MWEN te fèk batize lè ansyen yo te mande m si pa ta renmen fè plis nan travay predikasyon an. Jou ki te 4 me 1992 la, mwen te asiste yon reyinyon espesyal yo te fè pou moun ki te pare pou al sèvi kote ki gen gwo bezwen pwoklamatè. Nan demen, mwen menm ak yon lòt frè t al rete nan pò Batoumi an, nan rejyon Ajarya a.

Premye fwa m te preche nan Batoumi, m te strese anpil. M t ap mande tèt mwen ki jan pou m kòmanse konvèsasyon yo. Fason premye fi mwen te preche a te reyaji a te fè m sezi. Li te di: “Kote nou te ye depi tan sa a?” Li te kòmanse etidye Labib avè nou nan demen tèlman li te chofe pou l konn plis bagay sou Temwen yo!

Anvan nou t al Batoumi, nou te resevwa yon lis adrès moun ki enterese. Kòm nou pa t konn vil la byen, nou te mande moun nan lari a ki wout pou n fè. Anpil nan moun nou te mande yo pa t kapab ede nou paske non pifò nan  ri yo te fèk chanje, men yo te enterese nan mesaj nou t ap bay la. Anvan lontan, nou te gentan ap fè etid ak plizyè gwoup ki te gen 10 oswa 15 moun ladan yo.

Kat mwa sèlman apre nou rive, te gen plis pase 40 moun ki t ap asiste reyinyon regilyèman. Nou t ap mande tèt nou kiyès ki pral pran swen nouvo sa yo. Epi, akoz konfli ki te genyen ant lame jòjyen an ak yon gwoup moun ki pa t ale nan menm sans ak gouvènman an, tout moun ki te nan ansyen kongregasyon m te ye a te vin Batoumi. Nan yon sèl jou, gen yon nouvo kongregasyon ki te vin fòme e ki te gen plizyè ansyen ak pyonye ki gen eksperyans!