Obadya 1:1-21
1 Vizyon Obadya* te fè a:
Men sa Jewova, Seyè ki Souvren an, di konsènan Edòm+:“Nou tande yon nouvèl e se Jewova ki bay nouvèl sa a.Gen yon moun yo voye nan mitan nasyon yo pou l di yo:‘Leve kanpe, annou prepare nou pou nou batay avè l+.’”
2 “Gade, mwen fè w pa gen okenn enpòtans nan mitan nasyon yo.Se pa ti meprize yo meprize w+.
3 Ou pran tèt ou pou yon pakèt afè, se sa k fè kè w twonpe w+,Ou menm ki abite nan twou ki sou tèt mas wòch la,Ou menm k ap viv kote ki wo a, ou menm k ap di nan kè w:‘Kiyès ki ka fè m desann atè?’
4 Menmsi w ta al fè kay ou byen wo* tankou èg,Oubyen ou ta fè nich ou nan mitan zetwal yo,Mwen t ap fè w desann sot la.” Se sa Jewova di.
5 “Si vòlè ta vin lakay ou, si yo ta vin nan nuit,(Gade jan yo pral detwi w nèt!*)Èske se pa sa yo vle sèlman yo t ap pran?Oubyen, si se moun k ap rekòlte rezen ki ta vin nan peyi w la,Èske yo pa t ap kite rezen dèyè pou moun ranmase+?
6 Ala fouye yo fouye peyi Ezaou a!Gade jan yo pran trezò li genyen ki te kache yo!
7 Yo mennen w jis nan fwontyè a.Tout patizan w yo* twonpe w.Mesye ki t ap viv anpè avè w yo pote laviktwa sou ou.Moun k ap manje pen ansanm avèk ou yo ap tann yon filè pou ou,Men ou pap menm wè sa.
8 Jou sa a,” se sa Jewova di,“Èske mwen pap detwi tout moun save ki Edòm yo+,Èske mwen pap detwi moun ki gen bon jijman ki nan zòn ki gen mòn ki pou Ezaou a?
9 O Teman+, sòlda w yo ap gen yon gwo laperèz+,Paske tout moun ki nan zòn ki gen mòn ki pou Ezaou a ap peri nan masak la+.
10 Ou gen pou w wont anpil+Akoz vyolans ki te fèt sou Jakòb, frè w la+.Y ap detwi w pou toutan+.
11 Nan jou ou te annik ret kanpe sou kote ap gade a,Lè etranje yo te fè sòlda l yo vin prizonye a+,Lè etranje yo te antre nan pòtay li a e yo te fè tiraj osò+ pou yo separe Jerizalèm nan,Ou te aji menm jan ak yo.
12 Lè malè te rive frè w la, ou pa t dwe kontan poutèt sa k te rive l la+.Lè malè te rive moun Jida yo, ou pa t dwe kontan poutèt sa k te rive yo a+.Lè yo t ap soufri a, ou pa t dwe pale avèk awogans jan w te fè a.
13 Lè malè te rive pèp mwen an, ou pa t dwe antre nan pòtay li a+.Lè malè te rive l la, ou pa t dwe rejwi jan w te fè a.Lè malè te rive l la, ou pa t dwe met men sou richès li yo+.
14 Ou pa t dwe kanpe nan kafou pou w touye moun k ap chape yo+.Lè malè te rive yo a, ou pa t dwe livre moun ki chape yo+.
15 Paske, jou Jewova pral frape tout nasyon yo toupre+.Sa w te konn fè yo se sa y ap fè w+.Y ap aji avè w menm jan w te aji ak lòt nasyon yo.
16 Menm jan nou te bwè diven sou mòn mwen an ki sakre,Se konsa tout nasyon yo pral bwè diven kòlè m nan san rete+.Vrèmanvre, yo gen pou yo bwè l nèt.Apre sa, yo pap la ankò, kòmsi yo pa t janm egziste.
17 Men, moun ki chape yo ap sou Mòn Siyon an+.Mòn nan ap sakre+.Tout bagay moun sa yo te genyen ap vin pou desandan Jakòb yo+.
18 Desandan Jakòb yo ap vin tankou yon dife,Desandan Jozèf yo ap tounen yon flanm dife,E desandan Ezaou yo ap vin tankou pay sèch.Y ap boule yo, y ap fini ak yo nèt.Pa gen okenn nan desandan Ezaou yo k ap chape+,Paske se mwen menm, Jewova, ki di sa.
19 Y ap pran Negèb la ak zòn ki gen mòn ki pou Ezaou a+Ansanm ak Chefela ak peyi moun Filisti yo+.Y ap pran tèritwa Efrayim nan ak tèritwa Samari a+.Benjamen ap pran Galaad.
20 Peyi moun Kanaran yo rive jis Safat+Ap vin pou moun ki te nan fòtrès sa a e ki t al ann egzil yo+, anpalan de pitit Izrayèl yo.Vil Negèb yo ap vin pou moun Jerizalèm ki t al ann egzil e ki te Sefarad yo+.
21 Moun ki ba yo delivrans yo ap monte sou Mòn SiyonPou yo jije zòn ki gen mòn ki pou Ezaou a+.Lè sa a, Jewova ap vin Wa+.”
Nòt anba paj
^ Sa vle di: “Sèvitè Jewova”.
^ Se kapab tou: “ta vole byen wo”.
^ Se kapab tou: “Ki kantite dega yo t ap fè?”
^ Oswa: “Tout moun ki fè alyans avè w yo”.
