Efezyen 1:1-23
1 Mwen menm Pòl, yon apot Kris Jezi grasa volonte Bondye, m ap ekri moun ki sen nan vil Efèz yo ansanm ak moun ki fidèl ann inyon avèk Kris Jezi yo:
2 Mwen swete pou NOU gen favè san parèy ak lapè ki soti nan Bondye, Papa nou an, ak nan Seyè a, Jezi Kris.
3 Benediksyon pou Sila a ki Bondye Seyè nou an Jezi Kris, e ki Papa li. Paske, grasa lespri sen l, li ban nou tout kalite benediksyon nan syèl la, poutèt nou ann inyon avèk Kris,
4 paske li te chwazi nou pou nou ann inyon avèk li depi anvan monn nan te fonde*, pou nou ka vin sen e pou nou ka vin san tach devan l nan lanmou.
5 Paske, li te chwazi nou davans pou l adopte nou kòm pitit li, grasa Jezi Kris, selon bon plezi l e selon volonte l,
6 pou li ka jwenn louwanj poutèt favè san parèy li a ki gen glwa, favè li ban nou pa mwayen Byenneme l la.
7 Piske Pitit li a te peye ranson an, nou jwenn liberasyon nou grasa san li, wi, nou jwenn padon pou fot nou yo, selon richès favè san parèy Bondye a.
8 Li ban nou favè sa a ann abondans ansanm ak tout sajès ak bon konprann,
9 lè li fè nou konnen sekrè sakre sou volonte l. Se selon bon plezi l li te deside
10 jere bagay yo nan dènye limit tan fikse yo, yon fason pou l reyini tout bagay ansanm ankò nan Kris, bagay ki nan syèl la ak bagay ki sou tè a. Wi, se nan li,
11 e se ann inyon avèk li Bondye te chwazi nou tou kòm eritye, piske Bondye te chwazi nou davans selon objektif li genyen, li menm ki fè tout bagay ann amoni ak volonte l,
12 yon fason pou l ka jwenn louwanj ak glwa nan nou, nou menm ki met espwa nou nan Kris an premye.
13 Men, NOU menm tou, apre NOU te fin tande pawòl verite a, bon nouvèl sou delivrans NOU an, NOU te met espwa NOU nan li tou. Grasa li, apre NOU te fin kwè, Bondye te poze yon so sou NOU tou, anpalan de lespri sen li te pwomèt la,
14 ki se yon garanti davans sou eritaj nou an, pou liberasyon nou menm ki se byen Bondye, grasa yon ranson, pou nou ka fè louwanj pou glwa li.
15 Se poutèt sa, mwen menm tou, depi lè m te tande pale de lafwa NOU genyen nan Seyè Jezi ak lafwa NOU demontre nan fason NOU trete moun ki sen yo,
16 mwen pa sispann di Bondye mèsi pou NOU. Mwen toujou sonje NOU nan priyè m,
17 dekwa pou Sila a ki Bondye Jezi Kris, Seyè nou an, Sila a ki Papa ki gen glwa a, ka ban NOU yon lespri ki gen sajès, e pou l ka ede nou konprann bagay li revele yo, toutpandan n ap vin gen yon konesans egzak sou li.
18 Li ouvri kè NOU e NOU vin wè, dekwa pou NOU ka konnen pou ki esperans li te rele NOU e ki richès li rezève kòm eritaj pou moun ki sen yo nan laglwa,
19 e pou NOU ka konnen ki jan pisans li ban nou an, nou menm ki kwayan, gen yon grandè ki estrawòdinè. Grandè sa a parèt nan aksyon li fè ak fòs li ki pisan,
20 aksyon li te fè lè li te leve Kris sot nan lanmò e lè li te fè l chita adwat li nan syèl la,
21 kote li pi wo lontan pase tout gouvènman, tout otorite, tout pisans, tout dominasyon ak tout non ki genyen, nonsèlman nan sistèm sa a, men tou nan sa ki gen pou vini an.
22 Epitou, li fè tout bagay soumèt anba pye l, e li mete l alatèt tout bagay pou kongregasyon an,
23 ki se kò Kris e ki ranpli ak kalite l yo, li menm ki ranpli tout bagay nan tout moun.
Nòt anba paj
^ Gade 2yèm nòt ki pou Mt 25:34 la.
