Òganizasyon Temwen Jewova yo respekte dwa chak moun genyen pou yo gen vi prive yo, e respè sa a chita sou prensip nou jwenn nan Bib la. Òganizasyon an rekonèt devwa l genyen pou l byen kominike ak lòt moun e pou l byen jere enfòmasyon ki pèsonèl ak enfòmasyon ki trè konfidansyèl yo yon fason pou l ka bay Temwen Jewova yo sa yo bezwen epi fè aktivite relijye ak lòt aktivite kote li bay èd, li rekonèt tou nesesite pou l kenbe enfòmasyon yo konfidansyèl epi byen pwoteje yo (Pwovèb 15:22; 25:9). Li bay konfidansyalite anpil enpòtans. — Pwovèb 20:19.

Plizyè peyi gen lwa ki pwoteje dwa chak moun genyen pou yo gen vi prive yo. Òganizasyon Temwen Jewova yo gen lontan depi l ap respekte dwa chak moun genyen pou yo gen vi prive yo e li gen lontan depi l ap kenbe enfòmasyon yo konfidansyèl, e li te konn fè sa anvan menm gen peyi ki te tabli lwa pou sa. Òganizasyon Temwen Jewova yo ap toujou kontinye pwoteje enfòmasyon yo menm jan l te toujou fè sa. Nou pral wè kèk prensip li suiv pou pwoteksyon enfòmasyon yo.

Òganizasyon Temwen Jewova yo gen plizyè biwo filyal ki reprezante l sou tout tè a, e yo tout respekte règ sa yo.

Òganizasyon Temwen Jewova yo suiv règ ki vin apre yo pou l jere tout enfòmasyon pèsonèl yo:

1. Nou trete enfòmasyon pèsonèl yo yon fason ki jis e dapre lalwa.

2. Nou rasanble epi nou prepare enfòmasyon pèsonèl yo sèlman pou n itilize yo nan aktivite relijye nou yo ak aktivite kote nou bay èd.

3. Nou veye pou enfòmasyon yo egzak e nou kenbe yo ajou. Nou korije nenpòt ki erè kou sa posib e kou n vin konn sa.

4. Nou kenbe enfòmasyon yo toutotan yo nesesè pou bezwen òganizasyon an.

5. N ap fè tout sa n kapab pou n respekte dwa moun genyen sou enfòmasyon sa yo.

6. Nou pran bonjan dispozisyon, ni nan fason òganizasyon an fonksyone ni nan domèn teknik, pou n anpeche moun ki pa gen dwa oswa ki pa otorize pou yo ta gen aksè ak enfòmasyon pèsonèl sa yo. Tout òdinatè ki gen enfòmasyon pèsonèl òganizasyon an ladan yo gen yon modpas ki pwoteje yo, se sèl moun ki gen otorizasyon pou y al sou òdinatè sa yo ki gen modpas yo. Yo fèmen tout biwo apre lè travay yo e se sèl moun ki gen dwa pou sa ki antre ladan yo.

7. Nou pa transfere enfòmasyon pèsonèl sot nan yon filyal al nan yon lòt sof si li ta nesesè pou nou akonpli travay òganizasyon Temwen Jewova yo, e se tout manm òganizasyon an ki aksepte prensip sa a lè yo te deside yo menm yo t ap vin fè pati òganizasyon Temwen Jewova yo e yo t ap pote non sa a.

1. Dwa moun genyen sou pwoteksyon enfòmasyon pèsonèl yo ak enfòmasyon ki trè konfidansyèl yo, ansanm ak koreksyon ki ka fèt sou enfòmasyon sa yo oswa eliminasyon enfòmasyon sa yo dwe fèt dapre prensip Temwen Jewova yo nou jwenn nan dokiman sa a.

2. Kèlkeswa moun ki vle fè yon chanjman sou enfòmasyon li te bay dwe bay bonjan prèv sou idantite l.

3. Si yon moun ta vle jwenn aksè ak enfòmasyon ki konsène l yo, pou koreksyon oswa eliminasyon enfòmasyon sa yo, òganizasyon an ap byen egzamine si l dwe bay moun nan aksè ak enfòmasyon sa. L ap egzamine rezon ki fè moun nan vle gen aksè ak enfòmasyon sa yo ak avantaj oswa dezavantaj sa ta ka genyen pou òganizasyon an, sitou si sa ta ka reprezante yon danje pou dwa ak enterè lalwa bay òganizasyon an pou l pratike relijyon l.

4. Se yon bon bagay sa ye pou òganizasyon an lefètke li toujou kenbe enfòmasyon sou yon moun ki Temwen Jewova. Si enfòmasyon sa yo ta efase sa t ap gen move konsekans sou fason òganizasyon an fonksyone.

Si yon moun panse yo pa t respekte dwa l genyen, li ka ekri komite filyal la pou esplike yo sa nan yon lèt. Li pa dwe kite plis pase de semèn pase anvan pou l voye lèt la.