Jozye 3:1-17
-
Pèp Izrayèl la travèse Rivyè Jouden an (1-17)
3 Apre sa, Jozye leve byen bonè nan maten, epi li menm ak tout Izrayelit yo* kite Sitim+, y al bò Rivyè Jouden an. Yo te pase nuit lan la anvan yo travèse rivyè a.
2 Twa jou apre, mesye ki gen otorite+ pami pèp la pase nan tout kan an
3 e yo bay pèp la lòd, yo di yo: “Kou nou wè Levit ki prèt yo+ ap pote lach alyans Jewova, Bondye nou an, nou dwe deplase nan zòn kote nou ye a pou nou suiv Lach la.
4 Men, nou dwe kite yon distans 2 000 koude* anviwon ant nou menm avè l, e pinga pèsonn pwoche toupre l. Konsa, n ap konnen ki wout pou n fè, paske nou potko janm pase nan zòn sa a.”
5 Lè sa a, Jozye di pèp la: “Pirifye tèt nou+, paske demen, Jewova pral fè gwo mèvèy nan mitan nou+.”
6 Apre sa, Jozye di prèt yo: “Pran lach alyans lan+, pase devan pèp la.” Epi, yo pran lach alyans lan, yo pase devan pèp la.
7 Annapre, Jewova di Jozye: “Jodi a, m ap kòmanse onore w devan je tout pèp Izrayèl la+, pou yo ka konnen m ap avè w+ menm jan mwen te avèk Moyiz la+.
8 Men lòd ou dwe bay prèt yo k ap pote lach alyans lan: ‘Lè nou rive bò dlo Rivyè Jouden an, nou dwe al kanpe nan Rivyè Jouden an+.’”
9 Epi, Jozye di Izrayelit yo: “Vini pou nou koute pawòl Jewova, Bondye nou an.”
10 Apre sa, Jozye di: “Konsa, n ap konnen gen yon Bondye vivan nan mitan nou+, e san mank, l ap detwi moun Kanaran yo, desandan Èt yo, Ivit yo, Perizit yo, Gigachit yo, Amorit yo ak moun Jebis yo devan je nou+.
11 Gade! Lach alyans Seyè ki mèt tout tè a ap pase devan nou nan Rivyè Jouden an.
12 Kounye a, pran 12 gason nan tribi Izrayèl yo, youn nan chak tribi+.
13 Kou prèt yo k ap pote Lach Jewova a, Seyè ki mèt tout tè a, met pye yo nan dlo Rivyè Jouden an, dlo Rivyè Jouden an ap sispann koule desann, l ap kanpe dwat tankou yon miray+.”
14 Se konsa, lè pèp la te deplase, anvan menm yo te travèse Rivyè Jouden an, prèt yo ki t ap pote lach alyans lan+ te pase devan pèp la.
15 Kou prèt yo ki t ap pote Lach la rive bò Rivyè Jouden an e yo mete pye yo nan dlo rivyè a (lè sa a, Rivyè Jouden an te anvayi tout zòn arebò l yo+ pandan tout epòk rekòt la),
16 dlo ki t ap koule desann nan te kanpe. Dlo a te kanpe tankou yon miray jis byen lwen nan zòn Adan, yon vil ki toupre Zaretan, pandan rès dlo a te kontinye desann al nan Lanmè Araba, sa vle di Lanmè Sale*. Dlo a te sispann koule desann e pèp la te travèse rivyè a al anfas Jeriko.
17 Pandan tan sa a, prèt yo ki t ap pote lach alyans Jewova a te ret kanpe sou tè sèk+ nan mitan rivyè a, tout nasyon Izrayèl la t ap travèse sou tè sèk+, jiskaske tout nasyon an te fin travèse Rivyè Jouden an.
Nòt anba paj
^ Lit.: “pitit gason Izrayèl yo”.
^ Yon koude egal 44,5 sm (17,5 pous). Gade Apendis B14.
^ Anpalan de Lanmè Mòt.
