“Sa pa gen lontan, kesyon resevwa manje espirityèl sou fòma elektwonik, nou pa t janm panse sa t ap posib.” Èske w pa dakò? Nou te jwenn pawòl sa yo nan yon diskou ankourajan Geoffrey Jackson te fè nan Dènye enfòmasyon Kolèj Santral la bay # 6 (2020). Apre sa, li te di: “Epi kounye a n ap mande tèt nou ki jan n t ap fè jwenn manje espirityèl pandan pandemi an si nou pa t gen JW Library. Pandan tout ane sa yo, Jewova t ap prepare nou pou n pare pou sitiyasyon sa yo.”

 Ki jan Jewova t ap prepare nou? Ki travay yo te bezwen fè pou yo kreye aplikasyon JW Library a, e ki sa k te nesesè pou yo fè antretyen ladan l e pou yo fè l vin pi bon?

 Nan mwa me 2013, Kolèj santral la te mande depatman pwogramasyon MEPS la, ki nan syèj mondyal la, pou l devlope yon aplikasyon ki gen Tradiksyon monn nouvo a ladan l. Men sa Paul Willies, k ap travay ak depatman sa a di: “Anvan sa, nou potko janm mete yon aplikasyon mobil sou okenn platfòm pou lòt moun telechaje l. Men, nou te mete yon ekip sou pye, nou te kanpe sou kèk lòt pwojè, epi nou te travay ak kèk lòt depatman pou n planifye e pou nou devlope aplikasyon an ak tout sa k t apral ladan l. Nou te konn priye souvan, e grasa èd Jewova, aplikasyon an te soti senk mwa apre sa, nan reyinyon ànyèl la!”

 Lòt defi nou te genyen, se te pou n fè aplikasyon an vin tounen yon bibliyotèk toutbon, kote nou ka jwenn plis piblikasyon e nan plis lang. Rive janvye 2015, pifò piblikasyon nou yo ki ann anglè te disponib nan aplikasyon an e sis mwa apre sa sèlman, itilizatè yo te ka telechaje piblikasyon sa yo nan plizyè santèn lòt lang.

 Depi lè sa a, frè nou yo te amelyore aplikasyon an nan plizyè domèn. Yo te ajoute videyo, yo te mete tout piblikasyon ak tout anrejistreman odyo videyo ki nesesè pou reyinyon yo ansanm nan yon sèl seksyon. Mete sou sa, yo te pèmèt itilizatè yo jwenn enfòmasyon ki soti nan Gid pou fè rechèch la pandan y ap li Labib.

 Yo sèvi ak JW Library sou 8 milyon aparèy chak jou e yo sèvi avè l sou plis pase 15 milyon aparèy chak mwa! Ki sa k dwe fèt pou aplikasyon an kontinye mache byen sou aparèy sa yo? Men esplikasyon frè Willies bay: “Toujou gen travay ki pou fèt nan aplikasyon ki sou aparèy mobil yo. Nou toujou ap travay pou nou mete nouvo bagay sou li e pou nou fè l pi fasil pou moun sèvi avè l. Piske gen mizajou k ap fèt souvan sou nouvo aparèy elektwonik yo, nou dwe toujou ap fè mizajou nan aplikasyon an tou, pou l ka toujou fonksyone byen sou nouvo aparèy yo. Mete sou sa, kòm toujou ap gen nouvo piblikasyon ak anrejistreman k ap parèt, nou toujou bezwen fè antretyen ak mizajou sou aplikasyon an.” Lè n ap kontwole piblikasyon ki parèt nan divès lang yo, kounye a nou gen anviwon 200 000 piblikasyon ak plis pase 600 000 anrejistreman odyo ak videyo ki disponib sou JW Library!

 Pou travay sa yo kontinye fèt nan aplikasyon an se pa òdinatè sèlman nou bezwen. Nou bezwen achte lisans pou n sèvi ak divès pwogram. Gen youn nan lisans yo poukont li ki koute 1 500 dola ameriken pa ane. Anplis de sa, depatman pwogramasyon MEPS la depanse anviwon 10 000 dola ameriken chak ane pou l achte divès mak aparèy pou l ka asire l aplikasyon an ap kontinye mache byen sou nouvo òdinatè, tablèt ak telefòn yo.

 Grasa JW Library gen mwens depans ki fèt pou enprime piblikasyon nou yo, pou relye yo e pou n transpòte yo. Ann pran egzanp bwochi Ann egzamine Ekriti yo chak jou a. Nou te enprime prèske 12 milyon Ann egzamine Ekriti yo — 2013. Men pou ane 2020 an, nou te enprime apeprè senk milyon bwochi, menm lè nou te gen anviwon 700 000 nouvo pwoklamatè sou tout tè a. Poukisa chanjman sa a? Kounye a, anpil nan frè ak sè nou yo li tèks pou jounen an sou JW Library a.

 JW Library ede moun k ap sèvi avè l yo nan anpil sans. Geneviève, k ap viv nan peyi Kanada, twouve aplikasyon an ede l pou l etidye Labib pi souvan. Men sa l fè konnen: “Franchman, si m ta oblije al chèche yon pakèt liv pou m etidye, mwen pa panse mwen t ap fè sa chak maten. Men, avèk aplikasyon an, m jis pran tablèt mwen epi m jwenn tout bagay mwen bezwen ladan l. Lefètke m etidye souvan konsa, sa fè lafwa m pi solid epi relasyon m ak Jewova vin pi sere.”

 Aplikasyon an te pi itil toujou pandan pandemi kowonaviris la. Men sa Charlyn, k ap viv Ozetazini esplike: “Pandan kowonaviris t ap gaye nan monn nan, mwen te pase tout yon ane san m pa t resevwa okenn piblikasyon enprime. Men, aplikasyon JW Library a te toujou fè nou jwenn sa nou bezwen pou lafwa n ret solid. E mwen di Jewova mèsi pou dispozisyon sa a ki plen lanmou.”

 Faye, k ap viv nan peyi Filipin, montre jan anpil moun santi yo. Li di: “Mwen sèvi ak aplikasyon estrawòdinè sa a pou m ka ret pwòch ak Jewova. Se ladan l mwen li an premye lematen. Mwen koute anrejistreman ki ladan l lè m ap fè travay nan kay la. Se li m itilize pou m prepare reyinyon yo. Se li m itilize tou pou m prepare pou m al fè etid mwen an. Lè m gen tan lib, mwen gade videyo sou li. Mwen li atik ki ladan l oswa mwen li Labib lè m m ap tann nan liy. Li vrèman gen anpil valè.”

 Aplikasyon sa a te vrèman itil anpil nan travay predikasyon an tou. Pa egzanp, gen yon sè nan peyi Kamewoun ki te vle sèvi ak yon vèsè li te wè yon lòt sè itilize sa gen kèk semèn. Men, li pa t ka sonje kote vèsè a ye. Men sa l di: “Erezman m te sonje yon fraz nan vèsè a. Mwen te ouvri aplikasyon an, m al nan Bib la epi m chèche fraz la. Menm moman an, m te jwenn vèsè a. Lè m itilize aplikasyon an, m rive jwenn anpil vèsè m konn bliye kote yo ye.”

 Ofrann ou te fè sou donate.pr418.com yo te pèmèt nou devlope aplikasyon JW Library a, yo te pèmèt nou fè antretyen ladan l epi amelyore l pou frè n ak sè n yo sou tout tè a. Mèsi paske nou montre nou donan konsa.

1. Oktòb 2013 — Aplikasyon an parèt avèk Tradiksyon monn nouvo a ki revize.

2. Janvye 2015 — Gen lòt piblikasyon ki vin disponib ann anglè, apre sa yo vin disponib nan plizyè santèn lòt lang.

3. Novanm 2015 — Vin gen posiblite pou moun souliye nan aplikasyon an.

4. Me 2016 — Yo ajoute seksyon Reyinyon an.

5. Me 2017 — Yo ajoute posiblite pou moun pran nòt.

6. Desanm 2017 — Yo ajoute enfòmasyon ki nan Bib etid la.

7. Mas 2019 — Nou vin gen posiblite pou nou telechaje anrejistreman odyo yo, pou n gade videyo san n pa telechaje yo e pou l al nan referans Gid pou fè rechèch la.

8. Janvye 2021 — Yo ajoute plis enfòmasyon pou liv Viv ak kè kontan pou toutan an.