Matye 16:1-28
16 Farizyen yo ak Sadiseyen yo pwoche kote l, epi pou yo ka teste l, yo mande l pou l fè yo wè yon siy ki sot nan syèl la+.
2 Men sa l reponn yo: “Lè aswè rive, nou di: ‘Tan an ap bèl, paske syèl la wouj kou dife.’
3 E nan maten, nou di: ‘Jodi a l ap fè frèt e l ap fè lapli, paske syèl la wouj kou dife, men li sonm.’ Nou konn ki jan pou nou entèprete fason syèl la ye, men nou pa ka entèprete siy tan yo.
4 Nou se yon jenerasyon ki mechan e ki pa fidèl ak Bondye*. Nou kontinye ap chèche yon siy, men, sèl siy y ap ban nou+ se siy Jonas la+.” Lè l fin di sa, li kite yo la, l ale.
5 Apre sa, disip yo janbe pa lòtbò lanmè a, men yo bliye pote pen+.
6 Jezi di yo: “Ouvri je nou, epi veye kò nou ak ledven Farizyen yo ansanm ak ledven Sadiseyen yo+.”
7 Lè sa a, yo kòmanse rezone youn ak lòt, yo di: “Genlè se paske nou pa pot pen ki fè l di sa.”
8 Etandone Jezi konnen sa y ap di a, li di yo: “Poukisa n ap diskite youn ak lòt poutèt nou pa gen pen? Ki jan nou fè manke lafwa konsa a?
9 Èske se konprann nou poko konprann toujou? Oswa, èske se sonje nou pa sonje ki kantite pànye nou te ranmase lè te gen senk pen pou 5 000 gason yo+?
10 E èske se sonje nou pa sonje ki kantite gwo pànye* nou te ranmase lè te gen sèt pen pou 4 000 gason yo+?
11 Kòman nou fè pa rive konprann se pa de pen mwen t ap pale nou? Mwen di nou sa: Veye kò nou ak ledven Farizyen yo ansanm ak ledven Sadiseyen yo+.”
12 Se lè sa a yo konprann li pa t ap mande yo pou yo veye kò yo ak ledven yo met nan pen, men ak ansèyman Farizyen yo ak Sadiseyen yo.
13 Lè Jezi rive nan zòn Sezare Filip, li mande disip li yo: “Kiyès moun yo di Pitit lòm nan ye+?”
14 Yo di l: “Gen moun ki di ou se Jan ki te konn batize moun nan+, gen lòt ki di ou se Eli+, gen lòt ankò ki di ou se Jeremi oubyen youn nan pwofèt yo.”
15 Li di yo: “Men, e nou menm, kiyès nou di mwen ye?”
16 Simon Pyè reponn: “Ou se Kris la+, Pitit Bondye vivan an+.”
17 Jezi reponn, li di l: “Ou byennere, Simon, pitit Jonas, paske se pa lòm* ki fè w konn sa, men se Papa m ki nan syèl la+.
18 Epitou, m ap di w sa: Ou se Pyè+, e se sou mas wòch sa a+ m ap bati kongregasyon m nan, e pòt Tonm nan* pap gen pouvwa sou li.
19 M ap ba w kle Wayòm syèl la, e nenpòt sa w mare sou tè a ap deja mare nan syèl la, e nenpòt sa w demare sou tè a ap deja demare nan syèl la.”
20 Apre sa, li pase disip yo lòd pou yo pa di pèsonn se li ki Kris la+.
21 Se depi lè sa a Jezi kòmanse ap esplike disip li yo fòk l al Jerizalèm, fòk li sibi anpil bagay anba men ansyen yo, anba men prèt an chèf yo ak espè nan Lalwa yo, e yo gen pou yo touye l, men sou twazyèm jou a li gen pou l leve+.
22 Lè Pyè tande sa, li pran l apa e li kòmanse pale fèm avè l, li di l: “Pa di bagay konsa non, Seyè. Sa pa gendwa janm rive w+.”
23 Men, li vire do bay Pyè, li di l: “Pase dèyè m, Satan*! Ou se yon obstak pou mwen, paske se pa panse Bondye ou gen nan tèt ou, men se panse lèzòm+.”
24 Apre sa, Jezi di disip li yo: “Si yon moun vle suiv mwen, se pou l nye tèt li, se pou l pran poto soufrans* li e se pou l kontinye suiv mwen+.
25 Paske, nenpòt moun ki vle sove lavi l* ap pèdi l. Men, nenpòt moun ki pèdi lavi l* poutèt mwen, l ap jwenn li+.
26 Anfèt, ki sa yon moun ap jwenn si l gen lemonnantye, men li pèdi lavi l*+? Oubyen ki sa yon moun ap bay nan plas lavi l*+?
27 Pitit lòm nan gen pou l vini nan glwa Papa l ba li, ansanm ak zanj li yo, e lè sa a, li pral bay chak moun sa yo merite, selon konduit yo+.
28 Anverite m ap di nou sa: Gen kèk nan moun ki kanpe la a ki pap mouri toutotan yo pa wè Pitit lòm nan k ap vini nan Wayòm li+.”
Nòt anba paj
^ Lit.: “e ki nan adiltè”.
^ Oswa: “kantite pànye yo konn met pwovizyon”.
^ Lit.: “se pa chè ak san”.
^ Oswa: “Adès”. Se tonm ki la pou moun ki mouri ale. Gade Lis mo yo esplike yo.
^ Oswa: “Opozan”. Se sa mo “Satan” an vle di.
^ Gade Lis mo yo esplike yo.
^ Oswa: “nanm li”.
^ Oswa: “nanm li”.
^ Oswa: “nanm li”.
^ Oswa: “nanm li”.
