Apati mwa septanm, Pwogram reyinyon Lavi nou ak travay nou fè a ap gen yon lòt kalite modèl prezantasyon ki gen tit “Anseye laverite”. Objektif nou se montre moun yo yon verite biblik de baz, pandan n ap poze yo yon kesyon e n ap li yon vèsè ak yo.

Si nou wè yon moun enterese, nou ka poze baz pou yon nouvèl vizit lè n kite yon piblikasyon pou li oswa n pase yon videyo sou sit jw.org la pou li. Nou ta dwe eseye tounen wè l nan kèk jou pou n pale sou sijè n te kòmanse dènye fwa a. Prezantasyon sa yo ak patisipasyon elèv yo ap baze sou rezime nou jwenn nan fen chak chapit nan liv Ki sa Labib kapab anseye nou? an. Nan rezime sa yo, nou ka jwenn lòt kesyon ak lòt vèsè ki ka ede nou fè nouvèl vizit yo oubyen kondui yon etid ak Bib la nan men nou sèlman.

Se yon sèl wout ki mennen nan lavi (Mt 7:13, 14). Kòm nou pale ak moun ki nan tout relijyon e ki soti tout kote, nou dwe montre yo verite biblik k ap atire yo (1Ti 2:4). Tank l ap pi fasil pou n pale sou diferan sijè biblik e tank n ap pi maton nan “manyen pawòl verite a kòrèkteman”, se tank n ap santi n gen plis kè kontan e n ap jwenn pi bon rezilta nan anseye lòt moun laverite. — 2Ti 2:15.