Ich sin in San Juan Chancalaíto kepoer kep, een kleen xtat fon Chiapas xtaat, in Mëksiko. Mayn familye is fon te Chol folek, een ëtnixe krup woo fon te maya xtam khom is. Ich sin te finefte soon fon tswelef. Wii ich kleen waar, ich un mayn priiter hon ti Piipel mit Yeehoowa sayn Tsayer xtutiirt. Awer, ich hon ti aanreete fon ti Piipel net noo kang wii ich yung waar.

 Wii ich 13 yoore alt waar, hat ich xon trooke penutst un tings kextoolt. In tiise tsayt, sin ich fon tehëm faart kang un oone haus keplip, ich sin fon een plats noom aner kang. Wii ich 16 yoore alt waar, hon ich aan kefang se xafe in een makonya plantaaj. Unkefeer een yoer tëm noo, in een nacht, waare mer een kroos pextëlung fon makonya in een xif am nëme. Tan, ti mëner fon een aner krup woo aach trooke ferkhaaft hon, hon uns mit wafe atakiirt. Ich sin torich ti flus aus keris un runer noom flus kexwëmt. Wii ich xon wayt weech fon tat waar, sin ich raus kang. Nochter, sin ich faart noom Fereenichte Xtaate fon Amërika kang.

 In Fereenichte Xtaate fon Amërika, hon ich wayter trooke ferkhaaft un mich in mee propleeme rin kemext. Wii ich 19 yoore alt waar, sin ich in een katee rin kexpërt kep weeche xteele un weeche fersuuche yemant um pringe. In te katee, hon ich mich kesamelt mit een xlecht krup fon pantite un sin mee wyolënt kep. Weeche tas, sin ich fer een aner katee kenom kep, ti katee fer kefeerlich pantite in Lewisburg, Pensilwaanya.

 In te katee fon Lewisburg, sin ich ploos xlechter kep. Wayl ich tatuaaje hat fon te xlecht krup woo ich waar, klaych hon ich mich pay te selwich krup kesamelt. Ich sin noch mee wyolënt kep un hon imer kepriikt. Een mool, hon ich mich in een priike im hoof fon te katee rin kemext. Meyer hon uns fiil wee kemacht mit xtëke fon peyspal un mit kewichte. Ti poliis hot kaas penutst tas meyer noo lose se priike teete. Noo tas, tii hon mich in een spetsyaal apteelung ketuun, woo fer kefeerliche pantite waar. Ich sin imer fon wuut ferplatst un waar keween fiil eekliche naame saan. Fer mich, waars laycht yemant ferhaue. In tiise tsayt, hon ich mich net xultich kefun weeche tas tings woo ich am mache waar.

 In te spetsyaal apteelung fer kefeerliche pantite, waar ich am meyerste tsayt in kexpërt. Soo, hon ich aan kefang ti Piipel leese fer mayn tsayt fertraype. Nochter, een poliis man hot mich tas puuch Tuu khanst fer imer im Paratiis uf Eyert leepe kep. a Soo wayter wii ich tas puuch keleest hon, hon ich mich erinert fon fiil tings woo Yeehoowa sayn Tsayer mich in kelërnt hon wii ich kleen waar. Tan, hon ich aan kefang se tenke wii mayn leepe xlecht kep is, wayl ich soo wyolënt waar. Ich hon aach in mayn familye ketënkt. Tswaay fon mayn xwestere sin Yeehoowa sayn Tsayer kep, un tan, hon ich ketënkt: ‘Tii tuun fer imer leepe.’ Un hon ich mich kefroot: ‘Warom khan ich aach net fer imer leepe?’ In tiise momënt hon ich ëntxlos mayn leepe ënere.

 Awer ich wust tas ich praucht hilef fer ti ënerunge mache. Tan, hon ich eyerst fer Yeehoowa kepeet un aan kehal tas eyer mich helfe teet. Nochter, hon ich een priif kexrip fer te Haupst Sets fon Yeehoowa sayn Tsayer in Fereenichte Xtaate fon Amërika un hon een Piipel xtuutyum ferlangt. Tan, een kemaynt woo ticht pay meer waar hot mich kefun. In tiise tsayt es waar net erlaupt tas yemant woo net mayn parent waar, mich im katee pesuuche kheemt. Soo, een pruuter fon te kemaynt hot piiplixe puplikatsyoone un priife fer mich kexikt woo mich fiil aan kemuut hon. Tas hot mayn wunx fer mayn leepe ënere noch kreeser kelos.

 Ich hon een kroos xrit kep wii ich ëntxlos raus keen fon te xlecht krup fon pantite. Ich waar xon fiil yoore in tëm krup, un soo wii ich, te xëf fom krup waar aach in te spetsyaal apteelung fer xlechte pantite. Tan, wii meyer een tsayt hat fer se fertraype, sin ich ticht pay te xëf kang un kesaat tas ich wolt Yeehoowa sayn Tsayer kepe. Ich hon mich ferwunert wii tee kesaat hot: ‘Wëns tuu tas wërklich wilst, kee wayter. Ich khan net keeche Kot sayn wile keen. Awer, wëns tuu wilst ploos fon unser krup raus keen, tan weest tuu was pasiire tuut.”

 Torich ti tswaay neekste yoore, ti aarwayter fon te katee hon kemërekt tas ich anerste waar, un tes weeche, hon mich peser pehantelt. Tsum payxpiil, tii hon net mee alxeemas aan mich ketuun wii ich fon mayn plats noom paat tsimer kang sin, un eene fon tëne hot mich aan kemuut fer wayter ti ënerunge in mayn leepe mache. In mayn letst yoer in te katee, ti xëfe fon tat hon mich soo kaar kexikt fer een apteelung fer inkexpërtner woo net kefeerlich waare. In 2004, wii ich xon tseen yoore in kexpërt waar, sin ich fon te katee raus kang. Tii hon mich in een onipus fon te katee ketuun un mich noom Mëksiko kexikt.

 Klaych wii ich in Mëksiko khom sin, hon ich een Raych Saal fon Yeehoowa sayn Tsayer kesuucht. Ich sin in te eyerste fersamlung kang mit katee tsayche, wayl tas waar ti eensiche kuute tsaych woo ich hat. Opwool ich soo aan ketsoo waar, Yeehoowa sayn Tsayer hon mich kuut aan kenom. Wii ich kesiin hon tas se soo kuut mit mich waare, hon ich kexpiirt tas ich tswixich woere kriste waar. (Yoohan 13:35) In tiise fersamlung, ti elteste hon een Piipel xtuutyum fer mich prokramiirt. Een yoer tëm noo, in 3^te septemper fon 2005, sin ich wii Yeehoowa sayn Tsayer ketaaft kep.

 In yanuer fon 2007, hon ich aan kefang se tiine wii rekulaar pyoneer, un yeete moonat hon ich 70 xtune penutst fer ti anere iwer ti Piipel in lërne. In 2011, hon ich ti Piipel Xuul fer Leetiche Priiter kemacht (tiise xuul is yets ti Xuul fer Preeticher fom Raych). Tas hot mich fiil keholef mayn responsapiliteete in te kemaynt kuut uf phase.

 In 2013, hon ich mich ferhayrat mit mayn liipe fraa Pilar. Tii tuut imer lache un saan tas tii khan net klaape wii ich tëm fertseele iwer tas tings woo ich friirixe kemacht hon. Ich hon nii mee tas tings kemacht. Meyer tswaay klaape tas ich sin een woere proop tas ti Piipel hot ti macht fer ti layt ënere. (Romaaner 12:2)

 Ich xpiire tas Yeesus sayn wërter in Lukas 19:10 sin fer mich. Tee saat: ‘Ich sin khom fer se suuche un reete tee woo ferloer waar.’ Ich fine mich net mee ferloer, un tuun aach net mee ti anere wee mache. Mit te hilef fon ti Piipel, hon ich yets te peste opjetiiw woo yemant khan hon, tuun ich im friit mit ale layt leepe, un noch wichtich, hon ich een froyntxaft mit mayn Kriatoer, Yeehoowa.