Ti Rechiirente Khërperxaft is een kleen krup rayfe kriste woo lenkung fer Yeehoowa sayn Tsayer uf te kans welt kept. Tii mache tas in tswaay aate:

•   Tii orkanisiire ti aarwayt fer piiplixe informatsyoone in richte woo in te puplikatsyoone foer khome un woo in te fersamlunge un xuule fon Yeehoowa sayn Tsayer ketsaycht sin. (Lukas 12:42)

•   Tii orkanisiire ti preetich aarwayt fon Yeehoowa sayn Tsayer un ëntxlise wii ti kontripuytsyoone woo ti Orkanisatsyoon kriit, penutse.

 Ti Rechiirente Khërperxaft keet tas payxpiil noo fon te ‘aphostele un elteste in Yeruusalem’ fom eyerste yoer hunert. Tii hon ti kans kristlich kemaynt representiirt wii se wichtiche ëntxlise kemacht hon. (Aphostele sayn Kexicht 15:2) Soo wii tiise troye mëner im eyerste yoer hunert, sin ti mitkliiter fon te Rechiirente Khërperxaft net fiirer fon unser Orkanisatsyoon. Tii suuche ti oryentiirunge fon te Piipel un erkhëne tas Yeehoowa Kot hot Yeesus Kristus wii khop fon te kemaynt in kesetst. (1 Korinter 11:3; Ëfeser 5:23)

 Ti mitkliiter fon te Rechiirente Khërperxaft sin Kenneth Cook Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane un Jeffrey Winder. Tiise mëner tiine in unser haupst sets in Warwick, Nay York (Fereenichte Xtaate fon Amërika).

 Ti Rechiirente Khërperxaft hot 6 komisyoone in kextelt fer unerxiitliche teele fon unser aarwayt orkanisiire. Yeete mitkliit is teel fon eene orer mee komisyoone.

•   Komisyoon fon Koortenatoore: Tiise komisyoon tuut ti kans aarwayt fon te Rechts Apteelunge in te filyaale uf phase. Tii helft aach wën een unklik pasiirt, wën Yeehoowa sayn Tsayer keyacht sin weeche sayn klaape un wën anere ayliche situatsyoone woo Yeehoowa sayn Tsayer petrefe, pasiire.

•   Personaal Komisyoon: Tii phast ti neetichkheete uf fon tëne woo in te filyaale fon Yeehoowa sayn Tsayer xafe, es wil saan, ti petelite.

•   Etitoorix Komisyoon: Tii orkanisiirt ti aarwayt fer piiplixe puplikatsyoone ap truke un xike. Tii phast aach uf ti paueray fon aanpeetung pletse, iwersetsung skritoorye un filyaale.

•   Tiinst Komisyoon: Tii orkanisiirt unser aarwayt fer “ti kuute notisye fom Raych” preetiche. (Matheus 24:14)

•   Inlërnung Komisyoon: Tiise komisyoon hot ti responsapiliteet fer inlërnung materyaale in richte, woo in te fersamlunge, xuule, autyos un wiiteos penutst wëre.

•   Xrayper Komisyoon: Tiise komisyoon phast uf ti aarwayt fer piiplix instrutsyoon in richte woo in unser apketruktne puplikatsyoone un in unser site foer khome. Tii orkanisiirt aach ti iwersetsung aarwayt.

 Ti Rechiirente Khërperxaft tuut aach een mool in te woch sich fersamele fer ti neetichkheete fon te Orkanisatsyoon noo kuke. In tiise fersamlunge, tuun ti mitkliiter xpreche iwer was ti Piipel saat un tii lose tas te hayliche kayst tëne lenkt ti peste ëntxlise mache. (Aphostele sayn Kexicht 15:25)

 Tii sin troye mëner woo sayn speryens penutse fer in te komisyoone fon te Rechiirente Khërperxaft helfe. (1 Korinter 4:2) Yeete eene fon tëne is in kesetst fer mit een komisyoon xafe. Tii keen aach tsu te fersamlunge fon tiise komisyoone, woo een mool ti woch pasiire. Tii mache net ti ëntxlise, awer tii kepe itee un helfe ti komisyoon sich sicher sin tas ti ëntxlise aan kewënt wëre. Tii kuke aach ofts noo ti resultaate woo khome weeche tiise ëntxlise. Ti Rechiirente Khërperxaft khan tëne aach ferlange ti priiter in een aner teel fon te eyert pesuuche un aach reete hale in ewënte soo wii ti yoers fersamlung un ti formatuer fon te Xileat Xuul.