2 Tesalonisyen 1:1-12
1 Mwen menm Pòl, ansanm ak Silven ak Timote, m ap ekri kongregasyon ki nan vil Tesalonik la ki ann inyon ak Bondye, Papa nou an, e ak Seyè a, Jezi Kris:
2 Mwen swete pou NOU gen favè san parèy ak lapè ki soti nan Bondye, Papa a, ak nan Seyè a, Jezi Kris.
3 Se yon devwa pou nou pou n toujou di Bondye mèsi pou NOU, frè nou yo. Dayè, se nòmal, paske lafwa NOU ap grandi anpil, e lanmou NOU chak ak lanmou NOU tout ap ogmante youn pou lòt.
4 Se sa k fè, nou menm, nou fyè de NOU pami kongregasyon Bondye yo, paske, nan tout pèsekisyon NOU jwenn ak nan tribilasyon N ap sipòte, NOU andire e NOU demontre lafwa.
5 Se yon prèv ki montre jijman Bondye jis, e sa fè yo vin wè NOU diy pou NOU rantre nan wayòm Bondye a, wayòm NOU vrèman ap soufri pou li a.
6 Paske an reyalite, li jis nan je Bondye pou l fè moun k ap fè NOU pase anba tribilasyon yo sibi tribilasyon tou.
7 Men NOU menm k ap sibi tribilasyon, l ap ban NOU soulajman ansanm avèk nou, nan moman Seyè Jezi ap parèt* nan syèl la avèk zanj pisan li yo
8 nan yon gwo flanm dife, lè l ap vin fè vanjans sou moun ki pa konnen Bondye yo e sou moun ki pa obeyi bon nouvèl sou Jezi, Seyè nou an.
9 Santans moun sa yo pral sibi a se yon destriksyon etènèl k ap retire yo devan Seyè a e devan pisans estrawòdinè l la,
10 nan moman l ap vini pou yo glorifye l ansanm ak sen l yo, e pou tout moun ki demontre yo gen lafwa yo gade l nan jou sa a avèk admirasyon, paske temwayaj nou bay la, NOU akeyi l ak lafwa.
11 Se poutèt sa menm, nou toujou ap lapriyè pou NOU, pou Bondye nou an ka konsidere NOU diy pou apèl li fè a, e avèk pisans, pou l reyalize konplètman tout bon bagay ki fè l plezi e pou l konplete travay lafwa NOU pouse NOU fè a.
12 Se yon fason pou non Jezi, Seyè nou an, ka glorifye nan NOU, e pou NOU ka glorifye ann inyon avèk li, ann amoni ak favè san parèy Bondye nou an ak favè san parèy Jezi Kris, Seyè a.
Nòt anba paj
^ Oswa: “nan moman revelasyon Seyè Jezi”.
