Depi janvye 2018, gen modèl konvèsasyon ki parèt sou premye paj dokiman Lavi nou ak travay nou fè antanke kretyen — Pwogram reyinyon ak kote pou n ekri a. Ki jan n ka sèvi ak yo?

Lè w gen yon patisipasyon elèv: Ou dwe sèvi ak kesyon, vèsè ak sijè yo bay pou pwochen vizit la ki nan modèl konvèsasyon an. Sepandan, sa pa vle di ou dwe di egzakteman menm mo yo te di nan videyo modèl konvèsasyon an. Ou ka sèvi ak yon lòt kad, yon lòt entwodiksyon, yon lòt rezònman, elatriye. Ou ka ofri yon lòt piblikasyon tou ki nan Bwat zouti pou anseye a, menmsi yo pa di sa nan enstriksyon yo bay sou fason pou n fè patisipasyon an.

Lè w nan travay predikasyon an: Yo fè modèl konvèsasyon yo pou ede n jwenn bonjan ide k ap itil nou. Si yon moun montre l enterese toutbon e l vle aprann plis, ou kapab kontinye konvèsasyon an, petèt ou ka sèvi ak sa yo di nan modèl konvèsasyon an pou nouvèl vizit la. Oswa, ou kapab chanje kèk bagay nan modèl konvèsasyon yo oubyen ou ka fè yon lòt bagay ki diferan nèt. Èske gen yon sijè nan yon mwa ki pase oswa yon lòt vèsè ki plis touche moun nan tèritwa w la? Èske moun nan zòn ou an pi enterese nan evènman k ap pase yo oswa nan sa y ap di nan nouvèl konsènan zòn ou an? Kèlkeswa fason w chwazi sèvi ak modèl konvèsasyon yo, ou ta dwe gen objektif pou w “fè tout bagay pou bon nouvèl la, pou w ka pataje l ak lòt moun”. — 1Ko 9:22, 23.