Lik 15:1-32
15 Twouve, tout pèseptè yo ansanm ak tout moun ki t ap pratike peche yo t ap pwoche kote l pou yo koute l.
2 Poutèt sa, ni Farizyen yo, ni espè nan Lalwa yo te tonbe plenyen, yo t ap di: “Mesye sa a byen akeyi yon bann moun k ap pratike peche e l ap manje avèk yo.”
3 Lè sa a, li pran yon egzanp avèk yo, li di yo:
4 “Mesye, kiyès pami NOU, si l gen san mouton, epi li pèdi youn ladan yo, ki pap kite katreven diznèf lòt yo dèyè nan dezè a pou l al chèche sa k pèdi a jiskaske li jwenn li?
5 E lè l jwenn li, l ap mete l sou zepòl li e kè l ap kontan.
6 Lè l rive lakay li, l ap rele zanmi l ak vwazen l, l ap di yo: ‘Vin rejwi avè m, paske mwen jwenn mouton m nan ki te pèdi a.’
7 Donk, m ap di NOU sa: Ap gen plis kè kontan nan syèl la pou yon sèl pechè ki repanti pase pou katreven diznèf moun ki jis ki pa bezwen repanti.
8 “Oswa ki fi, si l gen dis drak*, epi li pèdi youn ladan yo, ki pap limen yon lanp, e ki pap bale kay li pou l chèche drak la byen chèche jiskaske li jwenn li?
9 Lè l jwenn li, l ap rele zanmi l ak vwazin li, l ap di yo: ‘Rejwi avè m, paske mwen jwenn drak mwen te pèdi a.’
10 Donk, m ap di NOU sa: zanj Bondye yo kontan anpil lè gen yon pechè ki repanti.”
11 Apre sa, li di: “Gen yon mesye ki te gen de pitit gason.
12 Pi jèn nan di papa l konsa: ‘Papa, ban m pòsyon byen pa m.’ Konsa, papa a separe byen li te genyen yo ba yo.
13 Kèk jou apre, pi jèn nan ranmase tout afè l, li ale nan yon peyi byen lwen, epi, l al banboche kote l ale a, li gaspiye tout byen l.
14 Lè l fin depanse tout lajan l, gen yon gwo grangou ki frape peyi kote l te ye a. Kounye a, li vin nan nesesite.
15 Li menm al travay pou yon sitwayen nan peyi sa a, e misye voye l nan jaden l al gade kochon.
16 Li te anvi plen vant li ak manje kochon yo te konn manje yo, men pèsonn pa t ba l anyen.
17 “Lè li retounen nan bonsans li, li di tèt li: ‘Valè travayè papa m genyen ki dwe chaje pen pou yo manje, gade m ap mouri grangou isit la!
18 M ap leve, mwen pral jwenn papa m, m ap di l: “Papa, mwen peche kont Bondye* e kont ou menm.
19 Mwen pa merite pou yo rele m pitit ou ankò. Konsidere m tankou youn nan travayè w yo.”’
20 Vrèmanvre, li leve, li tounen al jwenn papa l. Pandan li te nan yon bèl distans, papa a wè misye, kè l fè l mal pou li, li kouri, li ba l yon bèl akolad, e li bo l avèk tandrès.
21 Epi tigason an di Papa a: ‘Papa, mwen peche kont Bondye e kont ou menm. Mwen pa merite pou yo rele m pitit ou ankò. Konsidere m tankou youn nan travayè w yo.’
22 Men, papa a di esklav li yo: ‘Fè vit! Pran yon wòb long, pi bèl la, mete l sou li. Met yon bag nan dwèt li, e met yon sandal nan pye l.
23 Epi, vin ak jèn towo bèf nou t ap angrese a, touye l, epi annou manje, annou fete.
24 Paske, pitit gason m nan te mouri, li retounen ap viv ankò. Li te pèdi, nou jwenn li.’ Epi, yo kòmanse fete.
25 “Twouve, pi gran pitit gason an te nan jaden. Etan l ap vini, lè l rive pre kay la, li tande yon bri mizik ak dans.
26 Donk, li rele youn nan sèvitè yo, epi li mande l sa k genyen.
27 Sèvitè a di li: ‘Frè w la tounen, e papa w touye jèn towo bèf nou t ap angrese a, paske li retounen vin jwenn li an sante.’
28 Sa w tande a, misye move, li pa vle antre nan kay la. Lè sa a, papa l soti e li kòmanse sipliye l pou l antre.
29 Li reponn papa a: ‘Gad depi konbyen ane m ap travay pou ou tankou esklav, e m pa janm dezobeyi w, pa menm yon fwa, epoutan ou pa janm ban m yon ti kabrit pou m pran plezi m ak zanmi m yo.
30 Men, pitit ou a annik vini, li menm ki fin gaspiye tout byen w nan pwostitye, ou gentan touye jèn towo bèf nou t ap angrese a pou li.’
31 Lè sa a, papa a di l: ‘Pitit mwen, ou te toujou la ansanm avè m, e tout sa m genyen se pou ou.
32 Men nou dwe fete, nou dwe rejwi, paske, frè w la te mouri, li retounen ap viv. Li te pèdi, nou jwenn li.’”
