Jeremi 33:1-26
33 Jewova pale ak Jeremi yon lòt fwa ankò pandan Jeremi te fèmen nan Lakou Gad yo toujou+. Li di l:
2 “Men sa Jewova, Bondye ki fè tè a, di, wi, Jewova, Bondye ki te bay tè a fòm e ki fè l chita byen djanm nan, li menm non l se Jewova a:
3 ‘Rele m e m ap reponn ou. M ap kontan fè w konnen bagay ki estrawòdinè, bagay ou pa ka konprann, bagay ou pa t konnen+.’”
4 “Paske, men sa Jewova, Bondye Izrayèl la, di konsènan ni kay nan vil sa a ni kay wa Jida yo yo te kraze pou pwoteje vil la kont epe ènmi an ak ranp ènmi an te bati yo+,
5 konsènan moun ki vin batay ak moun Kalde yo, e konsènan kote sa yo ki plen ak kadav moun mwen touye akoz mwen an kòlè anpil, yon bann moun ki tèlman mechan, yo fè m vire do bay vil sa a,
6 wi, men sa mwen di: ‘M ap geri moun ki nan vil sa a+, m ap ba yo lasante, m ap fè yo refè, m ap ba yo lapè ak sekirite+.
7 M ap fè moun Jida ak moun Izrayèl ki prizonye yo tounen+ e m ap fòtifye yo jan m te fè sa okòmansman an+.
8 Yo pap koupab devan m ankò pou peche yo fè kont mwen yo+, paske m ap padone tout erè ak tout peche yo fè kont mwen yo, pou yo ka vin pwòp nan je m+.
9 Non vil sa a ap fè m kontan anpil e vil la ap vin yon glwa, yon louwanj ak yon bèl bagay pou mwen devan tout nasyon ki sou tè a k ap tande pale de tout byen m fè pou li yo+. Nasyon sa yo ap pè anpil, y ap tranble+ pou tout byen yo wè m fè pou li e poutèt mwen ba l lapè+.’”
10 “Men sa Jewova di: ‘Nou gen pou nou di kote sa a se yon dezè ki pa gen moun ak bèt ladan l, men nan kote sa a, nan vil Jida yo ak nan lari Jerizalèm yo ki blanch, ki pa gen moun ak bèt ladan yo, nou gen pou n tande
11 vwa moun k ap rejwi ankò+, nou gen pou n tande vwa gason ak vwa fi k ap marye k ap rejwi e nou gen pou n tande vwa moun k ap di: “Annou di Jewova, Chèf lame yo, mèsi, paske Jewova bon+. Lanmou fidèl li genyen an ap la pou toutan+!”’
“‘Yo gen pou yo pote ofrann nan kay mwen an pou yo ofri m, mwen menm, Jewova, pou yo di m mèsi+, paske m ap fè moun ki te prizonye yo retounen nan peyi a, y ap vin jan yo te ye anvan an.’ Se sa Jewova di.”
12 “Men sa Jewova, Chèf lame yo, di: ‘Nan dezè sa a ki pa gen moun ak bèt ladan l e nan tout vil li yo ap gen patiraj ankò kote bèje yo ap ka mennen bèt yo al manje+.’
13 “‘Yon lòt fwa ankò, bèje yo gen pou yo fè mouton yo genyen yo pase devan yo pou yo konte yo ni nan vil ki nan zòn ki gen mòn yo, ni nan vil ki nan plèn yo, ni nan vil ki nan sid yo, ni nan tèritwa tribi Benjamen an, ni nan zòn ki toupre Jerizalèm yo+, ni nan vil Jida yo+.’ Se sa Jewova di.”
14 “‘Tande! Gen yon jou k ap vini’, se sa Jewova di, ‘kote mwen pral reyalize bèl pwomès mwen te fè konsènan moun Izrayèl yo ak moun Jida yo+.
15 Lè sa a, nan epòk sa a, m ap fè yon boujon* soti nan David e boujon sa a ap renmen sa ki dwat+. L ap fè moun jwenn jistis nan peyi a e l ap fè sa ki dwat+.
16 Nan jou sa yo, Jida ap jwenn delivrans+ e moun Jerizalèm yo ap abite an sekirite+. E men ki jan y ap rele Jerizalèm: Se Jewova ki fè nou jis+.’”
17 “Paske, men sa Jewova di: ‘Ap toujou gen yon gason pami desandan David yo k ap chita sou twòn Izrayèl la+,
18 e pap janm pa gen yon prèt pami Levit yo pou kanpe devan m pou ofri sakrifis yo boule nèt, pou boule manje angren ak lòt sakrifis ankò.’”
19 Jewova pale ak Jeremi yon lòt fwa ankò. Li di l:
20 “Men sa mwen menm, Jewova, mwen di: ‘Si nou te kapab kraze alyans mwen te fè konsènan lajounen an ak alyans mwen te fè konsènan lannuit lan, pou lajounen ak lannuit pa vini nan moman pou yo vini an+,
21 se lè sa a sèlman mwen t ap kapab kraze alyans mwen te fè ak David, sèvitè m nan+, sa ki t ap fè li pa gen yon pitit gason l pou dirije antanke wa sou twòn li an+, e se lè sa a mwen t ap kapab kraze alyans mwen te fè ak Levit ki prèt yo, sèvitè m yo+.
22 Menm jan bagay ki nan syèl yo tèlman anpil moun pa ka konte yo e sab bò lanmè yo tèlman anpil moun pa ka konte yo, se konsa tou m ap fè desandan David yo*, sèvitè m nan, vin anpil e m ap fè Levit yo, k ap sèvi m, vin anpil.’”
23 Jewova pale ak Jeremi ankò, li di l:
24 “Ou pa tande jan moun yo nan pèp sa a ap di: ‘Jewova ap voye de fanmi li te chwazi yo jete’? Advèsè yo pa gen okenn respè pou pèp mwen an e yo pa konsidere l kòm yon nasyon ankò.
25 “Men sa Jewova di: ‘Menm jan mwen pap janm kraze alyans mwen fè konsènan lajounen e konsènan lannuit lan+, e mwen pap janm aboli lwa mwen mete pou kontwole syèl la ak tè a+,
26 se konsa tou mwen pap janm voye desandan Jakòb yo* ak desandan David, sèvitè m nan, jete pou m pa ta chwazi dirijan pami desandan David yo* pou dirije desandan Abraram, Izarak ak Jakòb yo*. M ap rasanble sa ki prizonye yo+, m ap fè yo tounen, m ap gen pitye pou yo+.’”
Nòt anba paj
^ Oswa: “eritye”.
^ Lit.: “fè semans David”.
^ Lit.: “voye semans Jakòb”.
^ Lit.: “pami semans David la”.
^ Lit.: “dirije semans Abraram, Izarak ak Jakòb”.
