Nonb 11:1-35
11 Twouve, pèp la te kòmanse ap plenyen anpil devan Jewova. Lè Jewova tande sa, li vin an kòlè e Jewova te lage dife sou kèk nan yo nan dènye pwent kan an.
2 Kou pèp la te kòmanse kriye nan kò Moyiz, Moyiz te sipliye Jewova+ e dife a te etenn.
3 Se sa k fè yo te rele kote sa a Tabera*, paske Jewova te lage dife sou pèp la+.
4 Foul moun ki pa t Izrayelit+ ki te ansanm ak Izrayelit yo te montre yo ava+, epi Izrayelit yo tou te pran kriye, yo t ap di: “Kiyès k ap ban nou vyann pou nou manje+?
5 Se pa ti sonje nou sonje pwason nou te konn manje pou granmesi nan peyi Ejip, ansanm ak konkonm, melon, powo, zonyon ak lay+!
6 Men, kounye a, nou* fin depafini. Nou pa gen anyen menm devan je nou, sof lamàn sa a+.”
7 Twouve, lamàn nan+ te tankou grenn pitimi*+ e l te sanble ak yon gonm bwa ki santi bon.
8 Pèp la te mache ranmase l toupatou, yo te moulen l nan moulen oswa yo te pile l nan pilon. Apre sa, yo te kuit li nan chodyè oswa yo te fè pen won+ avè l e li te gen menm gou ak bonbon yo kuit ak luil.
9 Lè lawouze te tonbe nan kan an lannuit, lamàn te konn tonbe nan kan an tou+.
10 Moyiz te tande pèp la k ap kriye, chak fanmi e chak moun t ap kriye devan tant pa yo. Lè sa a, Jewova te vin fache anpil+ e Moyiz pa t kontan menm tou.
11 Epi, Moyiz di Jewova: “Poukisa w lage sèvitè w la nan pwoblèm? Èske se kontan w pa kontan avè m ki fè w lage chay tout pèp sa a sou do m+?
12 Èske se mwen ki te fè tout pèp sa a? Èske m te pouse l tankou yon fi k ap fè pitit ki fè w di m: ‘Pote yo sou lestomak ou, menm jan yon sèvitè k ap pran swen timoun pote yon tibebe*’, pou m mennen yo nan peyi ou te fè sèman w ap bay zansèt yo+?
13 Ki kote m ap jwenn vyann pou m bay tout pèp sa a? Paske yo pa sispann kriye nan pye m, y ap di m: ‘Ban nou vyann pou n manje!’
14 Mwen pa ka responsab tout pèp sa a poukont mwen. Chay la twòp pou mwen+.
15 Si se konsa w ap aji avè m, ou mèt touye m kounye a menm+. Si m jwenn favè nan men w, pa kite m wè lòt malè ankò.”
16 Jewova reponn Moyiz, li di l: “Chwazi 70 gason pami ansyen ki nan pèp Izrayèl la, moun yo rekonèt antanke ansyen e ki gen otorite nan mitan pèp la+. Mennen yo nan tant reyinyon an e fè yo kanpe la avè w.
17 M ap desann+ vin pale avè w kote nou ye a+. M ap pran yon pòsyon nan lespri+ ki sou ou a pou m mete sou yo, e y ap ede w pote chay pèp la pou w pa oblije pote l poukont ou+.
18 Ou dwe di pèp la: ‘Pirifye tèt nou pou demen+, paske nou pral manje vyann kanmenm, piske nou te kriye nan zòrèy Jewova+ e nou te di: “Kiyès k ap ban nou vyann pou nou manje? Bagay yo te pi bon pou nou ann Ejip+.” Jewova pral ban nou vyann san mank, e n ap manje vyann+.
19 Se pa ni yon jou, ni 2 jou, ni 5 jou, ni 10 jou, ni 20 jou n ap fè ap manje vyann,
20 men, se tout yon mwa n ap fè ap manje vyann, jiskaske l soti nan twou nen nou e nou vin rebite l+, paske nou te meprize Jewova ki nan mitan nou e nou t ap kriye nan kò l, nou t ap di: “Poukisa nou te kite peyi Ejip+?”’”
21 Apre sa, Moyiz di: “Pèp mwen nan mitan l lan gen 600 000 gason+ vanyan, epoutan w di: ‘M ap ba yo vyann, e y ap manje vant plen pandan tout yon mwa!’
22 Menmsi m ta touye tout mouton ak tout bèf nou genyen yo, èske l t ap ase pou yo? Epi, menmsi m ta kenbe tout pwason ki nan lanmè a, èske l t ap ase pou yo?”
23 Lè sa a, Jewova di Moyiz: “Èske men Jewova twò kout+? Kounye a, ou pral wè si sa m di a pap fèt vre.”
24 Se konsa, Moyiz te soti al pale ak pèp la, li di yo pawòl Jewova te di l yo. Li chwazi 70 gason pami ansyen ki nan pèp la e li fè yo kanpe toutotou tant lan+.
25 Annapre, Jewova desann nan yon nyaj+, li pale ak Moyiz+ e li pran yon pòsyon nan lespri+ ki sou Moyiz la li mete l sou chak gason nan 70 ansyen yo. Epi, kou lespri a vin sou yo, yo tonbe aji tankou pwofèt*+. Men, yo pa t kontinye fè sa.
26 Te gen de nan mesye yo ki te ret nan kan an. Youn te rele Èldad e lòt la te rele Medad. Epi, lespri a te vin sou yo, piske yo te pami moun yo te pran non yo. Men, yo pa t al bò tant lan. Se sa k fè yo te pran aji tankou pwofèt nan kan an.
27 Gen yon jèn gason ki kouri al di Moyiz: “Men Èldad ak Medad ap aji tankou pwofèt nan kan an!”
28 Lè sa a, Jozye+, pitit Noun, ki te adjwen Moyiz depi l jèn, pran lapawòl, li di: “Moyiz, mèt mwen, fè yo sispann+!”
29 Men, Moyiz di l: “Genlè w jalou pou mwen? Okontrè, mwen ta renmen pou tout pèp Jewova a vin pwofèt, paske Jewova t ap mete lespri l sou yo.
30 Annapre, Moyiz retounen nan kan an ansanm ak ansyen ki nan pèp Izrayèl yo.
31 Apre sa, Jewova fè yon van soufle e li fè zwazo* soti nan zòn lanmè a vin sou kan an+. Te gen zwazo nan tout kan an, sot sou yon bò, kote yon moun ka fè yon jou ap mache al sou yon lòt bò, sou yon distans kote yon moun ka fè yon jou ap mache. Zwazo yo te fè pil rive wotè de koude* konsa.
32 Se sa k fè, pandan tout jou sa a ak tout nuit lan rive tout demen, pèp la te ret ap pran zwazo. Pa gen moun ki te pran pi piti pase dis homè*. Yo te kontinye gaye yo toupatou nan kan an pou yo ka sèvi avèk yo*.
33 Men, Jewova te an kòlè anpil, e Jewova te kòmanse touye anpil moun+ nan pèp la pandan vyann nan te toujou anba dan yo e yo potko menm moulen l.
34 Se sa k fè yo te rele kote sa a Kibwòtatava*+, paske se la yo te antere tout moun ki te montre yo ava yo+.
35 Pèp la te kite Kibwòtatava pou y al Azewòt, e yo te rete Azewòt+.
Nòt anba paj
^ Sa vle di: “Limen; Gwo dife; Flanm dife”.
^ Oswa: “nanm nou”.
^ Lit.: “grenn koryann”. Li blan tankou pitimi.
^ Oswa: “yon gason k ap pran swen tibebe”.
^ Oswa: “tonbe bay pwofesi”.
^ Lit.: “kay”. Se yon zwazo ki gen anpil vyann (li mezire anviwon 18 sm longè). Vyann li bon anpil, menm jan ak vyann poul.
^ Yon koude egal 44,5 sm (17,5 pous). Gade Apendis B14.
^ Oswa: “pi piti pase dis barik”. Yon homè egal 220 lit. Gade Apendis B14.
^ Petèt, se pou yo te ka seche vyann yo.
^ Sa vle di: “Kote yo te antere moun ki te montre se sèlman tèt yo yo wè”.
