Pami plizyè santèn milyon moun k ap viv nan Amerik latin nan, gen plizyè milyon endijèn ki gen pwòp lang yo ak pwòp koutim yo. Anpil nan endijèn sa yo se frè ak sè nou k ap adore Jewova ki bay kilti yo anpil valè. Pou yo ede moun yo konnen verite ki nan Bib la, yo tradui e yo distribye plizyè piblikasyon Temwen Jewova yo nan plis pase 130 lang endijèn yo pale nan Amerik latin nan a. Aktout sa, gen kèk nan yo k ap fè fas ak opozisyon paske yo chwazi sèvi Jewova e yo refize patisipe nan koutim moun yo pratike nan kominote a ki depaman ak sa Bib la anseye. Ki jan n te itilize ofrann nou yo pou ede yo?

 Nan peyi Meksik, frè ak sè nou yo ki nan kominote Wichòl, nan mòn ki nan eta Jalisko, te esplike avèk respè yo pap patisipe nan pratik relijye ki twouble konsyans yo b. Men, sa te fè kèk moun nan kominote a fache. Nan jou ki te 4 desanm 2017, gen yon foul vyolan ki te atake yon gwoup Temwen ak kèk moun ki te ansanm ak Temwen yo. Foul la te fòse yo kite kominote a, yo te detwi sa yo te genyen e yo te menase y ap touye nenpòt moun ki eseye retounen.

 Temwen nan vil ki toupre yo te ede frè ak sè yo jwenn sa yo te bezwen nan moman an. Men, ki jan yo t ap ka retounen lakay yo? Men sa yon frè ki rele Agustin fè konnen: “Nou pa t gen ase lajan pou nou pran yon avoka e nou pa t konnen ki kote nou te ka jwenn ki sa lalwa di sou sa.”

 Lefètke frè yo te jwenn opozisyon konsènan libète pou yo adore, filyal Amerik santral la te aji rapidman. Premye sa yo te fè, yo te mande otorite lokal yo mennen ankèt sou krim yo. Apre sa, yo te resevwa apwobasyon nan men Komite kowòdonatè Kolèj santral Temwen Jewova yo pou yo travay ansanm ak Depatman legal nan syèj mondyal la epi depoze yon plent an favè frè ak sè nou yo k ap viv nan kominote Wichòl. Donk, ka a te rive devan pi gwo tribinal nan peyi Meksik.

 Yon gwoup avoka ki soti nan plizyè peyi te prepare yo pou yo esplike byen klè, menm jan lòt moun dwe respekte kominote endijèn yo, konsa tou kominote yo dwe respekte epi pwoteje libète moun ki ladan yo. Tout moun gen dwa, kèlkeswa kote y ap viv.

 Nan dat 8 jiyè 2020, tout jij nan pi gwo tribinal la te pran desizyon an favè Temwen Jewova yo. Yo te bay lòd pou tout moun yo te mete deyò retounen nan kominote a. Men sa Agustín, nou te pale de li pi wo a, fè konnen pou montre apresyasyon li menm ak lòt frè yo genyen: “Nou rekonesan e nou kontan anpil pou sa frè yo fè pou nou. Si se pa t yo menm, nou pa t ap ka fè anyen.”

 Pandan tan sa a, frè nou yo ki nan San Juan de Ilumán, yon vilaj nan peyi Ekwatè, ki gen anpil endijèn nan vale Otavalo, ap fè fas ak menm kalite opozisyon sa a. An 2014, yo te kòmanse konstwi yon Sal Wayòm apre yo te fin jwenn tout pèmi ki te nesesè yo. Men, gen yon prèt ki te rasanble yon foul ki gen plis pase 100 moun ladan l pou yo fè presyon sou Temwen Jewova yo pou yo kanpe konstriksyon an. Mete sou sa, kominote a te mande Temwen Jewova yo pou yo sispann reyini ansanm pou yo adore Bondye.

 Depatman legal nan filyal peyi Ekwatè ak nan syèj mondyal la te kolabore ansanm pou defann kongregasyon an paske yo te vyole libète pou yo adore. Frè nou yo te pote ka a devan tribinal. Sa te fè kominote a sispann opozisyon an e li te pèmèt kongregasyon an retounen fè reyinyon yo epi fin konstwi Sal Wayòm nan. Men, pou pwoteje dwa frè nou yo alavni, reprezantan nou yo te mande pi gwo tribinal yo pran yon desizyon sou kesyon enpòtan sa a: Èske kominote endijèn yo dwe respekte dwa moun nan genyen kèlkeswa kote y ap viv sou tè a?

 Nan dat 16 jiyè 2020, Tribinal konstitisyonèl peyi Ekwatè, ki se pi gwo tribinal nan peyi a, te tande ka a. Gen frè ki avoka nan peyi Ekwatè ki te reprezante kongregasyon an. Mete sou sa, kat nan frè nou yo ki gen eksperyans nan dwa entènasyonal te pale ak tribinal la. Akoz restriksyon pandemi kowonaviris la, frè nou yo nan anpil lòt peyi, te pale pa mwayen videyo konferans. Se premye fwa yon tribinal te pèmèt yon gwoup legal ki reprezante Temwen Jewova yo nan lemonnantye pou prezante ka yo nan fason sa a c. Ekip la te fè konnen otorite legal entènasyonal yo konfime endijèn yo pa oblije abandone dwa yo genyen tou senpleman paske yo fè pati yon kominote.

 Frè nou yo nan vale Otavalo ap tann desizyon Tribinal konstitisyonèl la avèk enpasyans. Annatandan, yo te vrèman rekonesan pou èd yo te jwenn nan. Men sa César, yon ansyen nan kongregasyon Ilumán Quichua, fè konnen: “Se sèlman Jewova, pa mwayen òganizasyon l lan, ki ka fè yon gwo bagay konsa pou yon ti gwoup moun.”

 Tout avoka ki te enplike nan ka a se Temwen Jewova, e yo kontan pataje konpetans yo san yo pa mande pou peye yo. Epoutan, monte dosye yo, fè preparasyon epi plede devan tribinal mande tan ak lajan. Avoka nou yo ak lòt frè yo te fè plis pase 380 èdtan pou prepare dosye yo e yo te fè 240 èdtan anplis pou yo tradui dokiman pou seyans ki t apral fèt nan peyi Meksik. Se prèske 40 avoka ki soti toupatou nan monn nan ki te fè plizyè santèn èdtan sou ka peyi Ekwatè a. Ki jan nou te reyisi jere depans nou te fè pou n defann frè ak sè nou yo? Sa te rive posib grasa ofrann nou fè nan plizyè fason, jan yo esplike sa sou donate.pr418.com. Mèsi anpil paske nou se moun ki renmen bay.