Jewova konsidere ve moun ki marye yo fè yo kòm yon bagay ki enpòtan anpil. Li di yon mari ak madanm li dwe atache youn ak lòt (Mt 19:5, 6). Nan pèp Bondye a, gen anpil maryaj ki gen kè kontan. Men, pa gen yon maryaj ki pafè. Se sèten, konn gen pwoblèm ladan yo. Nou pa dwe vin ap panse menm jan ak moun nan monn nan ki kwè lè de moun marye gen pwoblèm, solisyon an se separasyon ak divòs. Ki jan kretyen ki marye yo ka pwoteje maryaj yo?

Konsidere senk pwen enpòtan sa yo.

1. Pwoteje kè w lè w rejte kèk bagay tankou flète ak detant ki imoral, bagay sa yo la sèlman pou fè moun pa bay maryaj yo valè. — Mt 5:28; 2P 2:14.

2. Fè relasyon w ak Bondye vin pi solid e chèche gen plis anvi pou w fè l plezi nan maryaj ou. — Sm 97:10.

3. Kontinye abiye ak nouvo pèsonalite a, epi fè yon seri aksyon, menmsi yo toupiti, ki demontre bonte, sa ap fè lavi mari w oswa madanm ou vin pi fasil. — Kl 3:8-10, 12-14.

4. Kontinye byen kominike avèk mari w oswa madanm ou, e fè sa avèk respè. — Kl 4:6.

5. Bay mari w oswa madanm ou sa w dwe l la avèk afeksyon e avèk lanmou. — 1Ko 7:3, 4; 10:24.

Lè kretyen yo onore maryaj yo, se onore yo onore Jewova, Sila a ki vin ak maryaj la.

GADE VIDEYO KI GEN TIT NOU DWE “KOURI AVÈK ANDIRANS” — RESPEKTE RÈG YO, EPI REPONN KESYON KI ANNAPRE YO:

• Menmsi yon maryaj ka byen kòmanse, ki difikilte de moun ki marye yo ka jwenn?

• Ki jan prensip ki nan Bib la ka ede moun ki santi yo nan yon maryaj kote pa gen lanmou ankò?

• Ki prensip Jewova mete pou moun ki marye yo suiv?

• Pou yon maryaj reyisi, ki sa de moun ki marye yo dwe fè?