Nan ane 2020 an, te gen anpil katastwòf natirèl e pandemi kowonaviris la (COVID-19) te kòmanse gaye toupatou nan monn nan. Ki jan Temwen Jewova yo te ede moun ki afekte yo?

 Pandan ane sèvis 2020 an a, Komite kowòdonatè Kolèj santral la te bay apwobasyon pou yo depanse 28 milyon dola b pou n pote èd lè gen katastwòf. Nou te pote èd sa yo bay moun ki te viktim plis pase 200 katastwòf, sa ki gen ladan l moun ki viktim akoz pandemi kowonaviris la, viktim plizyè siklòn, moun ki te afekte akoz inondasyon ki te genyen ann Afrik, moun ki nan grangou akoz rate manje ki genyen nan peyi Venezyela ak moun ki te viktim sechrès nan peyi Zimbabwe. Ofrann nou resevwa yo te ede kouvri depans pou ede anpil moun jwenn manje, dlo, yon kote pou yo rete, rad ak swen medikal, san wete depans pou n achte pwodui ak zouti pou fè netwayaj, pou n fè reparasyon e pou n rekonstwi. Ann pran egzanp kèk fason nou te pote èd.

 Kowonaviris la. Toupatou nan monn nan, pandemi an te afekte frè ak sè n yo nan domèn fizik, nan domèn afektif e nan domèn ekonomik. Pou n rive pote yo èd, nou te òganize plis pase 800 komite sekou toupatou nan monn nan. Frè ki nan komite sa yo te chèche konnen bezwen frè ak sè yo e yo te voye rapò bay Komite kowòdonatè a, konsa frè sa yo te kapab deside pi bon fason pou yo òganize travay sekou a.

 Pandan ane a, komite sekou yo te ede anpil moun jwenn manje, dlo, pwodui ijyèn ak medikaman. Nan kèk ka, komite sekou yo te menm travay ak ansyen nan zòn nan pou ede frè ak sè yo jwenn èd nan men Leta.

 Moun ki pa Temwen Jewova wè travay sekou nou fè yo. Pa egzanp, men sa Field Simwinga, ki se komisè rejyonal Nakonde, nan peyi Zanbi te di kèk nan frè nou yo: “Nou vrèman rekonesan pou bonjan èd nou te bay fanmi sa yo ki te nan bezwen.”

 Rate manje nan peyi Angola. Akoz pandemi kowonaviris la te vin gen mwens manje nan peyi Angola, donk pri manje te ogmante anpil. Li te vin pi difisil chak jou pou anpil nan frè ak sè nou yo jwenn ase lajan pou yo achte manje.

 Frè responsab yo te mande filyal Brezil la pou yo fè pakè manje pou yo voye bay frè ak sè n yo nan peyi Angola. Frè yo te fè anpil rechèch e yo te achte manje angwo yon fason pou yo te byen itilize ofrann yo. Li te koute anviwon 22 dola ameriken pou frè yo achte e pou yo voye chak pakè manje, men chak pakè sa yo peze prèske 20 kilogram (44 liv) e te gen plizyè bagay tankou diri, pwa ak luil ladan yo. Jiska prezan, frè yo deja voye 33 544 pakè manje ki peze antou 654 tòn. Lè yo ajoute èd sa a ak manje yo te jwenn nan zòn yo a, sekou sa a te ede plis pase 50 000 moun jwenn manje pou yo manje!

 Ki sa frè ak sè n yo panse de aranjman sa a pou pote yo èd? Men sa Alexandre, k ap viv nan yon zòn izole nan peyi Angola, di: “Mwen wè l kòm prèv Jewova renmen m e m pa poukont mwen. M gen valè nan je òganizasyon Jewova a!” Men sa Mariza, yon manman k ap leve pitit li poukont li, di: “Jewova te tande priyè m. Mwen di ni li menm, ni òganizasyon l lan mèsi!”

 Sekou nan peyi Zimbabwe. Pandan ane sèvis 2020 an te gen gwo sechrès nan peyi Zimbabwe, donk plizyè milyon moun te soufri akoz rate manje. Plizyè milye Temwen nan peyi a pa t jwenn ase manje pou yo manje.

 Frè responsab yo te òganize senk komite sekou pou ede frè ak sè n yo jwenn manje. Plizyè santèn pwoklamatè te pote èd, yo te òganize pakè manje yo, yo te mete yo nan kamyon, oswa yo te prete machin yo c. Pandan ane sèvis 2020 an, òganizasyon an te depanse 691 561 dola ameriken pou yo ede plis pase 22 700 moun jwenn manje!

 Gen kèk ka kote manje frè ak sè yo te fini nèt anvan manje sekou a te rive. Lè yo te jwenn manje a, frè yo te louwe Jewova. Gen nan yo ki te menm kòmanse chante kantik.

 Nan yon zòn, de Temwen ki vèv te asiste yon reyinyon moun nan zòn nan te òganize pou yo pale sou èd yon ONG t ap ofri. Men, reyinyon an te vin tounen yon zafè politik, donk sè nou yo te deside yo pa t dakò ak sa ki te enplike pou yo resevwa èd la. Lè sè yo t ap kite reyinyon an, lòt moun yo te fawouche yo e yo te di sè yo: “Pa vin mande nou manje pi devan non!” Men, sèlman de semèn apre, yon bon ti tan anvan èd ONG a te rive, frè nou yo te rive nan zòn nan avèk manje sekou a e sè sa yo te jwenn manje pou yo manje!

 Epitou, travay sekou sa a ki te fèt nan peyi Zimbabwe te yon bon opòtinite pou plizyè moun tande laverite. Pa egzanp, ann egzamine sa k te rive Prisca, yon sè k ap viv nan yon ti vilaj. Malgre difikilte li te jwenn akoz sechrès la, Prisca te pase chak mèkredi ak chak vandredi nan travay predikasyon an, menm nan epòk pou yo travay tè a. Moun zòn nan te fawouche l, yo te di l: “Zafè preche sa a ap fè fanmi w mouri ak grangou wi.” Men Prisca te di yo: “Jewova toujou pran swen sèvitè l yo.” Yon ti tan annapre, òganizasyon nou an te voye manje pou Prisca. Sa te enpresyone kèk nan vwazen l yo, yo te di Prisca: “Bondye toujou pran swen w, nou vle aprann konnen plis bagay sou li.” Kounye a, gen sèt nan vwazen l yo ki koute reyinyon nou yo yo pase sou yon stasyon radyo.

 Toutpandan n ap vin pi pwòch tan lafen an, ap toujou gen katastwòf natirèl (Matye 24:3, 7). Nou di nou mèsi anpil pou ofrann nou fè yo e gen plizyè mwayen nou kapab fè sa sou donate.pr418.com. Ofrann sa yo pèmèt nou pote èd nan bon moman pou moun k ap soufri yo.