aan se krayfe’.” — 2^te Korinter 6:15-17.

   Fer wayt wech plaype fon unrayn kaystliche inlërnunge, tas wil saan, was keeche ti Piipel keet, tuun Yeehoowa sayn Tsayer net fayertaache fayre woo ti neekste karakteriistike hon.

   Fayertaache woo sich xtaype aan te klaape aan anere keete orer tëne aan peete. Yeesus saat: “Tuu solst Yeehoowa tayn Kot aan peete un ploos fer tee solst tuu hayliche tiinst kepe.” (Matheus 4:10) Noo tiise aanreet, tuun Yeehoowa sayn Tsayer net ti Waynachte, ti Ostre orer te Eyerste Maay fayre, b wayl tiise fayertaache khome heyer fon te aanpeetung fon falxe keete. Tii tuun aach khee teel mache in ti neekste fayertaache:

  •  Kwanzaa. Noo ti Xwartse Xtuutyum Ensiklopëtya, c te naame Kwanzaa “khomt fon te wërter in xprooch swahili matunda ya kwanza, woo petayte ‘eyerste frichte’, un [tas] tsaycht tas te fayertaach heyer khomt fon te eyerste feste fon te ërntung woo uf kexrip sin ins afrikaanix kexicht”. Opwool etliche net te Kwanzaa wii eene relichyeese fayertaach siin, tuut ti Afrikanix Relichyoon Ensiklopëtya d tee ferklayche mit een afrikaanix festiwaal woo ti eyerste frichte “keopfert sin fer ti keete un ti foerkhome wii een aat fer petanklich sin”, un saat aach: “Is te selwiche kayst fon petanklichkheet fer ti seechen fons leepe woo ti foerkhome kepe woo aach in te fayertaach afro-amerikanix Kwanzaa is.”

  •  Festiwaal fon te Moont orer Festiwaal fon te Mite Hërpst. Tëm noo tas Wërterpuuch fon Fayertaache, Festiwaale un Feste fon te Welt e tas is een “festiwaal woo ti keetin Moont loopt”. Too is tepay een rituaal “woo ti fraae fons haus sich pike foer ti keetin, woo in xineesich keruuft wërt kowtow [een aakt fon respekt]” — Relichyoone fon te Welt—Komplët Ensiklopëtya fon Klaape un Praktike. f

  •  Noruz (Nowruz). “Te aanfang fon tiise festiwaal khomt fon te soroastrismus [relichyoon]; tas is eene fon te haylichste taach fon soroastriano kalënter. . . . In spetsyaal, te Kayst fon Mitaach, kekhënt wii Rapithwin, woo is ketswung runer unich te pootem kenom fon te Kayst fon Winter torich ti khalte moonate, wërt tsurik uf kenom mit feste mitaachs aan te taach fon Noruz, tëm noo ti soroastriana tratitsyoon.” — Unesco. g

  •  Festiwaal fon Yalda (Shab-e Yalda). Tëm noo tas puuch Sufismus in tas Kehaym Përsix Kexicht, h tiise fest is te aanfang fon te taach fon winter (ti lengst nacht fons yoer) hot “taytlich se tuun mit ti aanpeetung fon Mitra”, te kot fons licht. Etliche klaape aach tas tiise fayertaach hot se tuun mit te aanpeetung fon te romaanixe un kreekixe keeter fon te Sun. i

  •  Ërnte Tanke Fest  (Dia de Ação de Graças). Soo wii te Kwanzaa, hot tiise fayertaach aan kefang in ti friirixe feste fon ërntung woo fiile keeter eere kep hon. Mit te tsayt, “sin tiise  friirixe folks tratitsyoone tsu ti kristliche relichioone aan kenom woer”. —Een Kroos un Keetlich Awentuer —Ti Reesenter un tas Kexicht fon te Eyerste Taach fon Ërnte Tanke Fest. j

   Fayertaache woo sich xtaype aan awerklaape orer aan klik. Ti Piipel saat tas tii “woo te tix in richte tuun fer te kot fom klik” sin “tii woo Yeehoowa im xtich kelos hon”. (Isayas 65:11) Tes weeche, tuun Yeehoowa sayn Tsayer net ti neekste fayertaache fayre:

  •  Ivan Kupala. “Tëm noo te klaape fon tas folk, torich [te Ivan Kupala] maxike krefte khome fon te natuer un wën ti persoon koraajich is un klik hot khan eyer een pisye fon tiise krefte kriin”, saat tas puuch Ales iwer Pelarus. k Am aanfang, waar tiise ewënt net kristlich un hon se te lengste taach fons yoer kefayert.  Awer tëm noo ti Ensiklopëtya fon Kontemporaanix Rusix Kultuer l, is tiise fayertaach “kemixt woer mit een fayertaach fon te khërich [te “taach fon te hayliche” Yoohan te Taafer] noo [tii woo net kriste waare] te kristianismus an kenom hon”.

  •  Moont Nay Yoer (Xineesix Nay Yoer orer Koreaanix Nay Yoer). Tëm noo tas puuch Khuucher fon te Moont un fon te Ferhungerte Kayste: Xineesix Festiwaale a, “hauptseechlich in tiise tsayt fons yoer, mache ti familye, fraaynte un ferwanter sich mee ketanke mit klik kriin, ti keete un ti kayste eere un winxe tas tas nay yoer klik pringt”. In te selwich aat, in tas Koreaanix Nay Yoer, “tuun se ti foerkhome aan peete, mache rituaale fer ti xlechte kayste wech xafe, tuun klik karantiire fer tas nay yoer un tuun roote was tas nay yoer ferxprecht”. — Ensiklopëtya fon te Nay Yoer Feste in te Kans Welt. b

   Fayertaache woo sich xtaype aan ti inlërnung tas ti seel net xtërpe tuut. Ti Piipel tsaycht kans taytlich tas ti seel xtërpt. (Esekyël 18:4) Tes weeche, tuun Yeehoowa sayn Tsayer net ti fayertaache woo too uner xteen fayre wayl se tsu tuun hon mit te itee fon een unxtërplich seel:

  •  Taach fon ale seele (Taach fon te toote). Tëm noo ti Nay Katoolix Ensiklopëtya c, tas is een taach fer se “tenke aan ale tii woo xon kextorep sin”. Tas puuch saat aach tas “torich ti kanse Mitel Yoore was keweenlich klaape tas in tiise taach, ti seele woo in purkatorium sin khënte foer khome als een kayst, heks, krot, usw., foer tii woo se in een unkerecht aat pehantelt hon wii se keleept hon”.

  •  Festiwaal Qingming (Ching Ming) un Festiwaal fon te Ferhungerte Kayste. Tiise tswaay festiwaale sin fer ti foerkhome eere kepe. Torich te Qingming, “wërt ese, ketrenkt un kelt ferprent fer karantiire tas ti toote khee hunger un torst xpiire un net oone kelt plaype”, saat tas puuch Feste fon te Leepe Kewoonheete in te Kans Welt — Fon Nëneche Feste pis Peërtichunge. d Tas puuch saat noch tas “torich te Moonat fon te Ferhungerte Kayste, in te nacht fon fol moont, [tuun se klaape] tas es een kroos ferpinung kept tswixich ti lepentiche un ti toote, fiil mee wii in een aner nacht. Tes weeche is es wichtich te friit mit ti toote hale, un aach eere fer ti foerkhome kepe”.

  •  Chuseok. Tas puuch Ti Koreaanix Tratitsyoon fon Relichyoon, Kemaynxaft un Moraale Reekele e saat tas in tiise festiwaal sin tepay “opfere fon ese un wayn fer ti seele fon te toote”. Ti opfere tsayche “te klaape tas ti seel iwerleept te toot fom khërper”.

   Fayertaache woo tsu tuun hon mit okultismus. Ti Piipel saat tas yemant “woos futuer in foer raus saat, hëkseray traypt orer eene woo tsayche aus leet orer eene hëkser, yemant woo ti anere ferhëkst, orer yemant woo kayster aan ruuft, orer eene woo roote tuut, orer yemant woo mit ti toote xprëcht. . . is fer Yeehoowa apxaylich”. (Teuteronoomyum 18:10-12) Un soo, fer wayt wech plaype fon tinge woo tsu tuun hon mit okultismus, tepay ti astroloxii, woo een aat fer se roote is, tuun Yeehoowa sayn Tsayer net te Halloween un aach net ti neekste fayertaache fayre:

  •  Tamil un Singaleesix Nay Yoer. “Ti tratitsyonaal rituaale woo tsu tuun hon mit tiise ewënt. . . . sin etliche aktiwiteete praktisiire in spetsiifixe tsayte fon te astroloxii fer klik pringe.” — Sri Lanka Ensiklopëtya. f

  •  Songkran (Taylantix Nay Yoer). Te naame fon tiise asiaatix  festiwaal “khomt fon een sanskrit wort woo petayt ‘mowiment’ orer ‘ënerung’, un [tiise festiwaal] tsaycht te mowiment fon te sun torich tier krays konstelatsyoon fon Aaryes”. — Esmitel, Panket un Klaape — Ensiklopëtya fon Esmitel Kultuer in Relichyoone fon te Kans Welt. g

   Feste woo teel sin fon tas Mosayxe Kesets, woo am ën khom is mit Yeesus sayn opfer. Ti Piipel saat: “Kristus is tas ën fom Kesëts.” (Romaaner 10:4) Ti funtamente fon tas Mosayxe Kesets woo fer te friirix Israël kep woer is tuun noch nutse pringe fer ti kriste. Awer tii tuun net ti feste fon tiise Kesets fayre, hauptseechlich ti woo tsu tuun hon mit te tsayt woo te Mesias tsum foer xayn khom is, wayl ti kriste klaape tas tee xon khom is. Ti Piipel saat: “Tas ales is een xate fon was khome teet, awer ti wërklichkheet keheert tëm Kristus.” (Koloser 2:17) Tes weeche un aach wayl etliche fon tiise feste  kewoonheete tepay ketuun hon woo keeche ti Piipel sin, mache Yeehoowa sayn Tsayer khee teel in te neekste feste:

  •  Hanuká. Tiise fest fayert ti tsweet tetikatsyoon fon te yiitixe tempel in Yeruusalem. Awer ti Piipel saat tas Yeesus te Heechste Priister kewoer is fon “een kreeser un perfekter tapernakel woo net fon mënxliche hënt kemacht kep is, tas is, net fon tiise kriatsyoon.” (Hepreeyer 9:11) Fer ti kriste, tiise kaystlich tempel hot te fiisix tempel in Yeruusalem ersetst.

  •  Rosh Hashaná (Yiitix Nay Yoer). Tas is te eyerste taach fon tas yiitix yoer. In te friirixe tsayte, waare spetsyaale opfere fer Kot kep in tiise fest. (Nuumere 29:1-6) Awer, Yeesus Kristus, als te Mesias, “pringt ti ese opfer tsum ën”. Tes weeche, tuut Kot tiise opfer nii mee aan nëme. — Tanyël 9:26, 27.

•   Tuut te fayertaach te ekumenismus uf muute?

   Piiplix inlërnung: “Was hot tee woo klaape hot eenlich mit tee woo khee klaape hot? Un was fer eenichkheet kepts tswixich Kot sayn tempel un ti itole?” — 2^te Korinter 6:15-17.

   Yeehoowa sayn Tsayer tuun sich aan xtrenge fer in friit leepe mit sayn nochpere un respektiire ti recht woo yeete persoon hot fer sayn klaape raus suuche. Awer tii mache khee teel in feste woo te ekumenismus uf muut, soo wii ti payxpiile woo khome uns tsayche.

   Feste woo een relichyeese fiirer eert orer ewënte woo ti eenichkheet in te aanpeetung uf muut tswixich persoone fon unerxiitliche relichyoone. In te friirixe tsayte, wii Kot sayn folek tsu een lant kenom hot woo ti layt anere relichyoone hate, hot eyer fer tëne kesaat: “Mach khee pakt mit tëne un aach net mit iire keeter. . . . Wëns tuu tëne iire keeter tiinst, tas weyer sicher een faal fer tich.” (Eeksotus 23:32,33) Tes weeche tuun Yeehoowa sayn Tsayer khee teel mache in te neekste fayertaache:

  •  Loi Krathong. Torich tiise taylantix fest “tuun ti layt xisle fon pleter mache, khërtse un insëns rin tuun un nochter ufm waser tuun. Tii klaape tas ti xisle khene ti phech fat nëme. In woerheet, tiise fest tuut ti hayliche xpuure fayre woo Buda kelos hot”. — Putismus Ensiklopëtya. h

  •  Natsyonaal Taach fer sich Peroye. Een mitkliit fon te rechiirung saat in een tsaytung i fon Papuua Nay Kinë tas ti layt woo teel mache in tiise ewënt “xtime mit ti funtamente fon te kristliche klaape”. Eyer saat tas te Natsyonaal Taach fer sich Peroye khan “te kristliche printsiipye” uf muute.

  •  Vesak. “Tas is te haylichste taach fon Putismus un fayert Buda sayn keporstaach, taytlich ferxtëntnis un toot, orer wii eyer tsum Nirwana khom is.” — Wërterpuuch fon Fayertaache, Festiwaale un Feste fon te Welt.

   Feste woo sich aan relichyeese tratitsyoone xtaype woo ti Piipel net in lërnt. Yeesus hot fer ti relichyeese fiirer kesaat: “Weeche ayre tratitsyoone, macht teyer tas Kot sayn wort niks kilt.” Eyer saat noch tas tëne iire aanpeetung khee weyert hot wayl se ti “mënxe sayn reekele wii kesetse” in lërne. (Matheus 15:6, 9) Yeehoowa sayn Tsayer tuun tiise aanreet ërnst nëme un mache khee teel in fiile relichyeese ewënte, tsum payxpiil:

  •  Epifania (Timkat, Kheenichs Taach orer Los Reyes Magos). Tiise fest khan te pesuuch woo ti astrooloker fer Yeesus kemacht hon un soo kaar sayn taaf fayre. In tas fest, “sin etliche friilings feste woo net kristlich waare kristyanisiirt kep un woo ti keete fon waser xtroome, fluse un pache eere kep hon”. (Waynachts Ensiklopëtya) j Te Timkat, een festiwaal woo tsu tuun hot mit tiise fest, “hot tiife wortsle in tratitsyoon”. — Ensiklopëtya fon te Friirix Welt Kemaynxaft un Kultuer. k

  •  Fest fon Maria Himelfaart. Tiise fest fayert ti itee tas Yeesus sayn muter tsum himel kang is in sayn fiisix khërper. “Tiise itee hon ti eyerste kriste net kekhënt un iwich tas xteet niks in te Xrifte”, saat tas puuch Relichyoon un Kemaynxaft — Funtamentalismus Ensiklopëtya. l

  •  Fest fon te Unpeflekte Conceição. “Te Unpeflekte Conceição [fon Maria] tuut net taytlich tsum foer xayn khome in te Xrifte . . . Tas is een inlërnung fon te Khërich.” — Nay Katoolix Ensiklopëtya.

  •  Faste Tsayt. Noo ti Nay Katoolix Ensiklopëtya, tiise tsayt fon puus un faste hot aan kefang “in fierte yoer hunert”, mee wii 200 yoer noo ti Piipel kexrip woer is. Iwich te eyerste taach fon te Faste Tsayt, tuut ti selwich ensiklopëtyia saan: “Ti troye tuun ex kriin im Axe Mitwoch un tas is een uniwersaal kewoonheet tsayt te Synode fon Benevento, in 1091.”

  •  Meskel. Etyoopixe festiwaal woo fayert “ti raus finung fon tas Woere Krayts (tas krayts woo Kristus aan kenachelt waar), too hon se fayer aan kemacht un um rom ketanst”, saat ti Ensiklopëtya fon te Kemaynxaft un Kultuer in te Welt torich ti Mitel Yoore (ti parenthese sin tëne). a Awer, Yeehoowa sayn Tsayer tuun net tas krayts in iire aanpeetung penutse.

•   Tuut te fayertaach een mënx, een orkanisatsyoon orer een natsyonaal simpol eere?

   Piiplix inlërnung: “Soo saat Yeehoowa: ‘Ferfluucht is te man woo sayn fertraung uf ti mënxe setst, woo sich uf ti mënxe sayn kraft ferlost, un woo sayn hërts fon Yeehoowa ap lënkt.’” — Yeeremias 17:5.

   Opwool Yeehoowa sayn Tsayer weyert fer iire neekste kepe un soo kaar fer tëne peete, tuun se net ti ewënte orer feste woo too uner xteen fayre:

   Fayertaache woo fer een rechiirente orer een anere wichtich persoon eere kepe. Ti Piipel saat: “Fer ayre aychne interese lost noo se traue uf te mënx woo niks mee is wii tas ochtem fon leepe in sayn naas. Was is eyer weyert?” (Isayas 2:22) Soo, tuun Yeehoowa sayn Tsayer tsum payxpiil, net te keportstaach fon een kheenich orer een kheenichin fayre.

   Feste fon te natsyonaal faan. Yeehoowa sayn Tsayer tuun net te Taach fon te Faan fayre. Warom? Wayl ti Piipel saat: “Halt aych wech fon te itole.” (1^te Yoohan 5:21) Etliche layt tuun net mëne tas ti faan een itol is, orer etwas fer aan peete, awer te historyatoer Carlton J. H. Hayes hot kexrip tas, in natsyonalismus, “te haupst simpol fon klaape un te wichtichste opjëkt fon aanpeetung is ti faan”.

   Fayertaache orer feste woo een hayliche eere. Was is pasiirt wii een man woo aan Kot klaape hat sich kepikt hot foer te aphostel Pheeter? Ti Piipel saal: “Awer Pheeter hot tëm uf kehoopt un saat: ‘Xtay uf! Ich selepst sin aach eene mënx.’” (Aphostele sayn Kexicht 10:25,26) Soo wii Pheeter un ti anere aphostele net aan kenom hon spetsyaal eere kriin orer keloopt wëre, tuun Yeehoowa sayn Tsayer khee teel mache in ewënte woo eere kepe fer layt woo erkhënt sin als hayliche, wii tsum payxpiil:

  •  Taach fon Ale Hayliche. “Een fest woo al ti hayliche eere kriin . . . Wii tiise fest aan kefang hot is unsicher.” — Nay Katoolix Ensiklopëtya.

  •  Fest fon Liip Fraa fon Guadalupe. Tiise festiwaal kept eere fer ti “haylich xitsung fon Mëksiko”, woo etliche klaape tas tii Maria (Yeesus sayn muter) is. Es is pekhant tas se in een wunerlich aat tsum foer xayn khom is tsu een pauer in 1531. — Greenwood Ensiklopëtya fon te Lataynix Literatuer. b

  •  Taach fon Naame (Onomastike Taach). “Te taach fon naame is tas fest fon te hayliche woo naame kept fer een khint in sayn taaf orer sayn fermung”, saat tas puuch Feste fon te Leepe Kewoonheete in te Kans Welt — Fon Nëneche Feste pis Peërtichunge. Tas puuch saat aach tas tiise taach “fiil tsu tuun hot mit relichyeese saache”.

   Feste woo tsu tuun hon mit politixe orer sotsyaale mowimënte. Ti Piipel saat: “Es is peser xuts pay Yeehoowa suuche, als uf te mënxe traue.” (Psalm 118:8, 9) Yeehoowa sayn Tsayer mache khee teel in te feste in te Taach fon te Fraa un Taach fon te Yungheet, woo politixe un sotsyaale kampanya xtitse. Tii klaape tas ploos Kot khan ti propleeme fon te mënxheet resolwiire, net ti mënxe. Weeche ti selwich uersaach tuun Yeehoowa sayn Tsayer aach khee teel mache in te Taach fon Ën fon Sklaaweray orer soo sorte feste. Xtats tas, tuun se klaape tas ploos Kot sayn Raych khan een ën pringe fer propleeme soo wii rasismus un unklaycheet. — Romaaner 2:11; 8:21.

•   Macht te fayertaach een natsyoon orer een ëtnix krup kreeser wii te anere?

   Piiplix inlërnung: “Kot hoolt khee sayt, awer, in yeete natsyoon, tee nëmt aan weer tiif respekt tsu tëm hot un macht was richtich is.” — Aphostele sayn Kexicht 10:34, 35.

   Fiile Yeehoowa sayn Tsayer liipe iire haymat lant, awer mache khee teel in feste woo eere kepe fer een natsyoon orer ëtnix krup, soo wii ti neekste woo khome.

   Ewënte woo eere kepe fer tas militeer. Xtats kriich uf hetse, hot Yeesus fer sayn nookeener kesaat: “Tuut wayter ayer faynte liipe un peet fer tii woo aych yachte tuun.” (Matheus 5:44) Soo, tuun Yeehoowa sayn Tsayer khee teel mache in feste woo soltaate eere, tepay sin ti fayertaache woo too uner xteen:

  •  Taach fon Anzac. “Tas wort ‘Anzac’ petayt Austraalya un Nay Seelant militeer” c, un “te Taach fon Anzac is mit te tsayt een taach kewoer fer sich erinere fon ti woo kextorep sin in khampf”. — Historix Wërterpuuch fon Austraalya. d

  •  Taach fon te Weteraane  (Remembrance Day orer Memorial Day). Tiise fayertaache kepe eere fer ti “weteraane fons militeer un ti woo kextorep sin in te kriiche fons lant.” — Pritaanix Ensiklopëtya. e

   Feste fon tas kexicht orer unaphëngichkheet fon een natsyoon. Yeesus saat iwich sayn nookeener: “Tii sin khee teel fon te welt, soo wii ich khee teel fon te welt sin.” (Yoohan 17:16) Opwool Yeehoowa sayn Tsayer kërn lërne iwich tas kexicht fon een natsyoon, tuun se net teel mache in te neekste ewënte:

  •  Taach fon Austraalya. Tëm noo ti Worldmark Ensiklopëtya fon Kultuure un Taachlich Leepe f, tiise fayertaach fayert “te taach, ins yoer 1788, woo ti ënglixe soltaate ti faan kehoopt hon un Austraalya wii een nay lant fer se woone aus kexproch hon”.

  •  Taach fon Guy Fawkes. Is te “natsyonaal taach fer fayre un erinere wën Guy Fawkes un anere katoolixe fersuucht hon fer te kheenich Jaime I un ti mitkliiter fon te Ënglix Parlament um pringe in 1605, awer tas hot net pariirt”. — Wërterpuuch fon Ënglix Folkloer. g

  •  Taach fon Unaphëngichkheet. In fiile pletse tas is te taach woo een natsyoon fayert te keportstaach fon sayn intepentëns fon aner lant.

•   Tuut te fayertaach een ausferxeemt un imoraal aanxtelung uf muute?

   Piiplix inlërnung: “Teyer hot xon lang kenuuch ti natsyoone sayn wile kemacht, wii teyer aych aan kextelt hot oone xaam, unferxtëntich, un pesof wëre, ausferxeemte fëste, sauferay un falxe un ferpoote aanpeetung.” — 1^te Pheeter 4:3.

   Noo tiise piiplix inlërnung, tuun Yeehoowa sayn Tsayer net teel mache in ausferxeemte feste un woo tsu fiil ketrenkt is. Awer tii tuun sich kërn mit fraaynte samele. In tiise ewënte tuun se ëntxlise ep se alkohool mit moos trinke orer net. Yeehoowa sayn Tsayer tuun sich imer fiil aan xtrenge fer ti piiplix aanreet aan heere: “Ekaal op iir est, trinkt, orer sonst etwas macht, macht ales fer Kot sayn hërlichkheet.” — 1^te Korinter 10:31.

   Tes weeche, tuun Yeehoowa sayn Tsayer khee teel mache in karnewal un eenliche festiwaale woo imoraal aanxtelung uf muute un woo ti Piipel net erlaupt. Tepay is te yiitix festiwaal fon Purim h. In woerheet, tiise fest erinert ti pefrayung fon te yuuter in finefte yoer hunert foer Kristus. Awer hayt khan te Purim “in een aat pexrip sin wii tas yiitix wersyoon fon Mardi Gras orer Karnewal”, saat tas puuch Nootwëniche Yutaismus. i In tiise feste tuun ti layt “kostiim penutse (ofts tuun mener sich aan tsiie wii fraae), hon ausferxeemte aanxtelung, is sauferay un fiil ratau”.

 Yaa. Ti Piipel lërnt in tas ti layt sole iire familye liipe un respektiire, ekaal ti relichyoon woo se hon. (1^te Pheeter 3:1, 2, 7) Natiirlich, wën een Yeehoowa sayn Tsayer nii mee teel macht in welche feste, khene etliche ferwanter sich ëriche, pelaytich wëre orer sich hiner kang xpiire. Tes weeche, fiile Yeehoowa sayn Tsayer tuun liiplich fer iire ferwanter aus leye warom se net mee etliche fayertaache fayre. Tii tuun iire ferwanter pesuuche in anere momënte.

 Nee. Tii klaape tas yeete persoon mus sayn aychne ëntxlus mache. (Yosuee 24:15) Yeehoowa sayn Tsayer tuun “ale sorte mënxe” respektiire, ekaal aan was se klaape. — 1^te Pheeter 2:17.