Matye 3:1-17
3 Twouve, Jan+ ki konn batize moun nan te vin ap preche+ nan dezè Jide a.
2 Li t ap di: “Se pou nou repanti, paske Wayòm syèl la vin pi pre+.”
3 Annefè, se de li pwofèt Ezayi t ap pale+ lè l te di: “Gen vwa yon moun k ap di byen fò nan dezè a: ‘Prepare chemen an pou Jewova*! Fè wout yo vin dwat pou li+.’”
4 Jan te gen yon rad sou li ki te fèt ak plim chamo e li te gen yon sentiwon ki fèt ak po bèt nan senti l+. Li te konn manje krikèt ak siwo myèl li jwenn nan bwa+.
5 Moun te soti Jerizalèm, nan tout Jide ak nan tout zòn ki ozalantou Rivyè Jouden an pou y al jwenn li+,
6 li te batize yo* nan Rivyè Jouden an+, e yo te konfese peche yo devan tout moun.
7 Lè l wè anpil Farizyen ak Sadiseyen+ ap vin nan zòn kote l ap fè batèm nan, li di yo: “Ras vipè+, kiyès ki fè nou konprann nou ka kouri pou kòlè Bondye a k ap vini+?
8 Ebyen, se pou nou fè aksyon* ki montre nou repanti.
9 E pinga nou konprann pou n ap di nan kè nou: ‘Se Abraram ki papa nou+.’ Paske, m ap di nou sa: Bondye kapab fè pitit sot nan wòch sa yo pou Abraram.
10 Rach la deja nan rasin pyebwa a. Kidonk, tout pyebwa ki pa bay bon fwi, y ap koupe yo e y ap jete yo nan dife+.
11 Mwen menm, mwen batize nou nan dlo paske nou repanti+. Men, moun k ap vini apre m nan, moun mwen pa menm merite pou m ta retire sandal li a, pi pisan pase m+. Moun sa a ap batize nou nan lespri sen+ ak nan dife+.
12 Pèl pou l vannen an nan men l. L ap netwaye kote l konn bat manje angren an byen netwaye, e l ap ranmase ble l met nan depo, men, l ap boule pay la nan yon dife+ ki pa ka etenn.”
13 Apre sa, Jezi soti Galile, l al kot Jan nan Rivyè Jouden an pou Jan batize l+.
14 Men, Jan eseye anpeche l, li di: “Se mwen menm ki bezwen pou w batize m, epi se ou menm k ap vin kote m?”
15 Jezi di l: “Kite sa fèt konsa, paske se konsa pou nou akonpli tout sa ki jis.” Epi, Jan sispann anpeche l.
16 Apre Jezi fin batize, tousuit li monte sot anba dlo a, syèl la ouvri+, e Jan wè lespri Bondye k ap desann vin sou Jezi sou fòm yon pijon+.
17 Epitou, gen yon vwa ki soti nan syèl la+ ki di: “Men Pitit Gason m nan+, pitit mwen renmen anpil la, li menm mwen pran plezi nan li a+.”
