Wii Yeehoowa sayn Tsayer, mëyer tuun uns aan xtrënge fer noo keen ti aat fon leepe woo Yeesus in kelërnt hot un woo ti aphostele aan kewënt hon. Tiise artikel lee aus ti haupste tinge woo mëyer klaape tuun.

1.   Kot. Mëyer tuun te eensiche woere Kot aan peete, Yeehoowa, te ale mëchtiche Kriatoer. (Salmo 83:18; Apocalipse 4:11) Tee is te Kot fon Aapraham, Mooses un Yeesus. (Êxodo 3:6; 32:11; João 20:17)

2.   Piipel. Fer uns, is ti Piipel Kot sayn Wort, wërter woo fon Kot khome fer ti mënxe. (João 17:17; 2 Timóteo 3:16) Was mëyer klaape, halt sich aan te 66 piicher fon te Piipel, too tepay is tas “Alte Testamënt” un aach tas “Naye Testamënt”. Te leerer Jason D. BeDuhn hot richtich kesaat tas Yeehoowa sayn Tsayer tuun “ales was se klaape un mache aan te Piipel hale oone se ënere was ti Piipel in lërnt”. a

    Mëyer klaape ales was in te Piipel xteet, awer tas petayt nët tas mer funtamentaliste sin, wayl mer wise tas phaar teele fon te Piipel hon simpolixe wërter orer wërter woo aner tings petayt, tës weeche, sole mer nët tas ferxteen wiis kexrip këp is. (Apocalipse 1:1)

3.   Yeesus. Mëyer tuun Yeesus sayn inlërnunge un payxpiil noo keen. Fer uns, is Yeesus unser Rëter un Kot sayn Soon. (Mateus 20:28; Atos 5:31) Tës weeche, sin mer kriste. (Atos 11:26) Awer, mëyer lërne in te Piipel tas Yeesus nët te Ale Mëchtiche Kot is. In woerheet, ti Piipel tuut nët ti inlërnung fon te Triniteet xtitse. (João 14:28)

4.   Kot sayn Raych. Tas is nët etwas woo in te kriste sayn hërts is. Tas is een rechiirung woo im himel këpt. Tiise rechiirung tuut ti mënxliche rechiirunge ersëtse un tuut Kot sayn wile uf te Ëyert mache. (Daniel 2:44; Mateus 6:9, 10) Tas tuut in khorts tsayt pasiire, wayl ti Piipel saat tas mer in te “lëtste taache” leepe. (2 Timóteo 3:1-5; Mateus 24:3-14)

    Yeesus is te Kheenich fon Kot sayn Raych. Tee hot aan kefang im himel se rechiire in 1914. (Apocalipse 11:15)

5.   Rëtung. Yeesus sayn fray khaaf opfer los uns fray fon te sint un fom toot. (Mateus 20:28; Atos 4:12) Fer tas kriin, mus te persoon klaape aan Yeesus hon, sayn leepe ënere un sich taafe lose. (Mateus 28:19, 20; João 3:16; Atos 3:19, 20) Tee tsaycht tas sayn klaape woer is, torich was er macht. (Tiago 2:24, 26) Awer ti rëtung khan nët kekhaaft wëre — tii is meechlich ploos torich “Kot sayn unfertiint kuutheet”. (Gálatas 2:16, 21)

6.   Himel. Yeehoowa Kot, Yeesus un ti ëngele woone im himel. b (Salmo 103:19-21; Atos 7:55) Fer mit Yeesus im Raych rechiire, wërt een kleene krup fon layt (144.000) uf keruuft fer im himel se leepe. (Daniel 7:27; 2 Timóteo 2:12; Apocalipse 5:9, 10; 14:1, 3)

7.   Ëyert. Kot hot ti Ëyert kemacht tas ti mënxe fer imer uf te Ëyert leepe khënte. (Salmo 104:5; 115:16; Eclesiastes 1:4) Kot tuut ti layt woo aan heere seechne mit perfëkt kesuntheet un eewiche leepe in een paratiis uf te Ëyert. (Salmo 37:11, 34)

8.   Xlëchtichkheet un traurichkheet. Wii eene fon Kot sayn ëngele sich keeche Kot kextëlt hot, hot aan kefang xlëchtichkheet un traurichkheet uf te Ëyert këpe. (João 8:44) Tiise xlëchte ëngel is “Satanaas” un “Taywel” kenënt këp. Tee hot Aatam un Ewa rom kepapelt fer aach sich keeche Kot se xtële. Tas hot kroose propleeme keprung fer ti nookhomer fon tëm phëyerche. (Gênesis 3:1-6; Romanos 5:12) Fer antworte was Satanaas im frooche kextëlt hot, hot Kot kelos tas ti xlëchtichkheet un ti traurichkheet pasiire teet. Awer tee lost nët tas tas imer pasiire tuut.

9.   Toot. Ti layt woo xtërpe, tuun nëme eksistiire. (Salmo 146:4; Eclesiastes 9:5, 10) Tii tuun nët in te fayer hël layte.

    In te tsukhunft, tuut Kot pilioone layt tsurik ins leepe pringe torich tas uf xtaye fom toot. (Atos 24:15) Noo tas uf xtaye fom toot, tii woo nët Kot sayn wile mache wolt, wëre fernicht un tuun nimer leepe. (Apocalipse 20:14, 15)

10.   Familye. Kot hot kesaat tas ti hayrat sol ploos tswixich eene man un een fraa sin, un mëyer nëme tas ërnst aan. Ti sëksuaal imoraaliteet is ti eensich aat woo tas phëyerche tiwors ferlange khan. (Mateus 19:4-9) Mëyer sin sicher tas ti kluucheet woo mer in te Piipel fine, ti familye hëlfe khan froo sin. (Efésios 5:22–6:1)

11.   Unser aanpeetung. Mëyer tuun nët tas krayts orer aner pilte aan peete. (Deuteronômio 4:15-19; 1 João 5:21) Kuk was mer mache fer Kot aan peete:

    •   Mëyer peete tsu Kot. (Filipenses 4:6)

    •   Mëyer tuun ti Piipel leese un xtutiire. (Salmo 1:1-3)

    •   Mëyer tënke triwer noo aan was mer in te Piipel kelërnt hon. (Salmo 77:12)

    •   Mëyer tuun uns fersamele fer peete, ti Piipel xtutiire, singe, iwer unser klaape xprëche un unsere priiter un ti anere aan muute. (Colossenses 3:16; Hebreus 10:23-25)

    •   Mëyer preetiche ti “kuute oter fon Kot sayn Raych”. (Mateus 24:14)

    •   Mëyer hëlfe ti layt woo noot mit mache tuun. (Tiago 2:14-17)

    •   Mëyer tuun Raych Saale un anere plëtse paue un uf phase woo penutst sin fer iwer ti Piipel se lërne un ti preetich aarwayt uf te kans wëlt xtitse. (Salmo 127:1)

    •   Mëyer këpe umaniteer hilef. (Atos 11:27-30)

12.   Unser orkanisatsioon. Mëyer sin in kemaynte orkanisiirt, un yeete eene is torich een krup fon ëlteste kefiirt. Tii kriin khee këlt fer tas se mache un tii keheere aach nët een heeche krup woo ëkstra priwilëje hon. (Mateus 10:8; 23:8) Mëyer tuun nët faare kehal ferlange un tuun mer aach khee kolëkte in unsere fersamlunge mache. (2 Coríntios 9:7) Unser kanse aktiwiteete sin torich fraywilich kontripuytsioone finantsiirt.

     Ti Rechiirente Khërperxaft, woo een kleene krup fon rayfe kriste sin, tuun fon unser haupst sëts, orientiirunge fer Yeehoowa sayn Tsayer uf te kans wëlt këpe. (Mateus 24:45)

13.   Unser eenichkheet. In te kans wëlt, hon Yeehoowa sayn Tsayer te sëlwiche klaape. (1 Coríntios 1:10) Mëyer tuun uns aan xtrënge fer wayter eenich plaype, aach wën unerxiite tswixich uns këpt. (Atos 10:34, 35; Tiago 2:4) Mëyer sin fray fer persoonliche ëntxluse se mache, un fer tas, tuun mer unser kewise penutse woo torich ti Piipel keiipt këp is. (Romanos 14:1-4; Hebreus 5:14)

14.   Ti aat woo mer um keen. Mëyer tuun uns aan xtrënge fer nët ploos in uns sëlepst tënke, awer ales torichs liip mache. (João 13:34, 35) Mëyer mache nët tings woo Kot nët kërn hot, wii pluut transfusioon aan nëme. (Atos 15:28, 29; Gálatas 5:19-21) Mëyer sin friitlich un tuun mer nët teel in kriiche mit mache. (Mateus 5:9; Isaías 2:4) Mëyer tuun ti rechiirente un sayne kesëtse rexpëktiire imer wën tii nët keeche Kot sayn kesëtse keen. (Mateus 22:21; Atos 5:29)

15.   Ti aat woo mer ti anere pehantele tuun. Yeesus hot uns kexikt: “Liip ti anere wii tich sëlepst.” Tee hot aach kesaat tas ti kriste  ‘khee teel fon te wëlt mache tuun’. (Mateus 22:39; João 17:16) Soo, opwool mëyer khee teel raus suuche in politixe sache, un uns aach nët in anere relichieese krupe rin mexe, tuun mer uns aan xtrënge fer ‘tas kuutes fer al mache’. (Gálatas 6:10; 2 Coríntios 6:14) Un tuun mer aach rexpëktiire ti ëntxluse woo ti anere iwer tiise phunkte mache. (Romanos 14:12)

 Wëns tuu een frooch host iwer aan was Yeehoowa sayn Tsayer klaape tuun, khanst tuu iwer uns in unser site leese, kontakt mache mit eene fon unsere apteelunge, in een fon unsere fersamlunge keen woo tichter pay tëyer is, orer mit een fon Yeehoowa sayn Tsayer xprëche in tayn xtat.