1 Wa 7:1-51
7 Salomon te kòmanse bati pwòp kay* pa l+ e li te fin bati l nan 13 an+.
2 Apre sa, li te bati kay yo rele Kay Forè Liban an+ ki te mezire 100 koude* longè sou 50 koude lajè sou 30 koude wotè. Li te bati kay sa a sou kat ranje poto sèd ki te gen travès sou yo ki te fèt ak bwa sèd+.
3 Yo te fè chanm sou bwa travès ki te chita sou poto yo, e chanm sa yo te gen planch sèd ki te kouvri mi yo. Te gen 45 poto, 15 pou chak ranje.
4 Te gen twa ranje fenèt ki gen ankadreman. Chak fenèt te gen yon lòt fenèt anfas li.
5 Tout antre yo ak ankadreman pòt yo te kare* menm jan ak devan fenèt yo, ki te sou twa ranje, youn anfas lòt.
6 Li te bati yon gwo galri yo rele Galri Poto yo. Li te mezire 50 koude longè sou 30 koude lajè. Li te bati yon lòt galri devan galri sa a ki te gen poto tou e ki te byen kouvri.
7 Mete sou sa, li te bati yon galri yo rele Galri Twòn nan+, kote li te konn jije ka yo prezante devan l. Yo te rele galri sa a Galri Jijman an+ tou. Yo te kouvri mi galri a ak planch sèd depi atè rive nan travès plafon an.
8 Kay* kote l t apral rete a te nan lòt lakou a+, pa twò lwen Galri a, e li te sanble ak Galri a. Li te bati yon kay ki te sanble ak Galri sa a pou pitit fi Farawon an tou, ki te madanm li+.
9 Tout konstriksyon sa yo te fèt ak wòch ki te koute chè+ e ki te taye sou mezi. Yo te byen taye chak bò wòch yo avèk si pou taye wòch. Yo te itilize wòch sa yo depi nan fondasyon an rive jis nan tèt mi an, e rive jis nan mi ki nan gwo lakou a+.
10 Fondasyon an te fèt ak gwo wòch ki te koute chè. Gen nan wòch yo ki te mezire dis koude e gen lòt ki te mezire uit koude.
11 Sou wòch sa yo te gen lòt wòch ki te koute chè e ki te taye sou mezi, e te gen bwa sèd.
12 Mi ki te antoure gwo lakou a te fèt ak twa ranje wòch taye ak yon ranje bwa sèd, menm jan ak lakou anndan an+ ak pati ki devan kay Jewova a e ki kole ak kay la+.
13 Wa Salomon te voye chèche Iram+ nan vil Ti.
14 Iram se te pitit yon vèv ki nan tribi Neftali e papa l se te yon moun Ti ki konn fè tout kalite travay ak kuiv+. Iram te fò anpil, li te gen bon konprann+ e li te gen anpil eksperyans nan fè tout kalite travay ak kuiv*. Vrèmanvre, li te vin jwenn Salomon e li te fè tout travay Salomon te ba l fè yo.
15 Li te fonn kuiv pou l fè de poto an kuiv+. Chak poto te mezire 18 koude wotè. Yo te bezwen yon kòd ki mezire 12 koude longè pou yo fè wonn chak poto+.
16 Li te fonn kuiv pou l fè de tèt poto espesyal pou l mete sou poto yo. Chak tèt poto espesyal sa yo te mezire senk koude wotè.
17 Yo te dekore tèt poto espesyal yo ak filè ki te fèt ak ti chenn ki trese tankou kòd+. Yo chak te gen yon filè sou yo ki te fèt ak sèt moso filè.
18 Apre sa, li mete de ranje grenad sou filè ki te dekore chak tèt poto espesyal yo.
19 Tèt poto espesyal yo te mete sou poto ki te devan antre tanp lan te gen fòm flè lis, yo te mezire kat koude wotè.
20 Tèt poto espesyal yo te chita sou poto yo. Pati ki won nan tèt poto espesyal yo te kole ak filè yo. Te gen ranje grenad, antou 200 grenad, ki te toutotou chak tèt poto espesyal+.
21 Apre sa, li mete poto yo devan tanp*+ lan. Li te rele poto li te mete sou bò dwat* la Jakin*, e li te rele poto li te mete sou bò goch la* Bowaz*+.
22 Tèt poto yo te gen fòm flè lis. Se konsa yo te fin fè tout travay ki te gen rapò ak poto yo.
23 Apre sa, li te fonn kuiv e li fè yon gwo basen*+. Basen an te won, bouch li te mezire dis koude sot nan yon bò al nan yon lòt bò e li te mezire senk koude pwofondè. Yon moun te bezwen yon fil ki mezire 30 koude longè pou l fè wonn li nèt+.
24 Mete sou sa, toupre bouch basen an, sou deyò, te gen yon seri dekorasyon ki te sanble ak ti joumou+ ki te fè wonn basen an nèt. Sou chak koude, te gen dis ti dekorasyon. Yo te sou de ranje e yo te koule yo nan moul ansanm ak basen an.
25 Basen an te chita sou 12 towo bèf+, 3 nan yo te gen tèt yo ki bay nan direksyon nò, 3 te gen tèt yo ki bay nan direksyon lwès, 3 te gen tèt yo ki bay nan direksyon sid e 3 te gen tèt yo ki bay nan direksyon lès. Basen an te chita sou towo bèf yo, e dèyè yo tout te bay sou anndan.
26 Epesè basen an se te lajè kat dwèt*. Bouch li te tankou bouch yon gode, tankou yon flè lis ki ouvri. Yo te konn mete anviwon 2 000 bat* dlo nan basen an.
27 Apre sa, li fè dis charyo*+ an kuiv. Chak charyo te mezire kat koude longè sou kat koude lajè sou twa koude wotè.
28 Men ki jan charyo yo te fèt: Yo te gen plak an kuiv sou kote yo, e plak an kuiv yo te nan mitan yon seri ti travès.
29 Sou plak an kuiv yo, te gen desen lyon+, desen towo bèf ak desen cheriben+, e te gen menm desen sa yo sou travès yo. Te gen yon dekorasyon ki vire tou won ni anwo ni anba desen lyon yo ak desen towo bèf yo.
30 Chak charyo te gen kat wou an kuiv, yo te gen aks an kuiv nan mitan wou yo e bagay ki te nan kat kwen charyo yo te sèvi kòm sipò pou wou yo. Sipò yo te anba basen an e sou chak bò, yo te gen dekorasyon ki vire tou won ki fè yon sèl ak sipò yo.
31 Te gen yon ouvèti nan tèt chak charyo ki te mezire yon koude wotè. Ouvèti a te won, li te sèvi kòm yon sipò pou basen an, yon sipò ki te mezire yon koude edmi wotè. Yo te grave yon seri desen nan bouch charyo yo. Plak an kuiv ki te sou kote charyo yo te kare, yo pa t won.
32 Kat wou charyo yo te pa anba plak an kuiv yo e yo te gen sipò ladan yo ki te tache ak charyo yo. Chak wou te mezire yon koude edmi wotè.
33 Wou yo te fèt tankou wou yon charyo nòmal. Sipò yo, arebò yo, jant yo ak reyon yo te fèt ak metal yo te fonn.
34 Chak charyo te gen kat sipò, youn nan chak kwen. Sipò yo te fè yon sèl ak charyo yo.
35 Nan tèt charyo yo, te gen yon pati nan sipò basen an ki te tou won e wotè l se te mwatye yon koude. Ti ankadreman ak pati ki anndan ankadreman yo ki nan tèt charyo yo te fè yon sèl ak charyo yo.
36 Mete sou sa, li te grave desen cheriben, desen lyon, desen pye palmye sou ti ankadreman yo ak pati ki anndan ankadreman yo selon espas ki te genyen. Yo te fè dekorasyon ki vire tou won toutotou l+.
37 Se konsa li te fè toule dis charyo yo+. Yo te koule yo tout nan moul+. Yo tout te sanble, yo te menm gwosè e yo te gen menm fòm.
38 Apre sa, li te fè dis basen an kuiv+. Chak basen te ka kenbe anviwon 40 bat* dlo e yo te mezire kat koude*. Te gen yon basen pou chak charyo.
39 Apre sa, li mete senk charyo sou bò dwat kay la e li mete senk lòt yo sou bò goch kay la. Li mete gwo basen an sou bò dwat kay la, nan direksyon sidès+.
40 Se Iram+ ki te fè basen yo, pèl yo+ ak kivèt yo+ tou. Konsa, Iram te fin fè tout travay li te gen pou l fè pou wa Salomon pou kay Jewova a+. Men bagay li te fè yo:
41 de poto yo+ ansanm ak tèt poto espesyal ki te gen fòm bòl e ki te sou tèt de poto yo, de filè+ pou dekore tèt poto espesyal sa yo ki te sou tèt de poto yo,
42 li te fè 400 grenad+ pou de filè yo, de ranje grenad sou chak filè pou dekore de tèt poto espesyal ki gen fòm bòl ki te sou tèt poto yo,
43 dis charyo yo+ ak dis basen+ pou met sou charyo yo,
44 gwo basen an+ ak 12 towo bèf ki te anba l yo,
45 bokit pou mete sann yo*, pèl yo, kivèt yo ak tout lòt bagay yo. Iram te fè tout bagay sa yo pou wa Salomon, pou kay Jewova a, avèk kuiv yo poli.
46 Wa a te fè yo fè bagay sa yo nan moul ann ajil nan zòn Jouden an, ant Soukòt ak Zaretan.
47 Salomon pa t peze tout bagay sa yo tèlman kantite a te anpil. Yo pa t rive konn pwa kantite kuiv yo te itilize pou fè yo a+.
48 Salomon te fè tout bagay ki pou kay Jewova a. Li te fè lotèl+ annò a, tab annò+ pou yo met pen yo konn prezante devan Bondye kòm ofrann yo,
49 li te fè pòtlanp yo ak bon kalite lò+. Li te met pòtlanp yo devan pyès ki pi anndan an. Senk nan pòtlanp yo te sou bò dwat e senk lòt yo te sou bò goch. Flè ki sou pòtlanp yo+, lanp yo ak pensèt pou kenbe mèch yo te fèt annò+.
50 Li te fè kivèt yo, zouti pou etenn mèch lanp yo+, bòl yo, koup yo+ ak veso pou met chabon dife yo+ ak bon kalite lò, e li te fè sipò pou pivo pòt pyès ki pi anndan an+, sa vle di Kote ki pi sen an, ansanm ak sipò pou pivo pòt tanp lan+ annò.
51 Konsa, wa Salomon te fin fè tout travay li te gen pou l fè pou kay Jewova a. Apre sa, li pote bagay David, papa l, te met apa pou Bondye yo nan kay la+. Li te mete ajan, lò ak lòt bagay yo nan trezò ki nan kay Jewova a+.
Nòt anba paj
^ Oswa: “palè”.
^ Yon koude egal 44,5 sm (17,5 pous). Gade Apendis B14.
^ Oswa: “te gen kat kote; te gen fòm rektang”.
^ Oswa: “Palè”.
^ Oswa: “bwonz”, ni la a ni nan lòt vèsè ki nan chapit sa a.
^ Oswa: “sid”.
^ Petèt li vle di “Avèk fòs”.
^ Oswa: “bò nò a”.
^ Sa vle di: “Se pou l [anpalan de Jewova] fè l chita byen djanm”.
^ La a, y ap pale de Kote ki sen an.
^ Oswa: “yon rezèvwa”.
^ Anviwon 7,4 sm (2,9 pous). Gade Apendis B14.
^ Oswa: “anviwon 11 620 galon”. Yon bat egal 22 lit (5,81 gal). Gade Apendis B14.
^ Oswa: “charyo dlo”.
^ Oswa: “e dyamèt yo se te kat koude”.
^ Oswa: “232 galon”. Yon bat egal 22 lit (5,81 gal). Gade Apendis B14.
^ Oswa: “sann ki gra yo”. Sa vle di sann ki gen grès sakrifis yo te fè yo.
