Yeehoowa sayn Tsayer respektiire ti rechiirunge un ti natsyonaalixe simpole woo tiise rechiirunge foer xtele. Meyer respektiire aach ti ëntxlus fon te layt wën se tas natsyonaal liit singe, ti faan eere orer een jurament fon leaaliteet tsu tas lant mache.

 Awer Yeehoowa sayn Tsayer tuun ëntxlise net in te natsyonaalixe serimoonye mit mache wayl tii klaape tas tiise tinge keen keeche was ti Piipel in lërnt. Wayl meyer ti anere sayn ëntxlus respektiire, kepe mer froo wën ti anere aach unser klaape respektiire.

In tiise artikel

•  Uf was fer piiplixe inlërnunge tuun mer uns xtaype?

•  Was mache mer wën tas kesets ferlangt tas mer in tiise serimoonye mit mache sole?

•  Meechte Yeehoowa sayn Tsayer fersuuche een politix orer sotsyaal xtel xtitse?

 Unser ëntxlus xtaype sich uf tswaay haupste inlërnunge:

•   Meyer sole ploos Kot aan peete. Ti Piipel saat: “Tuu Yeehoowa, tayn Kot, aan peete un tuu ploos tëm tiine.” (Lukas 4:8) Ti natsyonaalixe liiter un ti juramente fon leaaliteet tsum lant hon ofts tas ferxpreche tepay tas ti liip tsum lant sol iwer ales kextelt wëre. Soo, Yeehoowa sayn Tsayer ferxteen tas in soo sorte serimoonye mit mache etwas ferkheertes is.

   In te selwich aat, Yeehoowa sayn Tsayer ferxteen tas ti faan eere is een akt fon aanpeetung, orer itolatrii, etwas woo ti Piipel ferpiit. (1 Korinter 10:14) Etliche historyatoore erkhëne tas ti natsyonaalixe faane sin, in woerheet, relichyeese simpole. Te historyatoer Carlton Hayes hot kexrip: “Im natsyonalismus, is ti faan te haupst simpol fon klaape un te wichtichste opjëkt fon aanpeetung. a Te autoer Daniel Mannix hot tas iwer ti eyerste kriste kesaat: “Ti kriste hon ap kextos ... opfere fer te gênio [orer, kayst] fom [romaanix] kayser mache. Hayt se taach, tas is neekst tas selwiche wii ap xtoose ti faan eere.” b

  Opwool Yeehoowa sayn Tsayer net ti faan eere, tuun se aach niks xlechtes keeche ti faan mache. Meyer ferprëne net ti faan un tuun mer aach net mit te faan orer anere natsyonaalixe simpole oone respekt um keen.

•   Fer Kot, kepts khee unerxiit tswixich ti mënxe. (Aphostele sayn Kexicht 10:34, 35) Ti Piipel saat tas Kot “hot fon ploos eene mënx ale mënxliche natsyoone kemacht.” (Aphostele sayn Kexicht 17:26) Tes weeche, tuun Yeehoowa sayn Tayer klaape tas es ferkheert is een ras orer lant heecher wii ti anere xtele. Meyer respektiire ale layt, een tuun fon woo se heyer khome orer woo se woone. (1 Pheeter 2:17)

 Yeehoowa sayn Tsayer xtele sich net keeche ti rechiirunge. Meyer klaape tas ti rechiirunge sin teel fon een “ortnung woo Kot in kextelt hot” un tas se eksistiire wayl Kot tas erlaupt. (Romaaner 13:1-7) Meyer klaape aach tas ti kriste sole ti autoriteete fon te rechiirung aan heere. (Lukas 20:25)

 Awer was mache mer wën ti kesetse fon te rechiirung ferlange tas mer etwas mache sole woo keeche Kot sayn kesetse keen? In etliche situatsyoone, is es meechlich een ofitsyaal solisitatsyoon fer ti rechiirung ferlange tas se ti kesetse aan phase solte. c Wën tas net meechlich is, tuun Yeehoowa sayn Tsayer mit respekt ëntxlise “Kot als rechiirente aan heere xtats ti mënxe.” (Aphostele sayn Kexicht 5:29)

 Nee. Yeehoowa sayn Tsayer hoole khee sayt in politixe orer sotsyaale sache. Wën mer ap xtose tas natsyonaal liit singe, ti faan eere orer een jurament fon leaaliteet tsu tas lant mache, tas petayt net tas mer politixe atiwiste sin. In woerheet, tuun mer unser klaape noo keen, woo sich uf ti Piipel xtaypt.