An mas 2020, lè Òganizasyon mondyal lasante te anonse Covid-19 la se yon pandemi, anpil nan nou pa t ap janm imajine viris la t ap kontinye vale teren pandan plis pase ennan. Plizyè milyon moun, san konte Temwen Jewova yo te soufri nan domèn fizik, emosyonèl ak nan domèn ekonomik akoz efè pandemi an. Ki jan Temwen Jewova yo te òganize pou yo rive pote èd pandan pandemi an?

 Anba direksyon Komite kowòdonatè Kolèj santral Temwen Jewova yo, yo te òganize plis pase 950 komite sekou toupatou nan monn nan pou yo fè fas ak pandemi an. Gendelè, Temwen Jewova yo jwenn èd nan men komite sekou ki nan zòn nan, e gen lòt lè yo jwenn èd nan men gouvènman an. Komite sekou yo konn menm òganize gwo kanpay pou pote èd.

 Ann pran egzanp sa k ap pase nan peyi Paragwe. Yon jounal fè konnen pandemi an afekte sitiyasyon ekonomik lan, sa ki lakòz anpil moun nan peyi Paragwe nan grangou. Men, komite sekou nan peyi Paragwe te deja kòmanse distribye kit ki gen ase pwovizyon pou de semèn, sa gen ladan l manje, pwodui netwayaj, pwodui ijyèn pou yon fanmi ki gen kat moun. Chak kit te vo anviwon 30 dola ameriken.

 Ki jan volontè sekou sa yo pwoteje tèt yo ak lòt moun kont kowonaviris la? Yo mete kachnen e yo kenbe distans sosyal. Mete sou sa, yo verifye lokal konpayi yo achte manje nan men yo a pwòp e yo respekte konsiy sekirite yo, sa ki gen ladan l verifye tout moun k ap prepare kit yo gen ekipman pwoteksyon sou yo. Yo netwaye e yo dezenfekte machin yo e yo dezenfekte kote y ap mete kit yo. Epitou, moun k ap fè livrezon yo kenbe distans sosyal avèk frè ak sè k ap resevwa kit yo.

 Rive nan mwa janvye 2021, Komite kowòdonatè a te apwouve pou depanse plis pase 25 milyon dola ameriken pou pote èd anrapò ak pandemi an. Filyal yo ak komite sekou yo travay di pou yo negosye pi bon pri pou sa yo bezwen yo, konsa yo byen itilize ofrann yo. Pa egzanp, nan peyi Chili, frè yo ki t ap òganize sekou a te vle achte 1 653 liv pwa. Men, pri pwa a te double nan sèlman yon mwa. Dezèdtan apre yo te fin dakò achte pwa a nan pri ki egzajere a, mèt kòmès la te fè yo konnen gen yon lòt kliyan ki te apèn retounen pwa li te achte a. Donk, olye mèt kòmès la te vann frè yo pwa a nan pri ki egzajere a, li te pito revann yo pwa a lòt kliyan an te retounen nan pri mwa pase a.

 Men, lè frè yo te retounen vin chèche pwa a, mèt kòmès la te eseye remonte pri a paske li te akize yo kòmkwa yo t ap mal distribye pwovizyon yo, jan lòt òganizasyon t ap fè sa. Apre youn nan frè yo te fin fè yon priyè tou kout nan kè l, li te esplike mèt komès la yo te deja konnen nan chak kongregasyon kiyès ki vrèman bezwen èd. Epitou, frè yo te esplike l, piske moun yo ki t ap resevwa pwovizyon yo te soti nan diferan kilti, yo te prepare chak kit ak pwovizyon ki t ap itil fanmi yo selon kilti yo. Finalman, yo te asire mèt komès la tout ofrann Temwen Jewova yo resevwa ak tout travay yo fè, moun yo fè l volontèman. Sa te touche mèt komès la. Nonsèlman li te dakò vann yo pwa nan bon pri a, men li te bay 882 liv pwa kòm ofrann sou pwochen kòmann nan.

 Lusu, yon vèv aje nan peyi Liberya, ap viv ak senk moun nan fanmi l. Yon jou maten, pandan yo t ap manje e yo t ap fè tèks pou jounen an, yon pitit pitit Lusu ki gen setan te remake pa t gen manje nan kay la ankò, e li te mande l: “Ki sa nou pral manje?“ Lusu te fè l konnen li te deja priye sou sa e l te gen konfyans Jewova t ap ba yo sa yo bezwen. Nan aprèmidi, ansyen yo nan kongregasyon an te rele Lusu pou l vin chèche kèk pwovizyon. Men sa Lusu fè konnen: “Pitit pitit gason m nan te di, kounye a li konnen Jewova kapab tande priyè nou, paske li te reponn priyè m nan.”

 Gen yon dam k ap viv nan Repiblik demokratik Kongo ki vwazin yon fanmi Temwen Jewova. Lè l te wè jan fanmi sa a te resevwa èd nan men lòt Temwen yo, men sa dam nan di: “Apre pandemi an, n ap vin Temwen Jewova, paske m wè jan yo pran swen frè ak sè yo nan moman difisil sa a.“ Men mari l mande l: “Èske w vle vin Temwen Jewova jis pou yon sak diri?“ Dam nan reponn: “Non, se pa pou sa, men, sak diri a montre bonjan prèv lanmou.”

 Se grasa ofrann nou fè yo ki fè Temwen Jewova yo rive reponn ak bezwen frè ak sè yo pandan pandemi an. Nou di nou mèsi anpil pou ofrann nou fè sou donate.pr418.com.