Ebre 4:1-16
4 Donk, piske pwomès pou moun antre nan repo l la toujou la, annou pran prekosyon pou okenn nan nou pa rate l.
2 Paske, yo te anonse nou bon nouvèl la tou, menm jan yo te anonse yo l. Men, pawòl yo te tande a pa t itil yo anyen, paske yo pa t gen lafwa jan moun ki te obeyi yo te gen lafwa a.
3 Anfèt, nou menm ki demontre lafwa, nou antre nan repo a toutbon. Se konsènan repo sa a li te di: “Kidonk, mwen te an kòlè, e mwen te sèmante: ‘Yo pap antre nan repo m nan,’” byenke travay li yo te fini depi lè monn nan te fonde*.
4 Paske, men sa li di nan yon pasaj nan Ekriti yo konsènan setyèm jou a: “E Bondye te pran repo setyèm jou a nan tout travay li t ap fè yo.”
5 E men sa pasaj sa a di ankò: “Yo pap antre nan repo m nan.”
6 Kidonk, etandone gen kèk moun ki poko antre nan repo a, e etandone moun yo te anonse bon nouvèl la an premye yo pa t antre ladan l paske yo te dezobeyi,
7 li fikse yon jou, yon bon tan apre sa, lè li di nan sòm David la, yon bon bout tan apre: “Jodi a”. Tankou l te di anvan sa: “Jodi a, si NOU tande vwa Bondye, pa fè tèt di.”
8 Paske, si Jozye te mennen yo yon kote pou yo repoze, Bondye pa t ap bezwen pale de yon lòt jou apre sa.
9 Donk, rete yon repo ki tankou yon saba pou pèp Bondye a.
10 Paske, moun ki antre nan repo Bondye a pran repo nan travay pa l tou, menm jan Bondye pran repo nan travay li.
11 Kidonk, ann fè tout sa nou kapab pou nou antre nan repo sa a, dekwa pou yon moun pa tonbe poutèt l al suiv menm egzanp dezobeyisans lan.
12 Paske, pawòl Bondye a vivan e li pisan, li pi file pase yon epe ki file de bò, epi li pèse fon jis li separe nanm* nan ak lespri* a, jwenti yo ak mwèl yo, e li kapab rive disène panse ak entansyon ki nan kè yon moun.
13 E pa gen anyen nan kreyasyon an ki kache devan je Bondye, men, tout bagay ekspoze aklè, san anyen pa kouvri yo, devan je sila a nou gen kont pou nou rann nan.
14 Kidonk, piske se yon gran prèt konsa nou genyen ki al nan syèl la, anpalan de Jezi, Pitit Bondye a, annou kontinye fè konnen lafwa nou gen nan li.
15 Paske, nou pa gen yon gran prèt ki pa ka konprann feblès nou, men nou gen yon gran prèt ki te pase anba eprèv nan tout domèn, menm jan avèk nou, men ki san peche.
16 Kidonk, annou pwoche bò kote twòn favè san parèy la, san nou pa pè pale, pou nou ka resevwa mizèrikòd, e pou nou ka jwenn favè san parèy la k ap ede nou nan bon moman.
Nòt anba paj
^ Gade 2yèm nòt ki pou Mt 25:34 la.
^ Oswa: “moun nan, jan l parèt li ye pa deyò”.
^ Oswa: “sa moun nan ye pa anndan”.
