1 Tesalonisyen 4:1-18
4 Anfen, frè nou yo, menm jan NOU te resevwa enstriksyon nan men nou sou fason pou NOU mache pou NOU ka fè Bondye plezi (e vrèmanvre se konsa N ap mache), nou mande NOU e nou ankouraje NOU, nan non Seyè Jezi, pou NOU kontinye fè sa plis toujou,
2 paske NOU konnen ki enstriksyon nou te ban NOU nan non Seyè Jezi.
3 Paske, volonte Bondye, se pou NOU vin sen e se pou NOU evite fònikasyon*.
4 Chak moun pami NOU dwe konnen ki jan pou l gen kontwòl sou pwòp kò l nan sentete ak nan onè,
5 san l pa gen dezi seksyèl pasyone, menm jan ak nasyon sa yo ki pa konn Bondye.
6 Pèsonn pa dwe rive nan pwen pou l fè frè l ditò e pou l retire nan dwa l genyen sou kesyon sa a, paske Jewova bay pinisyon pou tout bagay sa yo, jan nou te deja di NOU sa e jan nou te byen esplike NOU sa tou.
7 Paske, Bondye pa t rele nou pou l tolere nou nan salte, men li te rele nou pou nou sen.
8 Kidonk, moun ki meprize ansèyman sa a, se pa lòm li meprize, men li meprize Bondye, ki ban NOU lespri sen l.
9 Sepandan, anrapò ak lanmou pou frè yo, NOU pa bezwen nou ekri NOU sou sa, paske Bondye anseye NOU pou youn renmen lòt.
10 Anfèt, se sa NOU deja ap fè pou tout frè yo nan tout Masedwàn. Men, nou egzòte NOU, frè nou yo, pou NOU kontinye fè sa plis toujou.
11 Se pou NOU fè tout efò NOU pou NOU viv anpè, pou NOU okipe pwòp zafè NOU e pou NOU travay ak men NOU, jan nou te ban NOU enstriksyon pou NOU fè a,
12 dekwa pou NOU ka mache yon fason ki kòrèk nan je moun ki deyò yo e pou NOU pa manke anyen.
13 Mete sou sa, frè nou yo, nou pa vle pou NOU rete san N pa konn anyen konsènan moun k ap dòmi nan lanmò yo, dekwa pou NOU pa nan lapenn menm jan ak lòt moun yo ki pa gen esperans.
14 Si nou kwè Jezi te mouri e li leve, konsa tou, nou mèt kwè Bondye ap leve moun k ap dòmi nan lanmò yo, pa mwayen Jezi, e l ap mennen yo avèk li.
15 Paske, men sa n ap di NOU ann amoni ak pawòl Jewova: nou menm ki vivan k ap viv pandan prezans Seyè a, nou pap janm pran devan moun k ap dòmi nan lanmò yo.
16 Paske, Seyè a li menm ap desann sot nan syèl la ak yon vwa k ap bay lòd, ak yon vwa akanj, ak twonpèt Bondye, e moun ki mouri ann inyon ak Kris yo ap resisite an premye.
17 Ansuit, nou menm ki vivan k ap viv toujou, nou pral anlve ansanm avèk yo nan nyaj yo pou n rankontre Seyè a anlè a, e konsa n ap toujou ak Seyè a.
18 Kidonk, kontinye konsole NOU youn lòt ak pawòl sa yo.
Nòt anba paj
^ Gade apendis 4.
