Yeehoowa sayn Tsayer fayre net keportstaache wayl se klaape tas Kot tas aan siit wii etwas ferkheertes. Is woer tas ti Piipel net austriiklich ferpoot keportstaache fayre, awer tii pringt phunkte woo uns helfe ferxteen wii Kot tas aan siit. Wole mer yets fier fon tiise phunkte unersuuche un siin was ti Piipel too triwer saat.

1.   Keportstaach fayre khom fon falxe relichyeese klaape. Soo wiis xteet im puuch Funk & Wagnalls Standard Dictionary of Folklore, Mythology, and Legend, (Xtantart Wërterpuuch fon Folkloore, Mitoloxii un Reetsle, fon Funk un Wagnalls) tiise fëst hot aan kefang wayl ti layt keklaap hon tas wën yemant sayne keporststaach weyer, “hëte ti kayste ti keleechenheet fer etwas xlechtes keeche te persoon mache” un wën “ti fraaynte pay tëm weyere un teete tëm ‘klik winxe’ teet helfe tee xitse”. Tas puuch The Lore of Birthdays (Ti Kexicht fon te Keportstaache) saat tas friier kenau wise te taach woo te mënx kepoer waar, waar etwas “neetiches fer een horóscopo xraype woo sich hale teet aan ti mistixe syens fon astroloxii”. Tas puuch saat aach tas “fiil klaape tas ti khërtse fom keporststaach te maxik kraft hon fer winxe erfiile”.

    Ti Piipel saat tas es ferkheert is maxii, tsukhunft roote, spiritismus orer soo sorte tings penutse. (Teuteronoomyum 18:14; Kalater 5:19-21) Een motiiw woo kemacht hot tas Yeehoowa ti friirix xtat Papiloon kextrooft hot, waar wayl iire pewooner astroloxii, een aat fer te tsukhunft in foer raus roote, pratikiirt hon. (Isayas 47:11-15) Yeehoowa sayn Tsayer tuun net uner suuche fon woo yeete tratitsyoon heyer khom; awer wën ti Piipel austriiklich oryentiirunge kept iwich etwas, wii spiritismus, tan nëme se tas aan.

2.   Ti eyerste kriste hon net keportstaache kefayert. The World Book Encyclopedia (Tas Welts Puuch Ensiklopëtya) saat “tas ti eyerste kriste hon ti keportstaach fëste aan kesiin wii een kewoonheet fon te mënxe woo falxe keeter aan kepeet hon”. Ti Piipel tsaycht tas ti aphostele un anere woo tirëkt fon Yeesus in kelërnt sin woer hon een muster kextelt woo ale kriste noo mache sole. (2 Thesalooniker 3:6)

3.   Tas eensiche woo ti Piipel saat tas ti kriste ti flicht hon fer fayre hot niks tsu tuun mit keportstaach, awer mit een toot — Yeesus sayn. (Lukas 22:17-20) Meyer selte net too triwer sich ferwunere, wayl ti Piipel saat tas “te taach woo ma xtërpt is peser wii te taach woo ma uf te welt khomt”. (Eklesyastes 7:1) Wii Yeesus sayn leepe uf ti eyert am ën kang is, hot tee een kuute naame foer Kot kehat, tes weeche, waar te taach fon sayne toot wichtiche wii te taach woo eyer kepoer is. (Hepreeyer 1:4)

4.   Uf khee plats in te Piipel xteet tas een fon Kot sayn tiiner keportstaach kefayert hot. Tas is net tas tas ferkes is woer, wayl tii xprecht iwich tswaay keportstaache fëste fon mënxe woo net Kot ketiint hon. Awer tiise tswaay fëste sin net ketsaycht wii etwas kuutes. (Xeenesis 40:20-22; Markus 6:21-29)

 Soo wii ale kuute eltere, tsayche aach Yeehoowa sayn Tsayer tas se iire khiner liipe, torich tas kanse yoer, net ploos eene taach. Tii kepe aach kexenke fer iire khiner un mache kleene festche. Tiise eltere wole noo mache Kot sayn perfëkt payxpiil, woo hërtslich kuute tinge fer sayn khiner kept. (Matheus 7:11) Tes weeche, tenke net Yeehoowa sayn Tsayer sayn khiner tas se etwas ferliire. Kuk was etliche saan:

•   “Tas is fiil xeene een kexenk kriin wën mer net too truf waart.” — Tammy, 12 yoer.

•   “Ich kriin khee kexenk wën ich keportstaach hon, awer mayn eltere kepe kexenke in anere keleechenheete. Ich hon tas kërn, wayl ich waarte net too truf.” — Gregory, 11 yoer.

•   “Mënst tuu tas tseen minute, eene thoter un een liit is een fëst? Tan mus tuu pay uns khome fer siin was wërklich een fëst is!” — Eric, 6 yoer.