Nee. Kans anerste. Wën mer raus kriin tas was mer keklaapt hon net mit te Piipel xtimt, tuun meyer uns ënere.

 Fiile yoore eente wii mer ti Nay Welt Iwersetsung in 1950 protutsiirt hon, hon mer xon ti Piipel unersuucht. Meyer hon ti iwersetsunge penutst woos in te tsayt kep hot un tëm noo was mer keleest hon, hon mer unser klaape aan kephast. Kuk etliche friirixe inlërnunge fon Yeehoowa sayn Tsayer un mërk op se wërklich mit te Piipel xtime.

1.   Was mer klaape: Es kept khee Triniteet. Te Zion’s Watch Tower (A Torre de Vigia de Sião) fon yuuli 1882 hot kesaat: “Wën mer aan Yeehoowa un aan Yeesus un aan te hayliche kayst klaape, khene mer net aan nëme ti inlërnung tas es tray keeter in een persoon orer een kot in tray persoone kept. Tiise inlërnung xtaypt sich kaar net uf ti Piipel.”

     Was ti Piipel saat: “Yeehoowa, unser Kot, is te eensiche Kot.” (Teuteronoomyum 6:4, Versão Brasileira in portukeesix) “Fer uns kepts ploos een Kot, te Fater, fon weem ales khomt un fer weem mer eksistiire; un ploos een Hër, Yeesus Kristus, torich weem sin ale tinge kemacht, un meyer aach, torich tëm.” (1 Korinter 8:6, Almeida Revista e Atualizada in portukeesix) Yeesus selepst hot kesaat: “Te Fater is kreeser wii ich.” (Yoohan 14:28, Almeida Revista e Atualizada in portukeesix)

2.   Was mer klaape: Es kept khee eewich kweeleray in een fayer hel. Te Zion’s Watch Tower (A Torre de Vigia de Sião) fon yuuni 1882 hot een artikel woo Romaaner 6:23 fon te King James Version (Versão Rei Jaime) tsitiirt hot, mim theema “Te loon fon te sint is te toot”. Te artikel hot kesaat: “Tiise ausleyung is soo taytlich un aynfach. Es is soo xpasich tas soo fiile layt woo saan tas ti Piipel Kot sayn Wort is, tuun wayter keeche tiise positiiw ausleyung keen. Tii saan un klaape tas ti Piipel in lërnt tas te loon fon te sint eewiches leepe in kweeleray is.”

     Was ti Piipel saat: “Ti seel woo sint, tuut xtërpe.” (Esekyël 18:4, 20, Almeida Revista e Atualizada in portukeesix) Ti xlus xtroof fer Kot sayn faynte is net ti eewich kweeleray, awer ti “eewich fernichtung”. (2 Thesalooniker 1:9, Almeida Revista e Atualizada in portukeesix)

3.   Was mer klaape: Kot sayn Raych is een reaal rechiirung, un net een kontitsyoon fom hërts. Te Zion’s Watch Tower (A Torre de Vigia de Sião) fon teetsemper 1881 hot iwer Kot sayn Raych soo kesaat: “Ti inxtelung fon tiise raych tuut sicher ti fernichtung fon te kanse rechiirunge fon te Eyert petayte.”

     Was ti Piipel saat: “In te taache fon tiise kheeniche tuut te Kot fom himel een raych in setse woo nii fernicht wërt; tiise raych wërt net fer een aner folek wayter kep; es tuut ale tiise rayche ferprokle un tsum ën pringe; awer tas raych tuut fer imer plaype.” (Tanyël 2:44, Almeida Revista e Atualizada in portukeesix)

 Nee, wayl mer tuun imer noch anere iwersetsunge fon te Piipel in unser preetich aarwayt penutse. In unser prokram fer umsonst Piipel xtuutye mache, tuun mer aach een Piipel fon te Nay Welt Iwersetsung kepe fer weer wil hon, awer mer tuun aach kërn mit yemant xtutiire woo tuut liiper anere iwersetsunge penutse.