1 Samyèl 11:1-15
11 Annapre, Nahach, youn nan desandan Amon yo+, te vin fè lagè ak moun nan vil Jabès+, nan tèritwa Galaad. Tout mesye nan Jabès yo te di Nahach: “Fè yon alyans* avèk nou e n ap vin sèvitè w.”
2 Nahach, desandan Amon an, di yo: “M ap fè alyans lan avèk nou akondisyon mwen pete je dwat nou tout. M ap fè sa pou m imilye tout pèp Izrayèl la.”
3 Ansyen ki nan Jabès yo reponn li: “Ban nou sèt jou pou nou ka voye moun al pote mesaj la nan tout tèritwa Izrayèl. Konsa, si pèsonn pa vin sove nou, n ap rann tèt nou ba ou.”
4 Mesaje yo ale, yo rive Gibeya+ kote Sayil te rete a e yo rakonte pèp la tout pawòl sa yo, epi tout pèp la pran rele ak tout fòs yo.
5 Twouve, Sayil te sot wè bèt li yo nan savann nan. Epi li mande: “Ki sa pèp la genyen? Poukisa y ap kriye?” Yo di l tout pawòl mesye nan Jabès yo te di yo.
6 Lespri Bondye te desann sou Sayil+ lè l tande pawòl sa yo, e li te vin fache anpil.
7 Se sa k fè li te pran de towo bèf, li koupe yo fè plizyè moso e li bay mesaje yo moso vyann yo pou yo pote nan tout tèritwa Izrayèl yo, epi mesaje yo di: “Se sa y ap fè bèt nenpòt moun ki pa obeyi lòd Sayil ak Samyèl bay.” E pèp la te vin gen lakrentif pou Jewova, konsa, yo tout te soti ak yon sèl lide nan tèt yo*.
8 Epi, Sayil te konte pèp la nan Bezèk, te gen 300 000 Izrayelit e te gen 30 000 gason ki te sot Jida.
9 Men sa Sayil ak sòlda l yo te di mesaje ki te vini yo: “Men sa pou n di mesye ki nan vil Jabès nan Galaad la: ‘Demen, lè solèy la vin cho, n ap sove nou.’” Menm kote a, mesaje yo al di mesye nan Jabès yo sa, e mesye yo te kontan anpil.
10 Konsa, mesye nan Jabès yo di Nahach: “Demen, n ap rann tèt nou ba ou, e ou mèt fè sa w vle avèk nou+.”
11 Nan demen, Sayil fè pèp la fè twa gwoup, yo antre nan kan an avanjou* e yo kòmanse touye desandan Amon yo+ rive jis lè solèy la vin cho. Moun ki te chape yo te tèlman gaye, pa t gen de moun ki te ret ansanm.
12 Apre sa, pèp la di Samyèl: “Kot moun ki te di: ‘Èske Sayil ap vin wa sou nou’ yo+? Mennen yo la a pou nou touye yo.”
13 Men, Sayil di yo: “Pinga nou touye yon grenn moun jodi a+, paske jodi a Jewova sove pèp Izrayèl la.”
14 Annapre, Samyèl di pèp la: “Ann al Gilgal+ pou nou refè konnen se Sayil ki wa+.”
15 Vrèmanvre, tout pèp la leve y al Gilgal. Lè yo rive, yo mete Sayil wa devan Jewova. Apre sa, yo fè sakrifis kominyon* nan Gilgal devan Jewova+. Epi, Sayil ak tout mesye ann Izrayèl yo te fè yon gwo fèt e yo te kontan anpil+.
Nòt anba paj
^ Oswa: “akò”.
^ Lit.: “tankou yon sèl moun”.
^ Soti vè dezè dimaten rive sizè dimaten.
^ Oswa: “ofrann lapè”.
