Malachi 3:1-18
3 Men sa Jewova, Chèf lame yo, di: “Gade! Men m ap voye mesaje m nan e l ap prepare yon chemen devan m+. Epi, vrè Seyè a, li menm n ap chèche a, ap vini bridsoukou nan tanp li an+. Mesaje alyans lan, sila a ki fè nou plezi a, ap vini. Gade! Wè pa wè, l ap vini.”
2 “Men, kiyès k ap ka sipòte nan jou l ap vini an e ki moun k ap ka kanpe lè l parèt? Paske l ap tankou dife moun k ap fonn metal pou retire salte ladan l e l ap tankou savon*+ moun k ap fè lesiv yo.
3 Epi, l ap chita tankou yon moun k ap fonn ajan, k ap retire salte ladan l e k ap fè l vin pwòp+, epi l ap pirifye pitit gason Levi yo. L ap fè yo vin klere tankou lò ak ajan, e y ap vin moun ki dwat k ap fè ofrann pou Jewova.
4 Ofrann Jida ak Jerizalèm bay kòm kado a ap fè Jewova plezi toutbon, menm jan sa te ye nan tan lontan e menm jan sa te ye nan ansyen tan yo+.
5 “M ap vini pou m jije nou, e san pèdi tan, m ap kondane moun k ap fè maji yo+, moun k ap fè adiltè yo, moun k ap fè fo sèman yo+, moun k ap twonpe moun k ap travay avèk yo+, moun k ap toupizi vèv yo ak timoun ki san papa yo+ ak moun ki refize ede* moun ki etranje+. Moun sa yo pa gen lakrentif pou mwen.” Se sa Jewova, Chèf lame yo, di.
6 “Paske, mwen se Jewova. Mwen pa chanje+. Epi, nou se pitit Jakòb, nou poko disparèt.
7 Depi nan epòk zansèt nou yo, nou te vire do bay lwa m yo, e nou pa t suiv yo+. Tounen vin jwenn mwen, e m ap tounen vin jwenn nou+.” Se sa Jewova, Chèf lame yo, di.
Men, nou di: “Ki jan pou n tounen an?”
8 “Èske yon moun ap vòlè sa ki pou Bondye? Men, se vòlè nou vòlè m.”
Epi, nou di: “Ki jan nou vòlè w la?”
“Nan dizyèm yo* ak nan ofrann yo.
9 Malediksyon tonbe sou nou toutbonvre, paske nou vòlè sa ki pou mwen. Wi, se tout nasyon an k ap fè sa.
10 Pote yon dizyèm nan tout sa n genyen yo nan depo a+ pou ka gen manje nan kay mwen an+. Epi, tanpri, teste m pou n wè si m pap ouvri vàn ki nan syèl la+ pou nou pou m vide benediksyon sou nou jiskaske nou pa manke anyen+.” Se sa Jewova, Chèf lame yo, di.
11 “Mete sou sa, m ap pase krikèt yo lòd, e yo pap detwi sa tè nou yo bay, e pye rezen ki nan jaden nou yo pap sispann donnen+.” Se sa Jewova, Chèf lame yo, di.
12 “Tout nasyon yo ap di nou byennere+, paske n ap vin tounen yon peyi ki fè moun gen kè kontan.” Se sa Jewova, Chèf lame yo, di.
13 “Nou di move pawòl sou mwen.” Se sa Jewova di.
Epi, nou mande: “Ki jan nou di move pawòl sou ou a+?”
14 “Nou di: ‘Sa pa itil anyen pou yon moun sèvi Bondye+. Ki avantaj nou jwenn lè nou fè sa Jewova, Chèf lame yo, mande nou fè e lè n ap mache tou tris devan l?
15 Kounye a, nou konsidere moun ki pran dwa ki pa pou yo kòm moun ki byennere. Mete sou sa, moun k ap fè sa ki mal yo reyisi+. Yo twouve teste Bondye, e anyen pa rive yo.’”
16 Lè sa a, moun ki gen lakrentif pou Jewova yo t ap pale youn ak lòt, chak moun t ap pale ak konpayon l, e Jewova t ap suiv yo, li t ap koute sa yo t ap di. Jewova te bay lòd pou yo ekri non moun ki gen lakrentif pou li yo+ ak moun k ap medite sou non l yo* nan yon liv devan l pou l sonje yo+.
17 Men sa Jewova, Chèf lame yo, di: “M ap fè yo vin pèp mwen+ jou m ap fè yo vin yon byen espesyal* pou mwen an+. M ap gen pitye pou yo, menm jan yon papa gen pitye pou pitit li ki obeyi l+.
18 Yon lòt fwa ankò, n ap wè diferans ant yon moun ki jis ak yon moun ki mechan+, ant yon moun k ap sèvi Bondye ak yon moun ki pap sèvi l.”
Nòt anba paj
^ Oswa: “potas”.
^ Oswa: “moun ki pa respekte dwa”.
^ Oswa: “Nan ladim”.
^ Oswa: “moun k ap reflechi sou non l yo”. Se kapab tou: “moun ki bay non l anpil valè yo”.
^ Oswa: “yon byen ki gen anpil valè”.
