Memoryal la ban nou yon bèl okazyon pou nou reflechi sou benediksyon nou pral jwenn alavni grasa ranson an. Youn nan benediksyon sa yo se rezirèksyon an. Jewova pa t janm gen nan objektif li pou lèzòm mouri. Se sa k fè, youn nan bagay ki ban nou pi gwo lapenn se lè nou gen yon moun pa nou ki mouri (1Ko 15:26). Jezi te nan lapenn lè l te wè disip li yo te nan tristès poutèt Laza te mouri (Jan 11:33-35). Piske Jezi reflete pèsonalite Papa l yon fason ki pafè, nou mèt gen asirans sa fè Jewova lapenn lè li wè n ap soufri akoz yon moun pa nou ki mouri (Jan 14:7). Jewova ap tann avèk enpasyans moman pou l resisite sèvitè fidèl li yo ki mouri, e nou menm tou, nou ta dwe tann moman sa a avèk enpasyans. — Jb 14:14, 15.

Piske Jewova se yon Bondye ki gen lòd, li rezonab pou n kwè li pral fè rezirèksyon an nan lòd (1Ko 14:33, 40). Pap gen afè antèman ankò, olye de sa, petèt se moman kote fanmi ak zanmi pral reyini ansanm pou yo akeyi moun ki pral resisite yo. Èske w konn medite sou rezirèksyon an, sitou nan moman kote w nan gwo lapenn (2Ko 4:17, 18)? Èske w konn di Jewova mèsi pou ranson an li te bay epi èske w konn di l mèsi paske, nan Bib la, li fè w konnen moun ki mouri yo pral tounen viv ankò? — Kl 3:15.

• Pami zanmi w yo ak fanmi w yo, ki moun sitou w ap tann pou w wè ankò?

• Ki pèsonaj nan Bib la sitou ou ta renmen rankontre e w ta renmen pale avè l?