Ich sin kepoer in Ciudad Obregón, in nort fon Mëksiko, ich waar te finefte fon noyn khiner. Meyer hon kewoont uf een kleen kolonii woo mayn papa uf kephast hat in te umtree fon te xtat. Tas waar een xeen plats fer leepe un unser familye waar eenich un froo. Awer, wii ich finef yoer alt waar, hat een triles wint unser kolonii kans fernicht un mer muste wanere tsu een anert xtat.

 Mayne papa hot aan kefang kuut fertiine, awer, in te selwich tsayt, hot tee aach aan kefang tsu fiil saufe. Tas hot sayn hayrat un sayn khiner petrof. Meyer hon tsikere fon unser papa kextool un hon aan kefang tsu rauche. Ich hon mich pesof kemacht tas eyerste mool wii ich ploos seks yoer alt waar. Klaych tëm noo, sin mayn eltere aus naner kang, un ich hon noch mee aan kefang tsu rauche un saufe.

 Mayn mama is leepe kang mit een anere man un tii hot uns mit kehol. Awer te man hot khee kelt hëm kepracht un mer khonte neekst net leepe mit tas pisye woo mayn mama fertiint hat. Tan, ich un mayn priiter hon ale sorte kleene aarwayte kemacht woo mer kefun hon, awer tas hot net kexeekt fer leepe. Ich hon xuu kewikst, proot, tsaytung, xiklë un anere tinge ferkhaaft. Ich sin aach in ti xtat rom kelaaft un hon ese kesuucht in ti rayche iire lixo.

 Wii ich tseen yoer alt waar, hot eene man mich inkelaat fer xafe ufm plats woo te lixo fon te xtat aus kexut wërt. Ich hon tas aan kenom. Ich hon ti xuul im xtich kelos un sin faart fon tehëm kang. Tee hot mich weeniche wii eene tolar te taach petsaalt un hot mich ese kept woo eyer aus te lixo kehool hot. Ich hon kewoont in een kleen hit woo ich selepst kepaut hat mit te rëste woo ich im lixo kefun hat. Ti layt woo um mich rom kewoont hon hate een trekich kexpreech un een imoraal leepe. Fiil hon troke penutst un kesof. Tas waar ti xlechts tsayt in mayn leepe. Yeete oomt hon ich keprilt un ketsitert fon angst. Ich hon mich kexeemt wayl ich soo aarem waar un hon net kelërnt kehat. Tray yoore hon ich tat kewoont, tan sin ich kewanert tsu een aner xtaat fon Mëksiko. Tat hon ich kexaft uf een kolonii; ich hon pluume keplikt, pampol un kartofele keërnt un tsukre xtange keraft.

 Fier yoore tëm noo, sin ich tsurik tsu Ciudad Obregón kang. Een fon mayn thante, woo waar een prauch fraa, hot mich woone kelos pay iir. Ich hon aan kefang hesliche treeme hon un sin soo traurich kewoer tas ich kepleent hon mich um pringe. Eene oomt hon ich tsu Kot kepeet: “Hër, wëns tuu wërklich eksistiirst, wil ich tich khëne lërne un tich tiine fer imer. Wën tas een woere relichyoon kept, wil ich se fine.”

 Ich hon imer mich interesiirt um spirituaale sache. Fon khint aan, sin ich in fiile khëriche kang, awer in khee een hon ich kefun was ich kewaart hon. Khee een fon tëne hot fiil fon te Piipel kexproch un hot mich net keholef in mayn spirituaale neetichkheete. Etliche hon tsu fiil kexproch iwich kelt un in te anere, hate ti mitkliiter een imoraal leepe.

 Wii ich 19 yoer alt waar, hot eene fon mayn xwoochere kesaat tas Yeehoowa sayn Tsayer im ketsaycht hon iwich relichyeese xtaatue penutse. Tee hot mich foer kelees Eeksotus 20:4, 5. Tat saat tas mer sole khee relichyeese xtaatue mache. Te wërs 5 saat: “ Tuu solst tich net foer tëne niter pike un tii aach net tiine, wayl ich, Yeehoowa, tayn Kot, sin een Kot woo ferlangt tas se ploos mich wii Kot aan peete sole.” Tan hot mayne xwoocher kefroot: “Wën Kot ti relichyeese xtaatue penutst fer wunere mache orer wën tee wil hon tas mer sole se aan peete, warom hot tee se tan ferpoot?” Tiise frooch hot mich tenke kemacht. Noo tas, hon mer oft mools iwich piiplixe sache kexprooch. Tiise kexpreeche hon mich soo kefal tas ich kaar net kesiin hon ti tsayt rom keen.

 Xpeeter, hot tee mich mit kenom uf een fersamlung fon Yeehoowa sayn Tsayer. Tas hot mich kewunert was ich tat kesiin un keheert hon. Soo kaar ti yunge hate teel in te fersamlung un wën se foer al kexproch hon, hon se tas soo kuut kemacht! Ich hon ketacht: ‘Was een kuut inlërnung kriin ti layt hiir.’ Ale tëm ich lange hoer hat un waar xlecht aan ketsoo, hon se mich aarich kuut aan kenom. Een familye hot mich soo kaar inkelaat fer nacht ese mit iir noo ti fersamlung!

 Wii ich aan kefang hon ti Piipel xtutiire mit Yeehoowa sayn Tsayer hon ich kelërnt tas Yeehoowa Kot eene liipliche Fater is woo uns uf phast, ekaal ep mer aarem sin orer raych, unser ras orer wii fiil mer kelërnt hon in te xuul. Tee macht wërklich khee unerxiit unich layt. (Aphostele sayn Kexicht 10:34, 35) Ëntlich hon ich Kot khëne kelërnt un mayn kaystlich neetichkheet is fersoricht woer.

 Fon tan aan is mayn leepe fiil peser kewoer! Ich hon noo kelos tsu rauche, tsu saufe un trekiche wërter saan. Ti piterliche xpiirunge woo ich hat fon khint aan un ti hesliche treeme sin lamsam ferkang. Yets xpiire ich net mee tas ich khee weyert hon weeche ti trauriche un xlechte tinge woo mit mich pasiirt waare wii ich khint waar un wayl ich net lang in te xuul kang sin.

 Hayt hon ich een kuut un liiplich fraa woo Yeehoowa liipt un mich wërklich xtitst. Yets tiine ich als sirkuyt superintentent fon Yeehoowa sayn Tsayer un pesuuche kemaynte fer mayn spirituaale priiter un xwestere uf muute un in lërne, woo sin wii een familye fer mich. Ich sin soo petanklich tsu ti wunerlich inlërnung woo Kot uns kept un tsu ti Piipel woo mich keholef hot mayn emotsyonaale wunte heele. Hayt prauch ich mich net mee xeeme.