Mak 10:1-52
-
Maryaj ak divòs (1-12)
-
Jezi beni timoun yo (13-16)
-
Yon mesye ki rich poze Jezi kesyon (17-25)
-
Sakrifis moun fè pou Wayòm nan (26-31)
-
Jezi anonse ankò li gen pou l mouri (32-34)
-
Jak ak Jan mande pou yo gen gwo pozisyon (35-45)
-
Jezi se yon ranson pou libere anpil moun (45)
-
-
Jezi geri Batime ki te avèg (46-52)
10 Li kite kote l te ye a, l al nan fwontyè Jide, pa lòtbò Rivyè Jouden an, e yon lòt fwa ankò, foul moun yo vin rasanble bò kote l. Jan l abitye fè sa, li anseye yo ankò+.
2 Epi, Farizyen yo pwoche kote l, yo te vle teste l, e yo mande l si yon gason gen dwa divòse ak madanm li+.
3 Li reponn yo: “Ki kòmandman Moyiz te ban nou?”
4 Yo di: “Moyiz te ban nou pèmisyon pou nou ekri yon papye divòs pou n divòse ak madanm nou+.”
5 Men, Jezi di yo: “Se paske nou gen tèt di+ ki fè l te ekri kòmandman sa a pou nou+.
6 Men, depi nan kòmansman, lè Bondye t ap kreye moun, ‘li te fè ni gason ni fi+.
7 Se poutèt sa, yon gason ap kite papa l ak manman l+,
8 e yo de a ap vin yon sèl chè+.’ Konsa, yo pa de ankò, men yo se yon sèl chè.
9 Kidonk, sa Bondye mete anba menm jouk, pinga lòm separe l+.”
10 Pandan yo te anndan yon kay, disip yo poze l kesyon sou sa.
11 Li di yo: “Nenpòt moun ki divòse* ak madanm li e k al marye ak yon lòt fi, moun sa a fè adiltè+ sou madanm li.
12 Epi, si yon fi divòse* ak mari l, l al marye ak yon lòt gason, fi sa a fè adiltè+.”
13 Twouve, moun yo kòmanse mennen timoun piti ba li pou l ka manyen yo. Men, disip yo t ap repouse yo+.
14 Lè Jezi wè sa, li pa t kontan ditou, epi li di yo: “Kite timoun yo vin jwenn mwen, pa eseye bloke yo, paske se pou moun ki tankou yo Wayòm Bondye a ye+.
15 Anverite m ap di nou sa: Nenpòt moun ki pa aksepte Wayòm Bondye a tankou yon timoun piti, li pa gendwa antre ladan l+.”
16 Apre sa, li pran timoun yo nan bra l, li poze men l sou yo, li beni yo+.
17 Pandan l t ap soti pou l ale, gen yon mesye ki kouri vin met ajenou devan l, mesye a mande l: “Bon Anseyan, ki sa m dwe fè pou m gen* lavi ki pap janm fini an+?”
18 Jezi di l: “Poukisa w rele m bon? Pa gen yon moun ki bon, yon sèl bon ki genyen, se Bondye+.
19 Ou konnen kòmandman yo: ‘Pa asasinen moun+, pa fè adiltè+, pa vòlè+, pa bay fo temwayaj+, pa eksplwate moun+, onore papa w ak manman w+.’”
20 Mesye a di l: “Anseyan, depi m piti m ap suiv tout kòmandman sa yo.”
21 Jezi gade l, li santi l gen lanmou pou li, epi li di: “Gen yon bagay ou poko fè: Ale, vann tout sa w genyen, bay pòv kòb la e w ap gen yon trezò nan syèl la. Apre sa, vin suiv mwen+.”
22 Men, pawòl sa a te fè mesye a chagren, li ale byen tris, paske li te gen anpil byen+.
23 Jezi gade toutotou l, apre sa, li di disip li yo: “Ala difisil sa ap difisil pou moun ki gen lajan antre nan Wayòm Bondye a+!”
24 Men, disip yo sezi lè yo tande pawòl li di yo. Lè sa a, Jezi di: “Timoun, ala difisil sa difisil pou moun antre nan Wayòm Bondye a!
25 Li pi fasil pou yon chamo pase nan yon je zegui pase pou yon moun ki rich antre nan Wayòm Bondye a+.”
26 Yo vin pi sezi toujou e yo di l*: “Kiyès menm ki ka sove+?”
27 Jezi gade yo fiks, li di: “Pou lèzòm, sa enposib, men sa pa enposib pou Bondye, paske tout bagay posib pou Bondye+.”
28 Pyè kòmanse pale avè l, li di l: “Gade! Nou kite tout bagay pou nou suiv ou+.”
29 Jezi di: “Anverite m ap di nou sa: Pa gen pèsonn ki kite kay, oswa frè, oswa sè, oswa manman, oswa papa, oswa pitit, oswa jaden poutèt mwen e poutèt bon nouvèl la+,
30 ki pap jwenn depi kounye a 100 fwa plis kay, frè, sè, manman, pitit, jaden, ansanm ak pèsekisyon+, e ki pap jwenn lavi ki pap janm fini an nan sistèm k ap vini an*.
31 Men, anpil moun ki premye ap dènye, e moun ki dènye yo ap premye+.”
32 Twouve, yo te sou wout, y ap monte Jerizalèm, Jezi t ap mache devan yo e yo te boulvèse anpil. Men, lòt moun ki t ap suiv yo te kòmanse pè. Yon lòt fwa ankò, li pran 12 apot yo apa e li kòmanse di yo sa ki pral rive l talè konsa+. Li di:
33 “Gade! N ap monte Jerizalèm. Yo pral livre Pitit lòm nan bay prèt an chèf yo ak espè nan Lalwa yo. Y ap kondane l amò, y ap livre l bay moun nan nasyon yo,
34 y ap pase l nan rizib, y ap krache sou li, y ap bat li ak kout fwèt e y ap touye l. Men, sou twa jou*, l ap leve+.”
35 Jak ak Jan, de pitit Zebede yo+, pwoche kote l, yo di l: “Anseyan, gen yon bagay nou pral mande w la a nou ta renmen w fè pou nou+.”
36 Li di yo: “Ki sa nou vle m fè pou nou?”
37 Yo reponn: “Ban nou posiblite pou youn nan nou chita adwat ou e pou lòt la chita agoch ou lè w va nan glwa w+.”
38 Men, Jezi di yo: “Nou pa konn sa n ap mande a. Èske nou ka bwè sa m pral bwè a? Oubyen èske nou ka resevwa batèm mwen pral resevwa a+?”
39 Yo di l: “Nou kapab.” Lè sa a, Jezi di yo: “Sa m pral bwè a, nou pral bwè l, e batèm mwen pral resevwa a, nou pral resevwa l+.
40 Men, kanta pou nou chita adwat mwen oswa agoch mwen, se pa mwen menm ki gen pou bay sa. Plas sa yo se pou moun yo te prepare yo yo ye.”
41 Lè dis lòt disip yo tande sa, yo vin fache kont Jak ak Jan+.
42 Men, Jezi rele yo vin jwenn li, epi li di yo: “Nou konnen moun yo rekonèt k ap* dirije nasyon yo ap domine sou yo, e gwo zotobre yo ap dirije moun yo ak gwo ponyèt+.
43 Sa pa dwe fèt konsa nan mitan nou. Men, nenpòt moun ki vle vin enpòtan pami nou dwe vin sèvitè nou+,
44 e nenpòt moun ki vle premye pami nou dwe vin esklav nou tout.
45 Paske, menm Pitit lòm nan pa t vini pou moun sèvi l, men li te vini pou l sèvi moun+ e pou l bay lavi l* kòm ranson* pou libere anpil moun+.”
46 Epi, yo antre Jeriko. Men, pandan li menm ak disip li yo ansanm ak yon gwo foul moun t ap kite Jeriko, te gen yon mandyan ki avèg yo rele Batime (pitit Time) ki te chita bò wout la+.
47 Lè l tande se Jezi, moun Nazarèt la, k ap pase, li kòmanse rele e li t ap di: “Jezi, Pitit David+, gen pitye pou mwen+!”
48 Lè sa a, anpil moun kòmanse pale di avè l, yo di l pe bouch li. Men, li kontinye rele pi fò toujou: “Pitit David la, gen pitye pou mwen!”
49 Lè sa a, Jezi kanpe, e li di: “Rele l pou mwen.” Lè sa a, yo rele avèg la, yo di l: “Pran kouraj! Leve, men l ap rele w.”
50 Li voye rad ki te sou rad ki sou li a jete, li leve kanpe byen vit, l al jwenn Jezi.
51 Epi, Jezi di l: “Ki sa w vle m fè pou ou?” Mesye avèg la di l: “Rabouni*, fè m wè ankò.”
52 Lè sa a, Jezi di l: “Ale, lafwa w geri w+.” Menm kote a, mesye a vin wè ankò+, e li kòmanse suiv Jezi sou wout la.
Nòt anba paj
^ Anpalan de yon fi ki divòse san se pa pou imoralite seksyèl.
^ Anpalan de yon fi ki divòse san se pa pou imoralite seksyèl.
^ Lit.: “pou m eritye”.
^ Se kapab tou: “e youn di lòt”.
^ Oswa: “nan tan k ap vini an”. Gade Lis mo yo esplike yo.
^ Lit.: “Men, twa jou apre”.
^ Oswa: “Moun yo rekonèt antanke moun k ap.”
^ Oswa: “nanm li”.
^ Gade Lis mo yo esplike yo.
^ Sa vle di: “Anseyan”.
