Jodi a, Temwen Jewova yo resevwa piblikasyon ki baze sou Bib la ak videyo nan fòma elektwonik plis pase anvan. Men, anpil kote sou tè a frè ak sè nou yo pa gen lajan pou fè Entènèt. Gen lòt frè ak sè k ap viv nan zòn kote pa gen kouran souvan, oswa Entènèt la lan, l ap plede tonbe oswa pa gen Entènèt ditou.

 Aktout sa, kounye a, gen anpil nan frè ak sè nou yo ki ka telechaje piblikasyon elektwonik sa yo san yo pa bezwen Entènèt. Ki jan sa rive fèt?

 Ti bwat JW a se yon ti aparèy yo bay kongregasyon kote ki pa gen bon Entènèt yo. Ti bwat sa a gen ladan l: yon woutè (yon ekipman pou voye Wifi) yo achte nan men yon konpayi, yon lojisyèl Depatman enfòmatik Betèl la devlope ak piblikasyon elektwonik ansanm ak videyo yo pran sou sit jw.org la. Chak ti bwat koute anviwon 75 dola ameriken.

 Lè frè ak sè yo rive nan Sal Wayòm nan, yo ka konekte aparèy elektwonik yo ak Ti bwat JW a pa mwayen Wifi, konsa yo ka telechaje piblikasyon ak videyo yo. Menm moun ki gen ansyen telefòn oswa tablèt yo ka konekte. Men, e si yon kongregasyon pa gen Entènèt, ki jan Ti bwat JW a ka gen nouvo piblikasyon yo? Detanzantan, filyal la voye yon djonp ki koute anviwon 4 dola ameriken ki gen nouvo piblikasyon ak videyo ki sou jw.org yo pou frè yo mete sou Ti bwat JW a.

 Ki jan Ti bwat JW a ede frè ak sè n yo? Men sa frè Nathan Adruandra, yon papa k ap viv nan Repiblik Demokratik Kongo, di: “Mwen te fè anpil efò pou m eseye telechaje fim ‘O Jewova [...] mwen fè w konfyans’ lan ak fim Sonje madan Lòt la. Men, mwen pa t janm reyisi, e sa te fè m dekouraje. Kounye a, mwen ka telechaje videyo sa yo sou telefòn mwen. Sa ede n antanke paran pou n pi byen anseye pitit nou yo.”

 Men sa yon frè ki ede kongregasyon nan peyi Nijerya yo konfigire Ti bwat JW a di: “Frè ak sè yo konsidere Ti bwat JW a kòm yon kado espesyal Jewova ba yo. Yo vrèman kontan lefètke kounye a yo ka telechaje piblikasyon ak videyo ki nan Bwat zouti pou anseye a byen fasil.

 Yo deja voye plis pase 1 700 ti bwat sa yo pou frè ak sè k ap viv ann Afrik, nan Oseyani ak nan Amerik disid e yo prevwa voye yo bay plis kongregasyon toujou. Ki kote nou jwenn lajan pou n kouvri depans sa yo? Se pa mwayen ofrann moun fè pou soutni travay mondyal la, e anpil moun fè ofrann sa yo sou donate.pr418.com. Nou di nou mèsi anpil pou ofrann nou yo.