Pwovèb 24:1-34
24 Pinga w rayi sò moun ki mechan yo,E pinga w anvi vin zanmi yo+.
2 Paske se sou vyolans y ap reflechi nan kè yo,Epi, yo pale ak bouch yo sou fason pou yo met moun nan pwoblèm.
3 Se grasa sajès y ap bati yon kay*+,E se bon jijman k ap fè l rete djanm.
4 Se grasa konesans chanm li yo ap plenAk tout kalite bon bagay ki gen valè+.
5 Yon moun ki gen sajès gen pouvwa+,E grasa konesans, yon moun vin gen plis pouvwa.
6 Lè w suiv bon direksyon*, sa ap ede w mennen batay ou+,E lè gen anpil moun k ap bay konsèy, gen laviktwa*+.
7 Moun sòt la pa ka rive gen vrè sajès la+,Li pa gen anyen pou l di nan antre vil la.
8 Yon moun k ap fè plan pou l fè sa ki mal,Y ap rele l malveyan+.
9 Plan moun sòt la se peche,E moun pa vle wè moun k ap pase moun nan rizib+.
10 Si w dekouraje nan jou malè a*,W ap prèske san fòs.
11 Delivre moun y ap mennen ale pou y al touye yo,E chèche sove moun yo pral touye k ap mache tou faya yo+.
12 Si w di: “Mwen pa t konn sa”,Èske Sila a ki egzamine sa k nan kè moun nan* pap wè sa+?Wi, Sila a k ap gade w la* ap konnen,E l ap fè chak moun peye pou sa yo fè+.
13 Pitit mwen, bwè siwo myèl, paske li bon.Siwo ki sot nan gato myèl bon nan bouch.
14 Menm jan an tou, se pou w konnen sajès bon pou ou*+.Si w jwenn li, w ap gen yon bèl avni,E ou pap pèdi espwa+.
15 Pinga w kite mechanste fè w maske kò w bò kay moun ki dwat la.Pinga w kraze kote l rete a.
16 Paske, moun ki jis la ka tonbe sèt fwa, men l ap leve ankò+.Men, malè ap fè mechan yo kilbite+.
17 Lè ènmi w tonbe, pinga w kontan pou sa.Lè l kilbite, ou pa dwe kontan nan kè w+.
18 Si w kontan nan kè w, Jewova ap wè sa e sa pap fè l plezi.Epi, li pap an kòlè kont moun nan* ankò+.
19 Pinga w fache akoz* mechan yo.Pinga w rayi sò moun ki mechan.
20 Paske, pa gen okenn avni pou moun k ap fè sa ki mal+.Lanp moun ki mechan yo ap etenn+.
21 Pitit mwen, se pou w gen lakrentif ni pou Jewova ni pou wa a+.E pinga w fè zanmi ak moun k ap fè rebèl*+.
22 Paske, malè ap rive sou yo bridsoukou+.Kiyès ki konnen ki malè yo toule de* pral lage sou yo+?
23 Pawòl mwen pral di yo se pawòl moun ki gen sajès:Moun pa dwe gen patipri lè y ap fè jijman+.
24 Yon moun ki di mechan an: “Ou se yon moun ki dwat+”,Pèp yo ap ba l madichon e nasyon yo ap denonse l.
25 Men, sa ap mache byen pou moun ki korije mechan an+.Y ap jwenn anpil benediksyon ak bon bagay+.
26 Moun ap bo moun ki bay repons ki dwat*+.
27 Prepare travay ou gen deyò, epi pare tout bagay nan jaden w.Apre sa, ou mèt bati kay ou*.
28 Pinga w sèvi temwen kont yon moun san w pa konn sa k genyen+.Pinga w sèvi ak bouch ou pou w twonpe moun+.
29 Pa di: “M ap fè l menm sa l te fè m nan.M ap fè l peye sa l fè*+.”
30 Mwen te pase bò jaden parese a+,Bò jaden rezen moun ki pa gen bonsans lan*,
31 Mwen wè jaden an chaje ak move zèb,Se raje ase ki kouvri l,E kloti an wòch ki te bare l la tonbe+.
32 Mwen te pran tan m pou gade l, e sa te fè m reflechi.Mwen wè sa e men leson mwen aprann*:
33 Lè w ret ap fè yon ti dòmi, ou ret ap fè yon ti kabicha,Ou kwaze bra w pou w pran yon ti repo,
34 Enben, lamizè ap vin sou ou tankou yon bandi,W ap vin tèlman nan nesesite, se kòmsi se yon moun ak zam ki vin atake w+.
Nòt anba paj
^ Oswa: “y ap bati moun nan yon kay”.
^ Oswa: “suiv konsèy ki saj”.
^ Oswa: “siksè; delivrans”.
^ Oswa: “nan moman pwoblèm”.
^ Oswa: “egzamine rezon ki fè yon moun aji a”.
^ Oswa: “gade nanm ou an”.
^ Oswa: “sajès dous pou nanm ou”.
^ Anpalan de ènmi an.
^ Oswa: “Pinga w chofe kont”.
^ Oswa: “moun ki pou chanjman”.
^ Anpalan de Jewova ak wa a.
^ Se kapab tou: “Lè yon moun reponn e li di laverite, se tankou l te bay yon bo”.
^ Oswa: “mèt fonde yon fanmi”.
^ Oswa: “M ap koresponn avè l”.
^ Lit.: “ki manke kè a”.
^ Lit.: “e mwen pran disiplin nan”.
