1 Kwonik 12:1-40
-
Moun ki te soutni wayòm David la (1-40)
12 Te gen kèk mesye ki te vin jwenn David pandan l te Ziklag+ la, lè l pa t ka deplase jan l vle akoz Sayil+, pitit gason Kich la. Mesye sa yo te pami sòlda vanyan ki t ap ede l fè lagè yo+.
2 Yo te gen banza* nan men yo e yo te ka itilize ni men dwat yo ni men goch yo+ pou yo voye wòch+ e pou yo tire flèch. Yo te moun Benjamen+ menm jan ak Sayil.
3 Ayezè se te chèf yo, epi te gen Jowas. Toule de mesye sa yo se te pitit gason Chema, moun Gibeya+. Te gen Jezyèl ak Pelèt, pitit gason Azmavèt+, te gen Beraka, te gen Jeyi, moun Anatòt,
4 e te gen Ichmaya, moun Gabawon+, yon sòlda vanyan ki te fè pati 30 sòlda yo+ e ki te chèf yo. Mete sou sa, te gen Jeremi, Jayazyèl, Jowanan, Jozabad, yon moun Gedera,
5 Elouzayi, Jerimòt, Beyalya, Chemarya, Chefatya, Arifit la,
6 Èlkana, Ichiya, Azarèl, Jowezè, Jachobeyam, desandan Kore+,
7 Jowela ak Zebadya, pitit gason Jewowam, moun Gedò.
8 Gen kèk mesye nan tribi Gad la tou ki te pran pozisyon pou David e ki t al jwenn li nan dezè a+, kote ki te difisil pou yo atake l la. Se te yon seri sòlda vanyan, ki te antrene pou yo fè lagè. Yo te pare pou yo fè lagè ak gwo boukliye e ak lans yo te genyen yo. Figi yo te tankou figi lyon e yo te rapid tankou kabrit* ki nan mòn yo.
9 Premye a te rele Ezè, dezyèm nan Obadya, twazyèm nan Elyab,
10 katriyèm nan Michmana, senkyèm nan Jeremi,
11 sizyèm nan Atayi, setyèm nan Eliyèl,
12 uityèm nan Jowanan, nevyèm nan Èlzabad,
13 dizyèm nan Jeremi e 11yèm nan Makbanayi.
14 Mesye sa yo te soti nan tribi Gad+ e yo te chèf nan lame a. Sa k pi fèb la te kapab goumen ak 100 sòlda, sa ki gen plis fòs la te kapab goumen ak 1 000 sòlda+.
15 Se mesye sa yo ki te travèse Rivyè Jouden an nan premye mwa a, lè dlo nan rivyè a te debòde a, e ki te fè tout moun ki t ap viv nan plèn yo kouri kite zòn nan nan direksyon lès ak nan direksyon lwès.
16 Gen kèk mesye nan tribi Benjamen ak nan tribi Jida tou ki t al jwenn David kote l te ye ki te difisil pou yo atake l la+.
17 David soti al jwenn yo, epi li di yo: “Si nou vin jwenn mwen nan bon entansyon e nou vle ede m, m ap fè youn ansanm avèk nou. Men, si nou vini pou nou trayi m, pou nou lage m nan men advèsè m yo alòske m pa fè anyen ki mal, se pou Bondye zansèt nou yo wè sa e se pou l jije nou+.”
18 Lè sa a, lespri Bondye vin sou* Amasayi+, li menm ki te chèf sou 30 sòlda yo, epi li di:
“Se moun pa w nou ye, David, nou avè w, pitit gason Jese a+.Lapè avè w e lapè avèk moun ki vin ede w yo,paske Bondye w la ap ede w+.”
Lè sa a, David akeyi yo e li mete yo chèf nan lame a.
19 Gen kèk mesye nan tribi Manase tou ki te kite lame Sayil la e ki t al jwenn David lè David te vini ak moun Filisti yo pou l batay ak Sayil. Men, David pa t ede moun Filisti yo paske chèf moun Filisti yo+ te voye l ale apre yo te fin pale youn ak lòt. Yo te di: “L ap tounen al jwenn mèt li Sayil e sa ap lakòz nou pèdi lavi nou+.”
20 Men non mesye ki te sot nan tribi Manase a e ki t al jwenn li lè li t al Ziklag+ la: Adna, Jozabad, Jedyayèl, Mikayèl, Jozabad, Eliyou ak Ziltayi. Mesye sa yo te chèf sou plizyè milye moun nan tribi Manase+ a.
21 Yo te ede David konbat yon bann vòlè, paske yo tout se te sòlda vanyan, gason ki gen kran+. Yo te vin chèf nan lame a.
22 Chak jou, te gen plis moun ki te vin jwenn David+ pou yo ede l jiskaske li te vin gen yon gwo lame, tankou lame Bondye a+.
23 Men ki kantite gason ki te pare pou yo fè lagè ki te vin jwenn David ak zam nan men yo pandan li te Ebwon+ pou yo te fè l vin wa nan plas Sayil, jan Jewova te bay lòd la+.
24 Nan tribi Jida a, te gen 6 800 gason ki te gen gwo boukliye ak lans nan men yo ki te pare pou yo fè lagè.
25 Nan tribi Simeyon an, te gen 7 100 gason vanyan nan lame a, gason ki gen kran.
26 Pami desandan Levi yo te gen 4 600 gason.
27 Se Jewoyada+ ki te alatèt desandan Arawon yo+. Li te gen 3 700 gason avè l.
28 Te gen Zadòk+ tou, yon jèn gason vanyan ki te gen kran e ki te gen 22 lòt chèf fanmi avè l.
29 Nan tribi Benjamen an, tribi Sayil sot ladan l lan+, te gen 3 000 gason. Anvan sa, pifò ladan yo se te moun ki t ap sèvi Sayil ak moun lakay li.
30 Nan tribi Efrayim nan, te gen 20 800 sòlda vanyan, yon seri gason ki gen kran e ki te gen gwo renome nan fanmi yo.
31 Nan mwatye nan tribi Manase a, yo te chwazi 18 000 gason pou y al jwenn David pou yo fè l vin wa e yo te site non yo.
32 Nan tribi Isaka a, te gen 200 chèf ki te konprann nan ki epòk yo te ye e ki te konnen ki sa pèp Izrayèl la dwe fè. Mesye sa yo te gen tout lòt gason nan tribi yo a souzòd yo.
33 Nan tribi Zabilon an, te gen 50 000 gason ki te ka antre nan lame a. Yo te gen tout kalite zam nan men yo e yo te pare pou yo fè lagè. Yo tout te vin jwenn David e yo te fidèl ak li*.
34 Nan tribi Neftali a, te gen 1 000 chèf. Yo te gen 37 000 gason avèk yo ki te gen gwo boukliye ak lans nan men yo.
35 Nan tribi Dann nan, te gen 28 600 gason ki te pare pou yo fè lagè.
36 Nan tribi Achè a, te gen 40 000 gason ki te ka antre nan lame a e ki te pare pou yo fè lagè.
37 Sou lòt bò Rivyè Jouden an+, nan tribi Ribenn nan, tribi Gad la ak nan mwatye tribi Manase a, te gen 120 000 sòlda ki te gen tout kalite zam nan men yo pou yo fè lagè.
38 Tout sòlda sa yo te pare pou yo fè lagè. Yo te vin Ebwon pou yo fè David wa sou pèp Izrayèl la ak tout kè yo. Tout rès pèp Izrayèl la te vle* fè David vin wa tou+.
39 Tout sòlda sa yo te rete la ak David pandan twa jou. Yo te manje e yo te bwè paske moun Jida yo te fè preparasyon pou yo.
40 Mete sou sa, moun ki te toupre yo e menm moun ki te soti jis nan tribi Isaka, tribi Zabilon ak tribi Neftali te pote manje sou bourik, sou chamo, sou milèt ak bèf. Yo te pote farin, gato ki fèt ak fig frans yo seche e yo byen peze ansanm, gato rezen, diven, luil ansanm ak yon pakèt bèf ak yon pakèt mouton paske te gen anpil kè kontan nan peyi Izrayèl.
Nòt anba paj
^ Gade Lis mo yo esplike yo.
^ Lit.: “gazèl”.
^ Lit.: “vlope”.
^ Oswa: “e kè yo pa t pataje”.
^ Lit.: “te gen yon sèl kè pou yo”.
