Ezekyèl 41:1-26
41 Apre sa, li mennen m anndan chanm ki sen ki sou deyò a* epi li mezire mi* ki nan antre chanm sa a. Te gen youn sou bò dwat, youn sou bò goch. Longè yo se te sis koude*
2 epi lajè yo se te senk koude. Lajè antre a se te dis koude. Apre sa, li mezire chanm ki sen ki sou deyò a. Li te mezire 40 koude longè sou 20 koude lajè.
3 Apre sa, li antre nan yon lòt chanm* e li mezire mi* ki nan antre chanm sa a. Te gen youn sou bò dwat, youn sou bò goch. Lajè yo se te de koude e longè yo se te sèt koude. Lajè antre a se te sis koude.
4 Apre sa, li mezire chanm ki anfas chanm ki sen ki sou deyò a. Lajè chanm sa a ak longè l se te 20 koude+. Epitou, li di m: “Chanm sa a se Kote ki pi sen an+.”
5 Apre sa, li mezire mi tanp lan. Lajè mi an se te sis koude. Lajè chanm sou kote ki toutotou tanp lan se te kat koude+.
6 Chanm ki sou kote yo te sou twa nivo, youn sou tèt lòt. Te gen 30 chanm anba nèt, 30 chanm nan premye etaj la ak 30 chanm nan dezyèm etaj la. Mi tanp lan te fèt yon fason ki te pèmèt planche chanm sou kote yo jwenn yon plas pou yo chita sou mi tanp lan san yo pa t bezwen pèse mi tanp lan+.
7 Sou chak bò tanp lan, te gen yon pasaj ki vire tou won* e ki te vin pi laj tank l ap monte al nan etaj ki pi wo a+. Yon moun k ap monte nan etaj yo te ka wè chanm ki nan premye etaj yo te pi laj pase chanm ki anba nèt yo e chanm ki nan dezyèm etaj yo te pi laj pase chanm ki nan premye etaj yo.
8 Mwen te wè yon platfòm anba tanp lan e te gen yon pati nan platfòm nan ki te toutotou tanp lan. Wotè fondasyon chanm sou kote yo te egal ak yon wozo sis koude soti depi atè rive nan tèt platfòm nan.
9 Mi deyò chanm sou kote yo te mezire senk koude lajè. Soti nan pwent platfòm nan rive nan mi chanm sa yo, te gen yon espas toutotou tanp lan*.
10 Ant tanp lan ak salamanje* yo+, te gen yon espas vid sou chak bò tanp lan. Lajè yo se te 20 koude.
11 Nan espas ki te nan direksyon nò a, te gen yon kote moun te ka pase pou yo antre nan chanm ki sou kote yo. Nan espas ki nan direksyon sid la tou te gen yon kote moun te ka pase pou yo antre nan chanm sou kote yo. Lajè espas ki te toutotou tanp lan se te senk koude.
12 Nan direksyon lwès, te gen yon gwo kay devan l te bay sou yon espas vid. Lajè l se te 70 koude e longè l se te 90 koude. Epesè mi kay sa a se te senk koude.
13 Li te mezire longè tanp lan e li te jwenn 100 koude. Espas vid la plis kay la* plis lajè mi kay la te egal ak 100 koude.
14 Lajè devan tanp lan ki te bay nan direksyon lès plis espas vid ki bò kote tanp lan te mezire 100 koude.
15 Li te mezire longè kay devan l te bay sou espas vid ki pa dèyè tanp lan ansanm ak galri l yo, ki te sou toule de bò, e li te jwenn 100 koude.
Mete sou sa, li te mezire chanm ki sen ki sou deyò a, chanm ki sen ki anndan an+, galri ki anfas lakou a,
16 espas ki nan chak antre, fenèt ki pi piti sou deyò e ki pi laj sou anndan yo+ ansanm ak koulwa ki te nan twa zòn sa yo. Mi ki toupre antre a te kouvri ak planch+. Planch yo te soti depi atè rive nan fenèt yo. E ankadreman fenèt yo te kouvri ak planch.
17 Li te mezire anlè antre a, anndan tanp lan, deyò tanp lan ak tout mi an.
18 Te gen desen cheriben+ ak desen pye palmye+ ki te taye nan mi an. Chak palmye te nan mitan de cheriben e chak cheriben te gen de fas.
19 Fas moun nan te bay nan direksyon pye palmye a sou yon bò e fas lyon an* te bay nan direksyon pye palmye a sou lòt bò a+. Se konsa yo te taye yo nan tout mi tanp lan.
20 Soti atè rive anlè antre a, te gen desen cheriben ak desen pye palmye ki te taye nan mi tanp lan.
21 Chanbrann* pòt chanm ki sen an te kare+. Devan kote ki sakre a*, te gen yon bagay ki sanble ak
22 yon lotèl ki fèt an bwa+. Wotè l se te twa koude, e longè l se te de koude. Li te gen kat ti poto pou kwen yo. Ni baz* li, ni sou kote yo te fèt an bwa. Apre sa, li di m: “Tab sa a se tab ki devan Jewova a+.”
23 Ni chanm ki sen ki sou deyò a, ni kote ki sakre a te gen de pòt+.
24 Chak pòt yo te gen de batan.
25 Te gen desen cheriben ak desen pye palmye ki te taye nan pòt chanm ki sen an tou, menm jan ak sa ki te sou mi yo+. Te gen yon ti twati ki fèt an bwa ki te pa deyò devan galri a.
26 Te gen fenèt ki pi piti sou deyò e ki pi laj sou anndan+ sou de bò galri a ansanm ak desen pye palmye. Te gen fenèt sa yo ak desen sa yo sou mi chanm sou kote yo ak nan ti twati ki te fèt an bwa a.
Nòt anba paj
^ Lit.: “anndan tanp lan”. Nan chapit 41 ak chapit 42, mo tanp lan gen rapò ak chanm ki sen ki sou deyò a (Kote ki sen an) oswa ak tout tanp lan (tanp lan gen ladan l Kote ki sen an ak Kote ki pi sen an).
^ Y ap pale de koude ki long nan. Gade Apendis B14.
^ Oswa: “poto”.
^ Sa vle di nan chanm ki sen ki anndan an, oswa Kote ki pi sen an.
^ Oswa: “poto”.
^ Sanble y ap pale de yon eskalye ki te vire tou won.
^ Sanble se te yon ti kote pou moun mache ki te toutotou tanp lan.
^ Oswa: “chanm”.
^ Anpalan de kay ki te nan direksyon lwès parapò ak tanp lan.
^ Oswa: “fas jenn lyon ki gen krinyè a”.
^ Sanble y ap pale de antre Kote ki sen an.
^ Sanble y ap pale de Kote ki pi sen an.
^ Lit.: “longè”.
