An 1917, pou premye fwa, Etidyan Labib yo, jan yo te rele Temwen Jewova yo nan epòk la, te òganize yo pou preche nan peyi Meksik. Nan kèk dizèn ane ki te vin apre yo, plizyè santèn moun ki te sensè te kòmanse adore Jewova. Men, pandan Dezyèm Gè mondyal la, gouvènman Meksik la te gen pwoblèm ak kote nou te konn preche yo e ak lokal kote nou te konn reyini yo.

 Nan epòk sa a, te gen yon lwa nan peyi Meksik ki te mande pou tout moun k ap reyini ansanm pou yo adore dwe fè sa sèlman nan youn nan lokal gouvènman an genyen yo. Sa te yon pwoblèm paske nou te konn fè kongrè nou yo nan lokal piblik, byen souvan nou te fè reyinyon lasemèn yo nan kay Temwen Jewova e nou te konn preche kay an kay ak nan lari.

 Pou nou te ka obeyi lwa sa a, an 1943 nou te anrejistre kòm yon asosyasyon sivil kiltirèl ki pa gen objektif pou fè lajan, ki t ap ankouraje edikasyon pou byennèt tout moun nan peyi a. Anrejistreman sa a te ban nou dwa pou n travay antanke yon asosyasyon kiltirèl olye yon relijyon. Kòm rezilta, nou te vin pa t oblije fè tout aktivite nou yo nan lokal gouvènman an genyen yo sèlman.

 Aktivite nou yo te gen pwogram ki gen rapò ak kilti e ak edikasyon. Konsa, nou te ranpli tout kondisyon legal anrapò ak asosyasyon sivil e kiltirèl yo (Women 13:1). Natirèlman, objektif nou se te toujou anseye moun yo laverite ki nan Bib la (Ezayi 48:17, 18). Nan yon tikras tan, nou te wè jan Jewova te beni nouvo dispozisyon sa a. Se te baz pou gwo akwasman ki t ap vin genyen pi devan. Anpil Temwen ki la kounye a ka sonje sa.

 Travay prensipal nou nan peyi Meksik se te preche bon nouvèl Wayòm Bondye a. Sepandan, menm jan ak apòt Pòl, nou te adapte fason nou preche a selon sikonstans yo (1 Korentyen 9:20-23). Pa egzanp, lè Pòl t ap pale ak mesye yo nan Areyopaj nan vil Atèn nan, li pa t fè referans dirèk ak Ekriti yo (Travay 17:22-31). Menm jan an tou, lè nou t ap preche nou pa t pot Bib e nou pa t fè referans ak Bib la lè nou t ap kòmanse yon konvèsasyon ak moun yo.

 Men sa Isabel sonje: “Lè n t ap prezante tèt nou, nou te konn di nou se reprezantan yon asosyasyon ki gen rapò ak kilti e ak edikasyon. Souvan, m te plis konn pale de atik Reveye n! yo paske yo pa t konn abòde sijè ki nan Bib la yon fason ki dirèk.” E si mèt kay la te vle aprann plis sou Bondye? Se lè sa a nou te konn pataje verite ki nan Bib la avèk li. Men sa Aurora esplike: “Kòm nou pa t konn soti ak bib, nou te konn etidye anpil vèsè pa kè.” Mèt kay yo te konn byen reyaji lè nou te itilize pwòp bib pa yo.

 Nou te konnen ki jan pou n reponn nenpòt moun ki ta gen dout pou konnen si travay nou an anrejistre legalman (Filipyen 1:7). Lefètke gouvènman an te ban nou kat pou travay la sa te ede anpil. a Men sa María fè konnen: “Nou te toujou soti ak yon kat idantite Sekretè afè etranjè a te siyen pou nou.” Samuel di “Lè otorite yo kanpe nou pou yo mande nou sa n ap fè la a, nou jis konn montre yo kat la.”

 Kat idantite nou an te konn ede nou lè nou jwenn opozisyon. Pa egzanp, men sa Jesús, k ap sèvi nan Eta Jalisco, di: “An 1974 yon foul moun ki te gen yon prèt ki te alatèt yo te pran mwen menm ansanm ak yon koup Temwen pou mennen nou devan otorite ki nan vil la. Yo t ap eseye kanpe travay nou an. Nou te montre yo kat idantite nou an, epi sa te kalme tout moun yo. Apre nou te fin jwenn èd nan domèn legal, nou te ka kontinye ede moun nan zòn nan ki te enterese yo. Jodi a, gen plizyè kongregasyon nan vil la.”

 Antanke yon asosyasyon sivil ki t ap travay pou bay moun yo edikasyon, nou te konn ofri moun yo kou alfabetizasyon gratis. b Men sa Ariel di: “Dispozisyon sa a te vini nan bon moman. Pandan ane sa yo gen anpil moun ki pa t al lekòl, men yo te gen gwo anvi pou yo li Bib la. Nou te aprann yo li ak ekri, epi yon ti tan apre anpil nan yo te kòmanse etidye Labib avèk nou.”

 Men sa Ruth di: “Kou yo fin aprann li, yo te fè pwogrè tousuit nan etid Labib yo. Lefètke yo te vin konn li ak ekri, yo te santi yo te rive fè yon bagay ki enpòtan nan lavi yo e sa te fè yo kontan. Nou te wè ak pwòp je nou tout pwogrè ki te fèt nan domèn espirityèl.”

 Temwen Jewova yo te anrejistre antanke yon asosyasyon sivil e kiltirèl pandan ane 1943 pou rive 1993. Pandan tan sa a, nou te ede plis pase 127 000 moun aprann li ak ekri epi nou te ede plis pase 37 000 lòt vin pi abil nan li ak ekri. Otorite nan gouvènman yo fè louwanj pou tout sa nou te fè pou n aprann moun yo li ak ekri (Women 13:3). Pa egzanp, an 2010 yo te ban nou yon sètifika “pou tout travay di nou te fè pandan plizyè dizèn ane nan ede plizyè milye moun nan Eta Meksik ak nan tout peyi a amelyore lavi yo”.

 Lefètke òganizasyon nou an te anrejistre kòm yon asosyasyon kilti ak edikasyon, nou te ranje kote nou konn fè reyinyon yo tankou klas pou elèv e nou te rele yo sal pou etid sou kilti. Se la nou te konn fè reyinyon n yo e se la nou te konn fè kou alfabetizasyon yo.

 Men sa Ángel esplike: “Souvan, se nan lakay frè yo nou te konn reyini, e anpil nan fanmi sa yo pa t gen gwo mwayen. M te toujou apresye sa. Yo te aksepte mete tout afè yo nan yon pati nan kay la pou yo te ka kite lòt pati a pou n fè reyinyon.”

 Gwo sakrifis sa yo te nesesè. Anpalan de reyinyon kongregasyon yo, men sa Ángel di: “Kèk fwa, te tèlman konn gen anpil moun ki vin asiste reyinyon yo, anpil nan nou te konn oblije kanpe deyò. Nou te konn oblije parèt nan fenèt lè pou n fè kòmantè. Men, nou te toujou kontan la nan reyinyon yo.”

 Pou n evite pwoblèm, nou pa t konn chante oubyen priye fò nan reyinyon yo. Men sa Edmundo di: “Pandan diskou sou kilti a, kounye a nou rele l diskou piblik, oratè a te konn met aksan sou fason konsèy ki nan Bib la ede moun amelyore kilti yo ak lavi yo.” Rive yon lè, nou te menm sispann itilize non liv ki nan Bib la. Ki jan moun ki te vin asiste yo te fè konnen de ki vèsè oratè a t ap pale? Men yon egzanp Manuel ban nou: “Olye pou nou di Revelasyon chapit 21, vèsè 3 ak 4, nou te konn di yon bagay tankou: ‘Liv 66, 21, 3 ak 4.’” Men sa Moises, yon lòt Temwen, ajoute : “Sa te vle di nou te dwe aprann ki chif ki koresponn ak tout liv ki nan Bib la pou n ka jwenn vèsè yo.”

 An jeneral, jan òganizasyon nou an fonksyone nan tout lòt peyi nan monn nan se menm jan tou nou fonksyone nan Meksik. Menm lè te gen restriksyon sou fason nou reyini e nou preche, nou te wè jan Jewova te beni nou. Lè nou te anrejistre antanke yon asosyasyon sivil an 1943, te gen 1 565 pwoklamatè nan peyi Meksik. Yo te rekonèt nou legalman antanke relijyon an 1993. Nan ane sa a kantite pwoklamatè yo an mwayèn te rive nan 366 177. Travay pwoklamatè sa yo te fè a te pèmèt gen plis akwasman toujou. Pou rive nan ane 2021, kantite pwoklamatè a an mwayèn nan peyi Meksik te rive atenn 864 633. Ki leson nou ka aprann nan ti bout istwa sa a?

 Ajisteman lè gen difikilte. Lefètke nou te fè ajisteman sa a nan Meksik, sa te fè nou jwenn otorizasyon legal pou n kontinye travay nou an pandan 50 an. Men sa Mario di: “Pafwa, m te konn mande tèt mwen poukisa nou pa t ka adore Jewova menm jan ak tout lòt frè nan lòt peyi yo. Men, m pa janm tande okenn moun gen dout sou direksyon òganizasyon an te ban nou. Nou te toujou kwè se Jewova k ap dirije pèp li a. Se poutèt sa, nou te toujou obeyi.”

 Konsantre sou travay Jewova a. Men sa Guadalupe esplike: “Nou te tèlman okipe nan travay fè disip la, nou pa t gen tan pou n nan plenyen pou okenn lòt bagay. Sèvis nou t ap bay Jewova a te fè n jwenn anpil kè kontan. Pou nou menm, se sa k te pi enpòtan.”

 Rete pwòch ak kretyen parèy nou yo. Men sa Anita esplike: “Sa nou pa t ka fè nan sal pou etid kiltirèl yo, tankou chante kantik Wayòm yo, nou te konn fè yo lakay nou. Nou te ini e souvan, nou konn pase tan ansanm nan lòt aktivite. Nan aktivite sa yo, nou te toujou mete aktivite espirityèl yo an premye.”

 Men ki sa Florentino di pou l rezime peryòd sa: “Lè m sonje jan sa te ye, m kwè tout sa k rive yo gen yon objektif epi yo te anseye nou kèk leson enpòtan. Pou mwen, li klè, malgre tout sa nou pase, malgre opozisyon nou te jwenn nan travay la, Jewova t ap gide nou.”