Jeremi 35:1-19
-
Desandan Rekab yo kite yon bèl egzanp obeyisans (1-19)
35 Nan epòk Jewoyakim, pitit gason Jozyas, te wa Jida+, Jewova te pale ak Jeremi, li te di l:
2 “Al kot desandan Rekab yo+, epi pale avèk yo. Apre sa, mennen yo nan kay Jewova a, anndan youn nan salamanje* yo, epi ofri yo diven pou yo bwè.”
3 Vrèmanvre, mwen te mennen Jayazànya, pitit gason Jeremi ki te pitit gason Abatsinya, frè l yo, tout pitit gason l yo ak tout desandan Rekab yo
4 anndan kay Jewova a. Mwen te mennen yo nan salamanje pitit gason Ranan yo, pitit gason Igdalya, yon sèvitè vrè Dye a. Salamanje sa a te akote salamanje chèf yo ki anlè salamanje Maraseya a, pitit gason Chaloum, mesye ki te konn veye pòt yo.
5 Apre sa, mwen mete gode ak koup ki te plen diven devan mesye ki desandan Rekab yo epi mwen di yo: “Bwè yon ti diven.”
6 Men yo di: “Nou pap bwè diven, paske, men ki lòd Jewonadab*+, pitit gason Rekab, zansèt nou an, te ban nou: ‘Ni nou menm, ni pitit nou yo pa dwe janm bwè diven.
7 Nou pa dwe bati kay, nou pa dwe simen semans, nou pa dwe plante oswa achte jaden rezen. Men, nou dwe toujou abite anba tant yon fason pou n ka viv pandan lontan nan peyi kote nou abite kòm etranje a.’
8 Se sa k fè nou kontinye obeyi sa Jewonadab, pitit gason zansèt nou an, Rekab, te di nou, nou fè tout sa li te ban nou lòd fè, nou pa janm bwè diven, ni nou menm, ni madanm nou, ni pitit gason nou, ni pitit fi nou.
9 Nou pa bati kay pou nou rete, nou pa gen ni jaden rezen, ni tè, ni semans.
10 Nou kontinye abite anba tant e nou kontinye fè tout sa Jewonadab*, zansèt nou an, te ban nou lòd fè yo.
11 Men, lè Nebikadneza*, wa Babilòn nan, te vin atake peyi a+, nou te di: ‘Ann antre Jerizalèm pou nou ka chape anba men lame moun Kalde yo ak lame moun Siri yo.’ Se sa k fè nou abite Jerizalèm kounye a.”
12 Lè sa a, Jewova pale ak Jeremi, li di l:
13 “Men sa Jewova, Chèf lame yo, Bondye Izrayèl la, di: ‘Al di moun Jida yo ak moun ki abite Jerizalèm yo: “Èske m pa t kontinye mande nou pou nou obeyi sa m di nou+?” Se sa Jewova di.
14 “Jewonadab, pitit gason Rekab, te bay desandan l yo lòd pou yo pa bwè diven e jis jodi a yo pa bwè diven paske yo obeyi sa l te di yo. Konsa, yo obeyi lòd zansèt yo a te ba yo+. Sepandan, nou menm nou pa obeyi m, malgre mwen pa sispann* pale avèk nou+.
15 Mwen pa t sispann voye pwofèt yo, sèvitè m yo, kote nou, mwen pa t sispann* voye yo kote nou+ pou yo di nou: ‘Tanpri, se pou nou chak kase tèt tounen, se pou nou kite move chemen nou ladan l lan+ epi se pou nou fè sa ki dwat! Pa mache dèyè lòt dye yo, pa sèvi yo. Konsa, n ap ka kontinye abite nan peyi mwen te bay nou menm ak zansèt nou yo+.’ Men, nou pa t koute m, nou pa t obeyi m.
16 Desandan Jewonadab yo, pitit gason Rekab la, obeyi lòd zansèt yo a te ba yo+, men, nou menm ki nan pèp sa a, nou pa koute m.”’”
17 “Kidonk, men sa Jewova, Bondye ki Chèf lame yo, Bondye Izrayèl la, di: ‘M ap lage tout malè mwen te di m ap voye yo sou Jida ansanm ak tout moun ki abite Jerizalèm yo+, paske mwen te pale avèk yo, men yo pa t koute m. Mwen te kontinye rele yo, men yo pa t reponn+.’”
18 Apre sa, Jeremi di desandan Rekab yo: “Men sa Jewova, Chèf lame yo, Bondye Izrayèl la, di: ‘Piske nou obeyi lòd Jewonadab, zansèt nou an, te ban nou an, nou kontinye obeyi tout sa l te di yo, nou fè egzakteman sa l te di nou fè yo,
19 men sa Jewova, Chèf lame yo, Bondye Izrayèl la, di: “Pap janm pa gen yon desandan Jewonadab*, pitit gason Rekab la, pou kanpe devan m pou sèvi m.”’”
Nòt anba paj
^ Oswa: “chanm”.
^ Lit.: “Jonadab”. Se yon fòm kout pou Jewonadab.
^ Lit.: “Jonadab”. Se yon fòm kout pou Jewonadab.
^ Lit.: “Nebikadreza”. Se yon lòt fason yo ekri l.
^ Lit.: “mwen leve bonè pou m”.
^ Lit.: “mwen te leve bonè pou m”.
^ Lit.: “Jonadab”. Se yon fòm kout pou Jewonadab.
