Yeehoowa sayn Tsayer sin neutral in politixe sache weeche iire klaape, woo sich halt aan was ti Piipel in lërnt. Meyer weele net uf een kantitat orer eene politixe partay, mer xtele uns net uf fer een politixe xtel kriin un mache khee teel in aktiwiteete woo fersuuche ti rechiirung influentsiire orer um truke. Meyer klaape tas ti Piipel uns kuute uersache kept fer neutral sin.

•   Meyer mache Yeesus sayn payxpiil noo, woo hot khee politixe xtel aan kenom. (Yoohan 6:15) Tee hot sayn tisipele in kelërnt tii selte “khee teel fon te welt sin” un hot taytlich kemacht tas se selte net sich rin mexe in politixe sache. (Yoohan 17:14, 16; 18:36; Markus 12:13-17)

•   Meyer sin troy tsu Kotes Raych, woo Yeesus kenënt hot wii eyer saat: “Un tiise kuute notisye fom Raych wëre uf te kans pewoont eyert kepreeticht.” (Matheus 24:14) Meyer representiire Kot sayn Raych un soo hon ti flicht fer pekhant mache tas es am khome is. Tes weeche, sin mer neutral in politixe sache fon ale lënter, un aach fom lant woo mer woone. (2 Korinter 5:20; Ëfeser 6:20)

•   Wayl mer neutral sin, khene mer xpreche mit ale layt iwich ti kuute notisye fom Kotes Raych, ekaal was fer politix iteoloxii tii hon. Meyer wole tsayche, mit unser wërter un ti aat wii mer uns aan xtele, tas mer traue tas Kot sayn Raych wërt ti kanse welts propleeme resolwiire. (Psalm 56:11)

•   Wayl mer net torich politixe sache kexpalt sin, hon mer een weltwayt eenich pruuterxaft. (Koloser 3:14; 1 Pheeter 2:17) Un in anere relichyoone woo sich in politik rin mexe, siit ma tas es khee eenichkheet unich iire mitkliiter kept. (1 Korinter 1:10)

 Respekt tsu ti rechiirunge. Opwool meyer net uns in politik rin mexe, respektiire mer ti rechiirunge sayn autoriteet im lant woo mer woone. Tas xteet sich mit was ti Piipel saat: “Yeete eene sol sich unich te heecher autoriteete hale.” (Romaaner 13:1) Meyer respektiire ti kesetse, petsaale unser xtaye un xtitse ti rechiirung sayn aanxtrengunge un aarwayte woo kuut sin fer ale pewooner. Meyer unerxtitse khee peweechunge woo fersuuche sich keeche ti rechiirung xtele. Xtats tas, soo wii ti Piipel saat, peete mer fer ti “kheeniche un al tii woo in een hooch xtel sin”, hauptseechlich wën se mise ëntxlise mache woo khene ti relichyoon frayheet petrëfe. (1 Timoteus 2:1, 2)

 Meyer respektiire aach ti anere iire recht fer iire aychne ëntxlise mache iwich politixe sache. Tsum payxpiil, meyer fersuuche net ti waal in xtele un aach net tsurik hale tii woo weele wole.

 Is unser neutraliteet etwas nayes? Nee. Ti aphostele un kriste fom eyerste yoerhunert hate ti selwich atituut. Tas puuch Mee wii kuute wile hon a saat: “Ale tëm woo se keklaapt hon tas se hëte ti flicht fer ti autoriteete fon te rechiirung eere, hon ti eyerste kriste ferxtan tas se selte sich net in politixe sache rin mexe.” Kraat soo, saat tas puuch Ufm weech tsu ti siwilisatsyoon b tas ti eyerste kriste “net politixe xtele aan kenom hon”.

 Is unser politixe neutraliteet kefeerlich fer ti natsyonaal sicherheet? Nee. Ti autoriteete prayche sich khee ketanke mache wayl mer sin layt woo ti friit liipe. Tsum payxpiil, eene relatooryum fon 2001 fon te Natsyonaal Akatemii fon Syens fon Ukraanya saat iwich unser politix neutraliteet: “Hayt se taach, khan sin tas tiise ferhaltung fon Yeehoowa sayn Tsayer etliche net kefalt. Tas waar eene fon te haupste uersache tas se in te nasistixe un komunistixe rechiirunge aan kep sin un kericht woer.” Soo kaar unich ti sowyëtix yachtung, hon Yeehoowa sayn Tsayer “foran ti kesetse fom lant respektiirt. Tii hon eerlich un wilich kexaft in puuplixe kolonii un in faprike, un waare nii een kefoer fer ti komunistixe rechiirunge.” Am ën fom relatooryum saat noch tas Yeehoowa sayn Tsayer iire klaape un aktiwiteete hayt aach “khee xaate mache fer ti sicherheet un intekriteet fon khee een rechiirung”.