Jòb 1:1-22
1 Te gen yon nonm nan peyi Ouz ki te rele Jòb*+. Se te yon moun ki dwat e ki fidèl*+. Li te gen lakrentif pou Bondye e li te vire do bay sa ki mal+.
2 Li te gen sèt pitit gason ak twa pitit fi.
3 Li te gen 7 000 mouton, 3 000 chamo, 1 000 bèf* ak 500 bourik* e li te gen anpil sèvitè, se sa k fè li te moun ki te pi enpòtan pami tout moun ki t ap viv nan Lès yo.
4 Chak pitit gason l yo te konn chwazi yon jou pou yo fè gwo resepsyon lakay yo. Yo te konn envite twa sè yo te genyen yo vin manje bwè avèk yo.
5 Chak fwa yo te fin fè yon seri gwo resepsyon, Jòb te konn voye chèche yo pou l pirifye yo. Konsa, li te konn leve granmmaten pou l fè sakrifis yo konn boule nèt+ pou yo chak. Paske Jòb te konn di: “Petèt pitit mwen yo te peche e yo te pale Bondye mal nan kè yo.” Se konsa Jòb te toujou fè+.
6 Twouve, jou a te rive pou pitit vrè Dye a genyen yo*+ te antre vin devan Jewova+, e Satan+ te antre nan mitan yo tou+.
7 Lè sa a, Jewova mande Satan: “Ki kote w soti?” Satan reponn Jewova: “Mwen sot fè yon vire won sou tè a e mwen sot gade sa k ap pase sou li+.”
8 Epi, Jewova di Satan: “Èske w wè* Jòb, sèvitè m nan? Pa gen pèsonn tankou l sou tè a. Li se yon moun ki dwat e ki fidèl nan tout bagay*+. Li gen lakrentif pou Bondye e li vire do bay sa ki mal.”
9 Lè sa a, Satan reponn Jewova: “Èske se pou granmesi Jòb gen lakrentif pou Bondye+?
10 Èske w pa fè yon lantouray pou pwoteje ni li menm+, ni fanmi l, ni tout sa l genyen? Ou beni travay li fè+, epi twoupo bèt li yo gaye nan peyi a.
11 Men, kounye a, fè yon chanjman, lonje men w, detwi tout sa l genyen, e san mank, l ap ret nan figi w li manke w dega.”
12 Lè sa a, Jewova di Satan: “Gade! Tout sa l genyen nan men w*. Sèl bagay, pinga w touche l!” Epi, Satan sot devan fas Jewova+.
13 Se konsa, nan jou pitit gason ak pitit fi Jòb yo t ap manje e yo t ap bwè diven lakay pi gran frè yo a+,
14 gen youn nan sèvitè Jòb yo ki te vin di l: “Pandan bèf yo t ap raboure tè e bourik yo t ap manje zèb bò kote yo,
15 moun Seba yo te atake yo, yo pran yo epi yo touye sèvitè yo ak kout epe. Se mwen menm sèl ki chape pou m vin di w sa.”
16 Li potko menm fin pale, yon lòt sèvitè vin di: “Bondye fè dife* sot nan syèl la tonbe sou mouton yo ak sèvitè yo e li kankannen yo. Se mwen menm sèl ki chape pou m vin di w sa.”
17 Li potko menm fin pale, yon lòt sèvitè vin di: “Moun Kalde yo+ fè twa gwoup, yo anvayi chamo yo, yo pran yo, e yo touye sèvitè yo ak kout epe. Se mwen menm sèl ki chape pou m vin di w sa.”
18 Li potko menm fin pale, yon lòt sèvitè ankò vin di: “Pandan pitit gason w yo ak pitit fi w yo t ap manje e yo t ap bwè diven lakay pi gran frè yo a,
19 gen yon gwo van ki sot nan dezè a bridsoukou, li frape kay la nan kat kwen, konsa kay la tonbe sou pitit ou yo e li touye yo. Se mwen menm sèl ki chape pou m vin di w sa.”
20 Menm kote a, Jòb leve, li chire rad sou li e li koupe cheve nan tèt li, apre sa li lage kò l fas atè,
21 epi li di:
“Mwen pa t sot nan vant manman m ak anyen,E mwen pa pral ak anyen+.Se Jewova ki bay+, se Jewova ki pran.Se pou yo kontinye fè louwanj pou non Jewova.”
22 Malgre tout bagay sa yo, Jòb pa t peche, ni li pa t di Bondye fè anyen ki mal*.
Nòt anba paj
^ Petèt, sa vle di: “Yon moun yo pa vle wè”.
^ Oswa: “yon moun ki san repwòch e ki jis”.
^ Lit.: “500 pè bèf”.
^ Lit.: “femèl bourik”.
^ Ann ebre, se yon ekspresyon yo te itilize pou yo pale de zanj yo antanke pitit Bondye.
^ Lit.: “Èske w fikse kè w sou”.
^ Oswa: “yon moun ki san repwòch e ki jis”.
^ Oswa: “anba pouvwa w”.
^ Se kapab tou: “zèklè”.
^ Oswa: “li pa t bay Bondye responsab anyen ki mal”.
