Ich sin kepoer in Calgary, een xtat woo keheert tsu Alberta, Kanata. Wii ich een khint waar, sin mayn eltere ausnaner kang. Un ich un mayn mama sin mit mayn krooseltere woone kang. Tii hon uns aarich keliipt, un ich waar een seer froo khint. Ich khan mich noch erinere mit liip ti kuute tsayte woo ich khint waar.

 Awer wii ich 7 yoer alt waar, hot mayn leepe sich keënert, un ales is seer xlim kewoer. Mayn mama hot sich wiiter ferhayrat mit mayne papa un meyer sin woone kang in Nort Amërika, in ti xtat Saint Louis, Missouri. Tas hot net lang ketauert pis ich raus kriit hon tas mayne papa khent aarich krop sin. Tsum payxpiil, wii ich hëm khom sin fon te eyerste taach fon mayn nay xuul, hot mayne papa raus kriit tas ich hat bullying mit kemacht, un tas ich net tsurik keklopt hon. Tee is soo pees kewoer tas ich net kextrit hon mit te khiner in ti xuul, tas eyer mich noch mee ferhaut hot wii ti khiner. Tes weeche, hon ich aan kefang xtrayte mit te anere khiner wii ich ploos 7 yoer alt waar.

 Wayl mayne papa soo krop un pees waar, is mayn mama een kriinsich un traurich persoon kewoer. Tii hon imer ketsënkt. Wii ich 11 yoer alt waar, hon ich aan kefang tsu saufe un troke penutse. Ich sin taach tsu taach krope kewoer un hon imer kextrit ufm weech. Wii ich fërtich mit te xuul waar, waar ich xon een aarich krop un kewaltich persoon.

 Wii ich 18 yoer alt waar, hon ich ti Nort Amërika Mariin ketiint. Ti iipung woo ich tat kriit hon, hot mich noch mee krop un kewaltich kemacht. Ich hon kelërnt layt um pringe. Noo finef yoer, hon ich te militeer aarwayt kelos un hon aan kefang psikoloxii xtutiire, wayl ich wolt xafe fer te FBI (Nort Amërika Feteraale Polise). Ich hon aan kefang mayn xtuutyum in Nort Amërika un foran xtutiirt in Kanata, noo tëm tas ich tsurik waar.

 In te uniwersiteet, hon ich kans ti hofnung woo ich hat iwich ti mënxheet ferloer. Ti mënxe hon soo ekoiistix aus kesiin, ti kans welt hot aus kesiin oone tswek, un ti mënxliche propleeme hon aus kesiin tas se khente net resolwiirt wëre. Ich hon net mee keklaapt tas ti mënxe khente fon tiise welt een peser plats mache fer leepe.

 Wayl tas leepe khee tswek fer mich kemacht hot, hon ich aan kefang tsu saufe un troke penutse, un ploos ketacht aans kelt un sëks. Mayn leepe waar fon fest tsu fëst un fraa tsu fraa keen. Ich hon ketraut uf mayn militeer iipung; tes weeche, hon ich mich imer in xtrayt kemixt. Ich hat mayn aychne mënung iwich was kerecht weyer un wën ich tacht tas yemant teet een aner mit unkerëchtichkheet pehantele, tan hon ich kextrit. Awer, in woerheet, ti wyolënts hot mayn kans leepe kontroliirt.

 Eene taach, ich un mayn fraaynt hon troke penutst kehat im khele fon mayn haus; meyer waare am inrichte een fracht fon makonya fer ferkhaafe. Tan, hot tee mich kefroot ep ich aan Kot klaape teet. Ich hon keantwort: “Wën Kot te xultner is fon te eelent woos uf te welt kept, tan wil ich niks wise fon tëm.” Te anere taach, te eyerste taach fon mayn nay aarwayt, hot een aarwayts koleke, woo Yeehoowa sayn Tsayer waar, mich kefroot: “Mënst tuu tas Kot hët xult aan te eelent woos uf te welt kept?” Ich hon mich kewunert tas tee tas mich kefroot hot eene taach tëm noo woo ich too triwer kexproch hat. Tes weeche, wolt ich mee wise. Ti neekste seks moonate, hon mer ofts mool fertseelt. Tee hot mich ti antworte in te Piipel ketsaycht fer ti haupste frooche woo ich hat iwichs leepe.

 In tiise tsayt, hon ich kewoont mit een meetche woo ich mit ferloopt waar, un tii wolt niks wise fon was ich am lërne waar. Eene suntaach, hon ich fer tëne kesaat tas ich hët Yeehoowa sayn Tsayer inkelaat fer aan unser haus khome un ti Piipel mit uns xtutiire. Neekste taach, wii ich hëm khom sin fon te aarwayt, waar se faart kang un hot ales mit kenom was mer in haus hate. Ich sin raus kang un hon aan kefang tsu prile. Tan hon ich tsu Kot kepeet un aan kehal Tee solt mich helfe. Tas waar tas eyerste mool woo ich kepeet hon un hon sayne naame, Yeehoowa, penutst. (Psalm 83:18)

 Tswaay taache tëm noo, is een pheyerche fon Yeehoowa sayn Tsayer ti Piipel xtutiire khom mit mich tas eyerste mool. Noo tëm tas se faart waare, hon ich foran tas puuch keleest woo mer am lërne waare, Poderá Viver Para Sempre no Paraíso na Terra. a Ich hon tas puuch fërtich keleest ti selwich nacht. Was ich kelërnt hon iwich Yeehoowa un sayne soon, Yeesus Kristus, hot mayn hërts aan kekrif. Ich hon kesiin tas Yeehoowa liiplich is un tas wën mer layte, tuut tee aach layte. (Isayas 63:9) Was mich aarich aan kekrif hot, waar lërne iwich ti liip woo Kot tsu mich hat un iwich ti opfer woo sayne Soon weeche mich kemacht hot. (1 Yoohan 4:10) Ich hon ferxtan tas Yeehoowa ketultich waar mit mich wayl “eyer net winxt tas yemant fernicht wërt, awer winxt tas se al sich peroye.” (2 Pheeter 3:9) Ich hon kexpiirt tas Yeehoowa teet mich ticht tsiie tsu iim. (Yoohan 6:44)

 Ich hon aan kefang uf ti fersamlunge keen in tiise selwich woch. Ich hat lange hoer, oering in un ich hon heslich aus kesiin. Awer toch, hon Yeehoowa sayn Tsayer mich pehantelt als wën ich een parent fon tëne weyer woo se xon lang net mee kesiin hëte. Tii hon sich aan kextelt wii woere kriste. Ich hon mich kexpiirt als wën ich tsurik weyer tsu mayne krooseltere sayn haus, awer noch peser.

 In khorts tsayt, was ich am lërne waar fon te Piipel hat aan kefang mayn leepe ënere. Ich hon mayn hoer kexnit, un noo kelos se saufe, troke penutse un een imoraalix leepe nëme. (1 Korinter 6:9, 10; 11:14) Ich wolt Yeehoowa kefale, tes weeche hon ich net ausreete kesuucht wën ich kelërnt hon etwas woo ich ferkheert am mache waar. Xtats tas, tas hot mich traurich kelos. Ich hon ketenkt: ‘Ich khan net wayter tas mache.’ Tan klaych hon ich mich aan kextrengt fer ënere ti aat wii ich ketenkt hon un mich aan kextelt hon. Soo hon ich klaych kemërekt ti nutse woo mer kriin wën mer leepe soo wii Yeehoowa wil. In 29^te Yuuli, 1989 — ploos seks moonate tëm noo woo ich aan kefang hon ti Piipel xtutiire — hon ich mich ketaaft wii Yeehoowa sayn Tsayer.

 Ti Piipel hot keholef mayn personaliteet ënere. Friier waar natiirlich fer mich wyolënt sin wën yemant mich pees kemacht hat orer sich keeche mich kextelt hat. Awer yets, ich xtrenge mich aan fer “friitlich sin mit ale kaar”. (Romaaner 12:18) Un ich wees tas tiise ënerung is net fon mich selepst khom, awer is weeche Yeehoowa, torich sayn Wort un sayn hayliche kayst. (Kalater 5:22, 23; Hepreeyer 4:12).

 Hayt sin ich net mee kontroliirt fon te troke, wyolënts un imoraalixe winxe. Xtats tas, xtrenge ich mich aan fer Yeehoowa kefale un mayn pestes fer iim kepe. Too tepay is anere helfe iim khëne lërne. Phaar yoore tëm noo woo ich mich ketaaft hon, sin ich kewanert tsu een anert lant, woos neetich waar mee layt fer ti kuute otere preetiche. Torich ti yoore, hon ich te priwilëj fer fiil layt ti Piipel in lërne un siin wii tii tëne iire leepe ferpesert hot. Ich sin aach froo tas mayn mama Yeehoowa sayn Tsayer kewoer is. Un etwas woo se keholef hot tas mache waar siin ti ënerunge woo ich in mayn leepe kemacht hon.

 In 1999, in te xtat fon El Salvador, hon ich ti xuul kemacht woo hayt kenënt is Xuul fer Preeticher fom Raych. Tiise xuul hot mich keiipt fer ti preetich aarwayt fiire un fer ti kemaynt in lërne un uf phase. Xpeeter, in tiise selwich yoer, hon ich mich ferhayrat mit mayn liipe fraa, Eugenia. Mitsamer, tiine mer wii fol tsayt preeticher in Kwatemaala.

 Hayt, xtats untsufriite sin mit mayn leepe, sin ich mechtich, mechtich froo. Mache was ti Piipel saat hot mich fray kemacht fon te imoraaliteet un wyolënts, un hot mich een leepe fol mit woere liip un friit kep.