Jan 2:1-25
2 Twouve, de jou apre, gen yon resepsyon maryaj ki t ap fèt Kana, nan Galile, e manman Jezi te la.
2 Yo te envite Jezi ak disip li yo nan resepsyon maryaj la tou.
3 Lè diven an fini, manman Jezi di l: “Yo pa gen diven ankò.”
4 Men, Jezi di l: “Ki sa mwen menm avè w gen pou wè nan sa*? Lè m poko rive.”
5 Manman l di moun ki t ap sèvi yo: “Tout sa l di NOU fè, fè l.”
6 Twouve, te gen sis ja an wòch pou met dlo, jan règ sou pirifikasyon Juif yo te genyen yo te egzije sa, e yo chak te ka kenbe de oswa twa gwo bokit dlo.
7 Jezi di yo: “Plen ja yo dlo.” E yo plen yo ra bouch.
8 Apre sa, li di yo: “Kounye a, pran enpe pot bay moun k ap dirije resepsyon an.” Epi, yo fè sa.
9 Lè moun k ap dirije resepsyon an goute dlo ki te tounen diven an (li pa t konnen kote l te soti, alòske moun ki t ap sèvi yo ki te pran dlo a te konnen), li rele lemarye,
10 li di l: “Tout lòt moun mete bon diven an deyò anvan, e lè moun yo sou, yo mete diven ki pa fin bon an deyò. Men ou menm, ou sere pi bon diven an pou jis kounye a.”
11 Se Kana, nan Galile, Jezi te reyalize sa. Se te kòmansman siy li yo. Li te fè pouvwa li parèt klè, e disip li yo te mete lafwa nan li.
12 Apre sa, li menm, manman l, frè l yo ansanm ak disip li yo desann Kapènawòm, men yo pa t pase anpil jou la.
13 Fèt Pak Juif yo te toupre rive. Jezi monte Jerizalèm.
14 Lè l rive nan tanp lan, li jwenn moun ki t ap vann bèf, mouton ak pijon, ansanm ak moun ki te chita sou chèz yo ap chanje lajan.
15 Epi, li fè yon fwèt ak kòd, li mete yo tout deyò ansanm ak mouton yo ak bèf yo, li fè yo soti nan tanp lan, li gaye pyès monnen moun ki t ap chanje lajan yo e li chavire tab yo.
16 Epi, li di moun ki t ap vann pijon yo: “Retire bagay sa yo la a! Sispann fè kay Papa m nan tounen yon kay kote yo fè komès!”
17 Lè sa a, disip li yo vin sonje sa k te ekri a: “Zèl mwen genyen pou kay ou a ap tankou yon dife anndan m.”
18 Se sa k fè, Juif yo reponn li: “Ki siy ou ka ban nou pou w montre nou ou gen dwa fè bagay sa yo?”
19 Jezi reponn yo, li di: “Kraze tanp sa a, e nan twa jou m ap mete l kanpe.”
20 Lè sa a, Juif yo di: “Yo te pran karannsizan pou yo bati tanp sa a, epi ou menm, pou w ta mete l kanpe nan twa jou?”
21 Men, lè l t ap pale de tanp lan, se de kò l li t ap pale.
22 Se sa k fè, lè l te leve sot nan lanmò, disip li yo vin sonje li te konn di sa. E yo vin kwè sa Ekriti yo di a ak sa Jezi te di a.
23 Men, pandan l te Jerizalèm nan fèt Pak la, anpil moun te mete lafwa nan non l, lè yo te wè siy li t ap reyalize yo.
24 Men, Jezi li menm pa t fè yo konfyans, paske li te konnen yo tout,
25 e li pa t bezwen pèsonn di l kiyès lòm ye, paske li menm li te konnen ki sa ki nan lòm.
Nòt anba paj
^ Mo pou mo: “Ki rapò mwen gen avè w, madanm?” Se yon ekspresyon yo te konn itilize pou yo mete yon moun nan plas li, e pou yo montre yo pa dakò menm ak sa l di a.
