Jòb 2:1-13
2 Apre sa, jou a te rive pou pitit vrè Dye a genyen yo*+ te antre vin devan Jewova+, e Satan te antre nan mitan yo tou pou l vin devan Jewova+.
2 Lè sa a, Jewova mande Satan: “Ki kote w soti?” Satan reponn Jewova: “Mwen sot fè yon vire won sou tè a e mwen sot gade sa k ap pase sou li+.”
3 Epi, Jewova di Satan: “Èske w wè* Jòb, sèvitè m nan? Pa gen pèsonn tankou l sou tè a. Li se yon moun ki dwat e ki fidèl nan tout bagay*+. Li gen lakrentif pou Bondye e li vire do bay sa ki mal. Li toujou fidèl nan tout bagay+, malgre w ap eseye fè m leve kont li+ pou m ka detwi l san rezon.”
4 Lè sa a, Satan reponn Jewova: “Depi yon moun wè lanmò devan l, l ap bay tout sa l genyen pou l sove lavi l*.
5 Men, kounye a, fè yon chanjman, lonje men w, frape l jis nan zo, e san mank, l ap ret nan figi w li manke w dega+.”
6 Lè sa a, Jewova di Satan: “Gade! Li nan men w*. Sèl bagay, pinga w retire lavi l*.”
7 Epi, Satan sot devan fas Jewova, li fè yon pakèt gwo bouton+ leve sou Jòb e yo t ap fè l mal, yo te soti depi nan pla pye l rive nan tèt li.
8 Epi, Jòb te pran yon moso veso ann ajil pou l grate kò l e li te chita nan sann dife+.
9 Alafen, madanm li vin di l: “Kòmsi, ou kontinye ret fidèl toujou? Sa k fè w pa manke Bondye dega, epi w mouri mouri w!”
10 Men, li di madanm li: “W ap pale tankou yon fanm sòt. Èske nou dwe aksepte sa ki bon sèlman nan men vrè Dye a, san nou pa aksepte sa ki pa bon+?” Malgre tout bagay sa yo, Jòb pa t peche ak bouch li+.
11 Te gen twa zanmi Jòb ki te aprann tout malè ki tonbe sou li, yo chak te kite zòn yo te rete a pou yo vin wè l. Se te Elifaz+, moun Teman, Bildad+, desandan Chouwa+, ak Sofa+, desandan Naama. Yo te antann yo pou youn rankontre lòt pou y al wè Jòb pou yo ka pran lapenn pou li e pou yo konsole l.
12 Detan yo byen lwen, yo wè Jòb, men yo pa t rekonèt li. Yo te pran kriye byen fò, yo te chire rad sou yo e yo te voye pousyè anlè sou tèt yo+.
13 Epi, yo te chita atè a avèk Jòb pandan sèt jou, sèt nuit. Pa gen youn nan yo ki te di l yon mo, paske yo te wè jan l te nan yon gwo soufrans+.
Nòt anba paj
^ Ann ebre, se yon ekspresyon yo te itilize pou yo pale de zanj yo antanke pitit Bondye.
^ Lit.: “Èske w fikse kè w sou”.
^ Oswa: “yon moun ki san repwòch e ki jis”.
^ Oswa: “sove nanm li”.
^ Oswa: “anba pouvwa w”.
^ Oswa: “retire nanm li”.
