Lik 13:1-35
-
Si nou pa repanti, n ap peri (1-5)
-
Egzanp pye fig frans ki pa bay fwi a (6-9)
-
Yon jou saba, Jezi geri yon dam ki domaje (10-17)
-
Egzanp grenn moutad la ak ledven an (18-21)
-
Efò yon moun dwe fè pou l antre nan pòt ki jis la (22-30)
-
“Rena sa a”, anpalan de Ewòd (31-33)
-
Pawòl tris Jezi di sou Jerizalèm (34, 35)
13 Nan epòk sa a, gen kèk moun ki te la ki fè Jezi konnen Pilat te touye kèk moun Galile etan yo t ap fè sakrifis.
2 Men sa li reponn yo: “Èske n panse moun Galile sa yo ki viktim bagay sa yo se yo menm ki te fè plis peche pase tout lòt moun Galile yo?
3 Mwen di nou: Non. Men, si nou pa repanti, nou tout ap peri menm jan an+.
4 Oubyen 18 moun Fò Silowam nan te tonbe sou yo a e ki te mouri yo, èske nou panse se yo menm ki te fè plis peche* pase tout moun k ap viv Jerizalèm?
5 Mwen di nou: Non. Men, si nou pa repanti, nou tout ap peri menm jan avèk yo.”
6 Apre sa, li ba yo yon egzanp, li di yo: “Gen yon mesye ki te gen yon pye fig frans plante nan jaden rezen l. Epi, li vin chèche fwi ladan l, li pa jwenn+.
7 Lè sa a, li di moun ki t ap travay nan jaden rezen an: ‘Sa fè twazan m ap vin chèche fwi nan pye fig frans sa a, mwen pa janm jwenn. Ou mèt koupe l. Poukisa pou l ret nan tè a, piske l pa itil?’
8 Li reponn li: ‘Mèt, kite l pou yon lòt ane ankò. Pandan tan sa a, m ap fouye toutotou l, m ap met fimye.
9 Si l bay fwi, se byen. Men si l pa bay anyen, lè sa a ou mèt koupe l+.’”
10 Twouve, li t ap anseye nan youn nan sinagòg yo yon jou saba.
11 Epi, gen yon dam ki te la ki te gen yon movèzespri sou li ki te fè l malad* depi 18 an, e dam nan te pliye an de, li pa t ka kanpe dwat menm.
12 Lè Jezi wè dam nan, li rele l, li di l: “Madanm, ou delivre anba maladi w la+.”
13 Li poze men l sou dam nan, epi menm kote a, dam nan drese kò l e li kòmanse bay Bondye glwa.
14 Men, mesye ki t ap dirije sinagòg la fache poutèt Jezi te geri dam nan yon jou saba. Li di moun ki te la yo: “Gen sis jou moun gen dwa travay+. Se nan jou sa yo pou nou vin fè geri nou. Pa vin jou saba+.”
15 Men, Seyè a reponn, li di: “Bann ipokrit+! Èske jou saba nou chak ki la a pa demare towo bèf nou oswa bourik nou nan kay kote nou gade yo pou nou mennen yo al bwè dlo+?
16 Èske dam sa a, yon pitit fi Abraram Satan te mare depi 18 an, pa merite pou yo demare l nan kòd sa a yon jou saba?”
17 Ebyen, lè l fin di pawòl sa yo, tout ènmi l yo te vin wont. Men, tout foul moun ki te la yo te kontan pou tout bèl bagay li te fè yo+.
18 Se sa k fè li di: “Ak ki sa Wayòm Bondye a sanble? Ak ki sa mwen ka konpare l?
19 Li tankou yon grenn moutad yon mesye pran li plante nan jaden l, epi li grandi, li vin yon pyebwa, e zwazo nan syèl la fè nich sou branch li+.”
20 Li di ankò: “Ak ki sa mwen ka konpare Wayòm Bondye a?
21 Li menm jan ak yon ledven yon dam pran li mete nan twa gwo mezi* farin jiskaske tout pat la leve+.”
22 Apre sa, li vwayaje sot nan yon vil al nan yon lòt vil, sot nan yon bouk al nan yon lòt, l ap anseye moun toutpandan l sou wout pou l al Jerizalèm.
23 Twouve, gen yon mesye ki di l: “Seyè, èske se kèk grenn moun k ap sove?” Li di moun yo:
24 “Fè gwo efò* pou nou antre nan pòt ki jis la+, paske, m ap di nou sa: Anpil moun pral chèche antre ladan l, men yo pap kapab.
25 Lè mèt kay la leve e li fèmen pòt la, n ap ret kanpe deyò ap frape pòt la, n ap di: ‘Mèt, ouvri pou nou+.’ Men, l ap reponn nou: ‘Mwen pa konn kote n soti.’
26 Lè sa a, n ap di: ‘Se ansanm avè w nou te konn manje e nou te konn bwè. Epitou, ou te konn anseye nan gran wout nou yo.+’
27 Men, lè sa a, l ap di nou: ‘Mwen pa konn kote n soti. Rale kò nou sou mwen, nou tout, bann moun k ap fè sa ki mal!’
28 Se la nou pral kriye e nou pral manje dan, lè nou va wè Abraram, Izarak ak Jakòb ansanm ak tout pwofèt yo nan Wayòm Bondye a, alòske nou menm, yo mete nou deyò+.
29 Anplis de sa, moun ap soti nan lès ak nan lwès, nan nò ak nan sid, y ap vin chita sou tab nan Wayòm Bondye a.
30 Gen nan moun ki te dènye yo k ap premye, e gen nan sa ki te premye yo k ap dènye+.”
31 Nan menm moman sa a, gen kèk Farizyen ki parèt, yo di l: “Ale, kite zòn nan, paske Ewòd vle touye w.”
32 Epi, li di yo: “Al di rena* sa a: ‘M ap chase demon, m ap fè gerizon ni jodi a ni demen, e m ap fini sou twazyèm jou a.’
33 Kèlkeswa sa k pase, mwen dwe kontinye wout mwen jodi a ak demen ak apre demen, paske yo pa ka* touye yon pwofèt lòt kote apa Jerizalèm+.
34 Jerizalèm, Jerizalèm, vil k ap touye pwofèt yo e k ap touye moun yo voye kote l yo ak kout wòch+, se pa ni de ni twa fwa mwen te vle rasanble pitit ou yo, menm jan yon manman poul rasanble ti poul li yo anba zèl li! Men, nou pa t vle sa+.
35 Gade! Bondye kite kay nou an* ban nou*+. M ap di nou sa: Nou pa gendwa wè m ankò, jiskaske nou di: ‘Benediksyon pou moun ki vini nan non Jewova* a+!’”
Nòt anba paj
^ Lit.: “ki te gen plis dèt”.
^ Oswa: “yon espri ki te fè l pa gen fòs”.
^ Lit.: “seya”. Yon seya egal 7,33 lit. Gade Apendis B14.
^ Lit.: “Lite”.
^ Ann Izrayèl, moun yo te konnen rena se yon bèt ki rize.
^ Oswa: “paske li pa posib pou yo”.
^ Anpalan de tanp lan.
^ Se kapab tou: “Yo kite kay nou an ban nou tou vid”.
^ Gade Apendis A5.
